बधान या विश्वास
1 ओ गलात नगरीए बेसमझ़ विश्वासीओ, तम्हैं कुंणी मोहै? मंऐं खोज़अ तम्हां का सोभी नदरी राम्बल़ै करै कि मसीहा ईशू थारी तैणीं क्रूसा दी किल्है मूंअ। 2 हुंह च़ाहा तम्हां का सिधअ इहअ ज़ाणनअ कि तम्हां कै पबित्र आत्मां यहूदी बधाने साबै कामां करी भेटी? नां, तम्हैं शूणअ खुशीओ समाद अर तम्हैं किअ तेथ विश्वास अर तै भेटी तम्हां पबित्र आत्मां।3:2 गल. 3:5; शधा. 15:8-10
3 कै तम्हैं इहै बेसमझ़ निं आथी कि पबित्र आत्मां करै किई तम्हैं आपणीं नऊंईं ज़िन्दगीए शुरूआत! तम्हैं कै ऐबै आपणीं शगती करै च़ाहा आपणीं ज़िन्दगी पूरी करनी? 4 विश्वासी बणी करै ज़िरअ तम्हैं खास्सअ दुख। हुंह डाहा एही आशा कि थारअ अह दुख ज़िरनअ निं बरैबाद डेऊणअ।
5 सह आसा परमेशर ज़ुंण तम्हां लै आपणीं पबित्र आत्मां दान दैआ ज़ुंण तम्हां दी नुआहरै काम करा। सह कै तम्हैं यहूदी बधाने साबै काम करी भेटा? नां, तम्हैं किअ खुशीए समादा दी विश्वास ज़ुंण तम्हैं मसीहे बारै शूणअ।
6 आबरामे बारै सोठा, "आबरामै किअ परमेशरा दी विश्वास अर सह गणअ तेऊ लै धर्म।"3:6 मूल. 15:6 7 ऐहा गल्ला लआ तम्हैं समझ़ी कि ज़ुंण आबरामा ज़िहै परमेशरा दी विश्वासा करनै आल़ै आसा, तिंयां आसा असली दी आबरामे लुआद।
8 पबित्र शास्त्रा दी आसा खास्सी साला पैहलै ई इहअ समझ़ी कि होरी ज़ातीए हणैं विश्वासा ई करै धर्मीं, पैहलै ई दैनअ परमेशरै आबरामा लै अह खुशीओ समाद, "ताह करै भेटणीं सोभी ज़ाती बर्गत।"3:8 मूल. 12:3; 18:18
9 इहअ करै ज़ुंण आबरामा ज़िहअ परमेशरा दी विश्वास करा तिन्नां सोभी लै दैणीं परमेशरा बर्गत ज़ेही तेऊ आबरामा लै बर्गत दैनी।
10 पर पबित्र शास्त्रा दी आसा इहअ लिखअ द "तिन्नां सोभी मणछा लोल़ी फिटक लागअ ज़ुंण बिधातो बधान नांईं मने।" इहअ करै एछणअ तिन्नां लै फिटक ज़ुंण बधाने साबै काम करी परमेशरा संघै धर्मीं च़ाहा हणअ। किल्हैकि बधाने गल्ला निं कोहै कबल्लै पूरअ करी सकदअ।3:10 याक. 2:10,12; बधा. 27:26
11 पर अह गल्ल आसा प्रगट कि मोसा गूरे बधाना करै निं परमेशरा सेटा कोई बी धर्मीं बणी सकदअ। किल्हैकि सह ज़ुंण परमेशरा दी विश्वास करा, तेऊ बणाआं परमेशरा आप्पू संघै धर्मीं अर सह रहणअ सदा ज़िऊंदअ। 12 मोसा गूरे बधाने बिधीए साबै ज़िन्दगी काटणी अर परमेशरा दी विश्वास करनअ निं एकी रंगे गल्ला आथी, ज़िहअ पबित्र शास्त्र बोला, "ज़ुंण बधान मना सह लोल़ा बधाने साबै काम करी ज़िन्दगी।"3:12 लेब. 18:5
13 मसीहा दैनअ हाम्हां लै म्हारै फिटक क्रूसा दी आप्पू प्रैंदै च़की बधाने फिटका का छ़ुटकारअ। किल्हैकि शास्त्रा दी आसा लिखअ द, "तेऊ लै आसा फिटक ज़ुंण बी काठा दी छ़ड़ाऊअ।"3:13 बधा. 21:23
14 मसीहा किअ अह एते तैणीं कि होरी ज़ातीए लोगा बी सह बर्गत भेटे ज़ुंण मसीहा ईशू करै परमेशरै आबरामा लै किई ती दैणीं अर मसीहा दी विश्वास करी हाम्हां पबित्र आत्मां भेटे ज़ेते तेऊ हाम्हां लै करार थिई किई दी।
बधान अर करार
