2 पतरास 3

8 मेरै पैरै साथीओ, ऐहा गल्‍ला निं कधि बिस्सरी कि परमेशरे एक धैल़ी हआ हज़ार साला ज़ेही अर हज़ार साला हआ एकी धैल़ी ज़ेही। तेऊ लै आसा एक धैल़ी अर हज़ार साला दुहै एक बराबर।✝3:8 भज. 90:4

9 कई लोग सोठा इहअ कि प्रभू आसा आपणीं फिरी एछणें करारा पूरी करना लै बल़ैग पांदअ लागअ द। पर प्रभू निं एऊ साबै बल़ैग करदअ आथी लागअ द। तेऊ आसा तम्हां लै सबर डाहअ द। किल्हैकि सह निं कोही बरैबाद करनअ च़ाहंदअ। पर सह च़ाहा इहअ कि हरेक मणछ आपणैं पापो प्राश्त करे अर परमेशरा सेटा फिरी एछे।✝3:9 हब. 2:3-4

10 पर मसीहा एछणअ पाक्‍कै दी फिरी अर सह एछणअ नभैऊशै, ज़िहअ च़ोर एछा। तैहा धैल़ी हणीं सरगै गुल़ूबिज़ल़ू करै बडी छ़ेल़ अर सरग निं शुझणअ। सरगे सोभै च़िज़ा सुरज़, ज़ोथ अर तारै दझ़णैं पठी। तैहा धैल़ी करनी परमेशरा लोगे तिंयां गल्‍ला प्रगट ज़ुंण तिन्‍नैं संसारै रहंदी किई ती अर तेतो हणअ नसाफ।

11 अह गल्‍ल आसा पाक्‍की कि परमेशरा करनी सोभै गल्‍ला इहअ करै खतम, तै आसा तम्हां का थोघ कि थारअ बभार किहअ लोल़ी हुअ। थारअ बभार लोल़ी धर्मीं अर पबित्र हुअ अर थारै हर कामां करै लोल़ी परमेशर खुश हुअ। 12 आपणअ बभार डाहा तिहअ ज़िहअ तम्हैं आशा डाही तैहा धैल़ी न्हैल़ै आसा लागै दै ज़ुंण परमेशरै मसीहा फिरी एछणा लै आसा छ़ांटी दी। तैहा धैल़ी छ़ेक्‍कै एछणा लै करा पूरी कोशिश। तैहा धैल़ी दहणअ परमेशरा सरग आगी करै अर सुरज़, ज़ोथ अर तारै गल़णै तैहा आगीए घमास्सा करै।✝3:12 ईशा. 34:4

13 पर हाम्हां विश्वासी आसा परमेशरा का एही आशा कि तेऊ बणाणैं नऊंअ सरग अर पृथूई ज़िहअ तेऊ बाहिदअ आसा किअ द। तिधी रहणैं सिधै धर्मीं मणछ।✝3:13 ईशा. 60:21; 65:17; 66:22; प्रका. 21:1