2 थिस्सलूणी 1

अदर

1 अह च़िठी आसा पल़सी, सिलास अर तिमोथी बाखा। हाम्हैं आसा अह थिस्सलूणी रहणैं आल़ी विश्वासीए टोली लै लिखी दी ज़ुंण म्हारै बाब परमेशर अर प्रभू ईशू मसीहे आसा।

2 म्हारै बाब परमेशर अर प्रभू ईशू मसीहा का आसा म्हारी अरज़ कि तम्हां सोभी लोल़ी झींण अर शांती सदा हुई।

नसाफ हणें धैल़ी

3 भाईओ, थारै बारै लोल़ी त हाम्हैं हर बगत परमेशरा लै शूकर किअ। अह ठीक बी आसा इहअ करै कि थारअ विश्वास आसा मसीहा दी होर बी खास्सअ बढदअ लागअ द अर थारी एकी-दुजै लै झ़ूरी बी आसा बढदी लागी दी। 4 तैही करा हाम्हैं आप्पू बी परमेशरे होरी टोली दी थारै बारै घमंड कि तम्हैं ज़िरै खास्सै सांगट अर खरी, पर तज़ी बी किअ तम्हैं खास्सअ सबर अर थारअ भरोस्सअ आसा मसीहा दी अज़ी बी पाक्‍कअ।

5 एता करै हआ अह गल्‍ल पाक्‍की कि परमेशरो नसाफ आसा शुचअ अर एतो नतिज़अ हआ इहअ कि तम्हैं हआ परमेशरे राज़ा दी डेऊणैं जोगी ज़ेते तैणीं तम्हैं दाह-दुख ज़िरदै आसा लागै दै। 6 ऐबै ज़ै परमेशर सदा धर्मां संघै करा नसाफ, तेऊ आणनअ तिन्‍नां लै सांगट ज़ुंणी तम्हां लै सांगट दैनअ।

7 तम्हां ज़हा एभै सांगट आसा तेऊ दैणीं तम्हां चैन अर हाम्हां लै बी, अह हणअ तेभै ज़ेभै कि प्रभू ईशू मसीहा आपणैं शगती आल़ै स्वर्ग दूता संघै स्वर्गा का एछणअ अर फेर हणीं आग भकी दी।✝1:7 जोह. 1:14-15; प्रका. 14:3

8 ज़ुंण परमेशरा नांईं बछ़ैणदै, अर म्हारै प्रभू ईशूए खुशीए समादा नांईं मंदै, तेऊ दैणीं तिन्‍नां लै तेभै सज़ा।✝1:8 भज. 79:6; ईशा. 66:15; जेर. 10:25

9 तिंयां हणैं प्रभू का सदा लै ज़ुदै अर तिंयां निं परमेशरे महान प्रतप्पे शगतीए साझ़ू हणैं तेऊ दैणीं तिन्‍नां लै सज़ा कि तिंयां हणैं सदा लै खतम।✝1:9 प्रका. 21:8; मोत्त. 25:41,46; ईशा. 2:19,21

10 अह हणअ तेभै ज़ुंण घल़ी परमेशरै प्रभू ईशू लै स्वर्गा का फिरी एछणा लै आसा डाही दी। एतो नतिज़अ हणअ इहअ कि तेभै रहैऊंणअ हाम्हां पबित्र मणछा तेऊओ प्रतप्प अर तेभै हणीं हाम्हां तेऊ दी रहैनी ज़ुंण हाम्हैं तेऊ दी विश्वास करा। तूह बी हणअ तेभै तिधी किल्हैकि तंऐं बी किअ तेता दी विश्वास ज़ुंण हाम्हैं तेऊए बारै खोज़अ।✝1:10 1 थिस. 2:13; 1 करि. 1:5; भज. 89:7; ईशा. 49:3

11 हाम्हैं करा तम्हां लै कबल्‍ली प्राथणां इहअ बोली कि परमेशर तम्हां तेही ज़िन्दगी ज़िऊंणै जोगी बणांए ज़ेता लै तेऊ तम्हैं शादै दै आसा। हाम्हैं करा एही अरज़ बी कि सह तम्हां लै तिन्‍नां सोभी भली गल्‍ला करने शगती दैए ज़ुंण थारअ विश्वास तम्हां करना लै बोला। 12 हाम्हैं करा एही प्राथणां एते तैणीं कि तम्हां करै लोग म्हारै प्रभू ईशूओ नाअं सराहे अर तम्हैं मसीहे हणैं पिछ़ू थारअ अदर होए। इहअ हणअ किल्हैकि म्हारअ परमेशर अर प्रभू ईशू मसीहा आसा तम्हां लै खास्सअ झणैल़ू।✝1:12 ईशा. 24:15; 66:5; 1 पत. 1:7-8