15 भाईओ, हुंह बोला आम ज़िन्दगीए बारै खोज़ी करै कि ज़ेभै दूई मणछ आप्पू मांझ़ै करार करा अर तिंयां करा तेता पाक्की अर तेखअ निं तिन्नां मांझ़ै कोहै तेथ किज़ै होर ज़ोल़दअ अर नां तेता चोल़दअ। 16 तै भाईओ, परमेशरै किई आबरामा अर तेऊए "लुआदा" लै करार। तेथ निं "खास्सी लुआदे" बारै आथी लिखअ द। तेथ आसा लिखअ द, "एक लुआद" मतलब "मसीहा।" 3:16 मोत्त. 1:1
17 आबरामा संघै करार करनै का 430 साला बाद दैनअ परमेशरै मोसा गूरो बधान। पर हाम्हैं निं इहअ बोली सकदै कि बधान अर परमेशरे करार निं ऐबै किछ़ू कामें रही। परमेशरे सह करार आसा अज़ी बी पाक्की अर तेऊ करनी सह पूरी।3:17 लुआ. 12:40
18 ज़ै परमेशर मोसा गूरे बधान मनणे साबै बर्गत दैंदअ, तै निं तेऊ करार करने ज़रुरत पल़दी। पर परमेशरै दैनी सह बर्गत आबरामा लै किल्हैकि तेऊ त पैहलै ई बाहिदअ किअ द।
19 तै इज़राईली मणछा लै परमेशरै मोसा गूरो बधान किल्है दैनअ? बधान दैनअ परमेशरै एते तैणीं कि लोगा का थोघ लागे कि असली दी पाप किज़ै आसा। मोसा गूरो बधान रहअ आबरामे तैहा लुआदा एछणैं तैणीं ज़सरै बारै परमेशरे करार ती किई दी कि सह एछणअ। परमेशरै दैनअ आपणैं स्वर्ग दूता बाती मोसा लै बधान ज़ुंण परमेशरा अर लोगा मांझ़ै खणोढी त। 20 खणोढीए ज़रुरत पल़ा तै एकी का खास्सै मणछा आप्पू मांझ़ै करार लागा करनी। पर परमेशर आसा एक्कै अर तेही निं तेऊ तेभै खणोढीए ज़रुरत पल़ी ज़ेभै आबरामा संघै करार किई।
बधानो मकसद
21 तै किज़ै बधान तेतो बरोध करा ज़ुंण परमेशरै करार आसा किई दी? कधि नां होए? किल्हैकि, ज़ै इहअ बधान दैनअ हंदअ ज़ुंण ज़िन्दगी दैई सका, तै हणैं तै बधाना करै धर्मीं। 22 पर पबित्र शास्त्रा करा ऐहा गल्ला प्रगट कि हाम्हैं सोभै आसा पापे बशै पल़ै दै, तैही आसा परमेशरै ज़िन्दगी दैणैंओ बाहिदअ तिन्नां लै किअ द ज़ुंण मसीहा ईशू दी विश्वास करा।
23 मसीहा एछणैं का आजी तै हाम्हैं यहूदी कैद अर बधान करा त म्हारअ पहरअ। बधानै तै हाम्हैं मसीहा एछणैं तैणीं कैदी ज़िहै डाहै दै।
24 बधान हुअ हाम्हां लै मसीहा तैणीं पजैल़णैं आल़अ गूरू ताकि हाम्हैं मसीहा दी विश्वासा करै परमेशरा संघै धर्मीं होए। 25 पर ऐबै गअ मसीहा एछी अर हाम्हैं सका तेऊ दी विश्वास करी, ऐबै निं हाम्हां ज़रुरत आथी कि मोसा गूरो बधान हाम्हां का बात रहैऊए।
26,27 ज़ांऊं तम्हैं मसीहे नाओंऐं डुबकी लई, थारअ च़ाल-च़लण हुअ मसीहा दी नऊंअ ज़िहअ कुंण नऊंऐं झिकल़ै बान्हां। इहअ करै हुऐ तम्हैं सोभै परमेशरे लुआद ज़ांऊं तम्हैं मसीहा ईशू दी विश्वास किअ।
28 मसीहा दी निं ऐबै यहूदी अर होरी ज़ाती मांझ़ै किछ़ै भेद आथी, नां कुंण मसीहा दी गलाम आथी अर नां कुंण आज़ाद, अर नां कोई मर्ध, नां बेटल़ी, किल्हैकि तम्हैं सोभै आसा मसीहा ईशू दी एक। 29 किल्हैकि तम्हैं आसा मसीहा दी एक अर तै आसा तम्हैं आबरामे असली लुआद अर तेऊए बरासते हकदार बी अर तम्हां भेटणीं तिंयां सोभै गल्ला ज़ुंण तेऊ आबरामा संघै थिई करार किई दी।