आमोस 2

मोआब देशा लै बिधातो नसाफ

1 ✝ 2:1 ईशा. 15:1—16:14; 25:10-12; जेर. 48:1-47; एज. 25:8-11; सप. 2:8-11 बिधाता बोला इहअ, "मोआब देशे लोगै किऐ भिई-भिई खास्सै पाप, ऐबै लाई मंऐं तेता पिछ़ू तिन्‍नां लै सज़ा दैई। तिन्‍नैं किअ एदोमे देशे राज़े हाडकै दहई छ़ार। इहअ करै किअ सह बेइज़त। 2 तैही चैल़णीं मुंह मोआब देशै आग अर किर्यात नगरीए गहल़-कोट करनै मुंह आगी करै दहई खतम। मोआब देशे लोग मरनै जुधे हाल्‍लै करै ज़ांऊं सैना ज़ोरै-ज़ोरै लैल़ा अर फेरा-फेर नर्शिंगै बाज़णैं। 3 मोआब देशो राज़अ अर तिन्‍नें कार-करिंदै पाणै मुंह मारी।" ईंयां गल्‍ला बोली बिधाता।

यहूदा मुल्खा लै बिधातो नसाफ

4 बिधाता बोला इहअ, "यहूदा मुल्खे लोगै किऐ भिई-भिई खास्सै पाप, ऐबै लाई मंऐं तेता पिछ़ू तिन्‍नां लै सज़ा दैई। तिन्‍नैं निं मेरअ हुकम मनअ अर मेरअ बधान समझ़अ तिन्‍नैं बृथा। तिंयां रहै तिन्‍नां ई नकली देअआ पिछ़ू हांढदै लागी ज़ेते ज़सरी च़ाकरी तिन्‍नें दाद-बाब बी करा तै। 5 तैही चैल़णीं मुंह यहूदा मुल्खै आग अर एरुशलेम नगरीए गहल़-कोट करनै मुंह आगी करै दहई खतम।"

इज़राईला लै बिधातो नसाफ

6 बिधाता बोला इहअ, "इज़राईली रहै भिई-भिई पाप करदै लागी, तेते लणी मुंह तिन्‍नां लै सज़ा दैई। तिंयां पाआ नर्दोश मणछा गलामी लै थोल़ै ज़िहै ढब्बै पिछ़ू बेच़ी। तिंयां बेच़ा गरीब मणछा एक ज़ोल़ी पोलल़ै पिछ़ू। 7 तिंयां निं रैनै-गरीब मणछा लै झींण करदै अर नां तिन्‍नें मज़त करदै। ज़हा बेटल़ी सेटा लै शोहरू डेओआ, तेथ डेओआ तेऊओ बाब बी! इहअ करै किअ तिन्‍नैं मेरअ पबित्र नाअं नकदरअ। 8 तिंयां हआ हर ज़ैगा बेदी सेटा तिन्‍नां झिकल़ै जैंदरी सुत्तै दै ज़ुंण तिन्‍नां सेटा गरीब मणछै बांधै हआ डाहै दै। तिन्‍नें देअए देहुरै झुटा तिंयां तिन्‍नां ढब्बै करै शराब ज़ुंण लोगा का डांड हआ कठा किअ द!

9 "मंऐं किअ त तम्हां मेरी परज़े तैणीं अमोरी मणछो बनाश ज़ुंण केल़ुई ज़िहै लाम्मै अर बाना-महरू ज़िहै पाक्‍कै हआ तै।✝2:9 बधा. 3:8-11 10 मंऐं आणै तम्हैं मिसर देशा का अर संघा नढैऊऐ च़ाल़्ही साला तैणीं रेगीस्तानै। तेखअ पजैल़ै मंऐं तम्हैं इधी ताकि तम्हैं एऊ देशे मालक बणें ज़ेथ अमोरी तै बस्सै दै। 11 थारी लुआदा मांझ़ै बणाऐं मंऐं बिधाता आपणैं गूर, कोई बणाऐं नज़ीर। इज़राईलीओ, तम्हैं निं इना गल्‍ला लै हुधूई सकदै! अह गल्‍ल बोला हुंह बिधाता।✝2:11 गण. 6:1-8 12 पर तम्हैं पणैऊंईं नज़ीरा का शराब! गूरा लै किअ तम्हैं हुकम कि मुंह बिधातो समाद निं खोज़ी! 13 तम्हैं डाहणैं मुंह इहै धकदै लाई, ज़िहअ नाज़े खास्सी काशीए लादा करै गाड्डअ पठी दाभिआ। 14 सोभी का छ़ेक्‍कै ठुर्हनै आल़अ बी निं बच़ी सकदअ, जोधैओ ज़ोर बी हणअ खतम अर शूरबीरा निं आपणीं ज़िन्दगी बी बच़ाऊई बोल़णीं। 15 धणशा आल़ी सैना बी रहणीं मकाबलै करनै का, छ़ेक्‍कै ठुर्हनै आल़ै सपाही अर घोल़ै प्रैंदै शुंआर सपाही बी निं आपणीं ज़िन्दगी बच़ाऊई सकदै। 16 तैहा धैल़ी ठुर्हनै सोभी का खास्सी हिम्मत डाहणैं आल़ै सपाही बी आपणैं अस्त्र-शस्त्र छ़ाडी नगाही। अह गल्‍ल डाही मंऐं बिधाता बोली।"