1 फारस देशै त माहा राज़अ दारा, तेऊए राज़ा दी दुजी साला साज़ै भदरै किई बिधाता हगाई गूरा संघै गल्‍ला। बिधाता बोलअ तूह खोज़ै मेरअ समाद शालतीएले शोहरू जरूबाबेल ज़ुंण यहूदा मुल्खो राज़पाल आसा अर माहा अर जेहोसादके शोहरू ज़ैहसू का ज़ुंण माहा प्रोहत आसा।

2 स्वर्गे सारी सैनो मालक बिधाता बोलअ हगाई लै, "ईंयां लोग बोला इहअ, ‘अह बगत निं बिधाते भबना भिई च़िणनेओ आथी।’"

3 हगाई गूरा लै बोलअ बिधाता कि तूह खोज़ लोगा का मेरअ इहअ समाद, 4 "तम्हैं आसा शोभलै-शोभलै घअरै लागै दै रहंदै, मेरअ भबन आसा उज़र पल़अ द! 5 हुंह स्वर्गे सारी सैनो मालक बोला तम्हां लै इहअ, ‘भाल़णीं दैआ, तम्हां लै किहअ-किहअ आसा हंदअ लागअ द! 6 तम्हैं बऊअ खेचै खास्सअ, पर लऊंणा लै भेटअ तम्हां तेता का धख ज़िहअ। तम्हां का आसा रोटी खाणां लै पर रज्ज़णै जोगी निं तिंयां आथी। तम्हां का झुटणा लै ता आसा पर तेता करै निं थारी चिश मुक्‍कदी। तम्हां का झिकल़ै बी आसा पर नैत्तै करना लै आसा तिंयां थोल़ै। कमाई करै ढब्बै आसा तम्हां का ज़िहै कि छिझै थैल्‍लू दी होए डाहै दै।’

7 "हुंह स्वर्गे सारी सैनो मालक बोला तम्हां लै इहअ, ‘भाल़णीं दैआ, तम्हां लै किहअ-किहअ आसा हंदअ लागअ द! 8 ऐबै डेओआ उझै धारा लै खराल़ै पाई, तिधा का आणा मेरै भबना भिई बणाणां लै काठ काढी। ज़ै तम्हैं इहअ करे, तै हणअ हुंह खुश, अर तेता करै हणअ मेरअ अदर। 9 तम्हैं सोठअ इहअ कि थारी हणीं खास्सी साल फसल, पर तेता निखल़अ धख ज़िहअ। ज़ांऊं तम्हैं फसल घअरा लै झाल़ी आणी, सह फर्ल़ाऊई मंऐं दूर। मंऐं स्वर्गे सारी सैने मालक बिधाता इहअ किल्है किअ? किल्हैकि मेरअ भबन आसा उज़र पल़अ द अर तम्हैं सोभ आसा आपणैं-आपणैं घअरे कामां धुर्हुऐ दै! 10 तैही निस्सअ सरग हई अर ओश पल़ी। तैही निं धरना का नाज़ राम्बल़अ पज़दअ। 11 मंऐं निं सरग हणैं दैनअ ताकि थारै खेचै अर धारा रूल़ पल़े। थारी फसल नांईं पज़े। थारै निं रस काढणा लै दाख हणीं। तेल काढणा लै निं जैतून हणैं। धरना का निं किछ़ पज़णअ। मणछ अर डागै-धणा संघी पल़णअ सोभी लै नकाल़। तम्हां निं खटी-खटी किछ़ै भेटणअ।’"

12 शालतीएले शोहरू राज़पाल जरूबाबेल, जेहोसादके शोहरू माहा प्रोहत ज़ैहसू संघी बच़ै दै सोभी यहूदी ज़ुंण बाबेल देशे गलामी का फिरी एरुशलेम नगरी तै बस्सै दै, ज़ांऊं तिन्‍नैं बिधातो समाद शूणअ ज़ुंण हगाई गूरै तिन्‍नां का खोज़अ, तिन्‍नैं मनी बिधाते गल्‍ला। तिन्‍नैं किअ बिधातो अदर अर सोभ हुऐ सैहमत कि तिन्‍नां करनअ ज़िहअ बिधाता बोले तिहअ। 13 तेखअ खोज़अ बिधाते दूत हगाई तिन्‍नां का बिधातो अह समाद, "बिधाता बोला इहअ ‘हुंह आसा तम्हां संघै।’"

14 इहअ करै किअ बिधाता शालतीएले शोहरू राज़पाल जरूबाबेल, जेहोसादके शोहरू माहा प्रोहत ज़ैहसू संघी बच़ै दै सोभी यहूदी ज़ुंण बाबेल देशे गलामी का आणी एरुशलेम नगरी तै बस्सै दै, तिन्‍नों मन्‍न इहअ कि तिंयां हुऐ सोभ ऐहा गल्‍ला लै सैहमत कि तिन्‍नां बणाणअं आपणैं परमेशर स्वर्गे सारी सैने मालक बिधातो भबन। 15 ईंयां आसा च़ौबी भदरे गल्‍ला ज़धू फारस देशै माहा राज़ै दारा राज़ करदी दुजी साल ती लागी दी।