1 भाईओ, तम्हैं ज़ुंण पबित्र आत्में साबै ज़िन्दगी ज़िऊआ ज़ै तम्हां का कसरै बारै इहअ थोघ लागे कि तेऊ किअ पाप, तेऊ फरेऊआ बडी झ़ूरी संघै बापस। आपणअ बी डाहा धैन कि तम्हैं बी निं किधी तिहअ ई पाप करे। 2 हाम्हां लागा एकी दुजे मज़त करनी ज़ुंण बी हाम्हां मांझ़ै तंगी-तकलिफी दी होए अर एऊ ई साबै करै मसीहे बधाना पूरै।

3 ऐहा गल्‍लो डाहै धैन ज़ुंण इहअ समझ़ी दुजे मज़त नांईं करदै कि तिंयां आसा होरी का खास्सै ज़रूरी, असली दी निं तिंयां खास्सै ज़रूरी आथी अर तिंयां दैआ आप्पू लै धोखअ।

4 हरेक मणछ दैआ आप्पू परखणीं कि थारै काम भलै आसा कि नांईं। ज़ै तम्हैं बधिया किअ, तैहा गल्‍ला सका आपणीं बड़ैई करी पर होरीए कामां संघै निं तेते तोल करदै लागणअ। 5 किल्हैकि हाम्हां सोभी लागा आपणैं कामें ज़िम्मैंबारी आप्पै लणी।

6 अह गल्‍ल आसा ज़रूरी कि ज़ुंण परमेशरो बैण सखाऊआ तिन्‍नां लागा शिखल़णै आल़ै लै ज़ेही तिन्‍नें ज़रुरत आसा तेही मज़त करनी।

7 आप्पू लै धोखअ निं दैआ, ज़ै हाम्हैं इहअ सोठा कि हाम्हैं सका परमेशरा लै धोखअ दैई ता, तै आसा हाम्हैं ऐडै, किल्हैकि मणछ ज़िहअ बऊआ, तिहअ ई लऊंणअ बी तेऊ। 8 किल्हैकि ज़ुंण मणछ आपणैं पापी सभाबे साबै काम करा तेऊ का शुझणीं कि तेता करै आई तेऊ लै मौत। पर ज़ुंण पबित्र आत्में साबै काम करे तेऊ का शुझणअ कि पबित्र आत्मां दैनी तेऊ लै सदा रहणैं आल़ी ज़िन्दगी।

9 हाम्हां निं भलै कामां करना लै हैअ छ़ाडणअ, किल्हैकि, ज़ै हाम्हैं ढिलै नां होए, तै भेटणअ हाम्हां परमेशरे सोठी दी बेला दी तेतो फल। 10 तै बोला हुंह कि ज़िधी तैणीं हाम्हां मोक्‍कअ भेटे, हाम्हां करनी सोभी संघै भलाई, खासकर भाई-बैहणी संघै ज़ुंण मसीहा दी विश्वास करनै करै म्हारै टबरा ज़िहै आसा।

11 भाल़ा, मंऐं आसा आप्पै बडै-बडै आखरा दी आपणैं हाथै लिखअ द।

12 ज़ेतरै लोग होरी सम्हनै यहूदी मणछा खुश करने तैणीं दखाअ करनअ च़ाहा तिन्‍नां बोल़णअ तम्हां लै ज़ोरा-ज़ोरी खतैर करना लै। तिंयां करा एता सिधअ एते तैणीं कि लोग तिन्‍नां ऐहा गल्‍ला खोज़णैं पिछ़ू तंग नां करे कि परमेशरै बच़ाऊऐ लोग सिधै इहअ करै कि तिन्‍नैं किअ विश्वास कि मसीहा दैनी क्रूसा दी आपणीं ज़ान। 13 आप्पू; निं तिंयां खतैर किऐ दै यहूदी विश्वासी मोसा गूरे बधाने सोभी गल्‍ला पूरी करदै। पर तिंयां च़ाहा थारअ खतैर करनअ ताकि तिंयां होरी यहूदी मणछा सेटा आपणीं बड़ैई करे कि तिन्‍नैं किअ तम्हां एतरै लोगो खतैर।

14 पर हुंह निं म्हारै प्रभू ईशूए क्रूसा छ़ाडी होरी किछ़ू गल्‍ला दी घमंड करनअ च़ाहंदअ, किल्हैकि तेऊए मौता करै निं हुंह संसारे किछ़ी गल्‍लो गलाम रहा अर मुंह प्रैंदै निं संसारे कोहै शगती राज़ करी सकदी। 15 किल्हैकि नां खतैर अर नां खतैर किऐ बाझ़ी किज़ै आथी, खास आसा अह परमेशरै बणाऐं तम्हैं पबित्र आत्में कामां करै नऊंऐं मणछ। 16 हुंह करा परमेशरा का एही अरज़ कि परमेशर करे तिन्‍नां सोभी मणछा लै झींण ज़ुंण इना हुकमा मने अर तिन्‍नां सोभी लै लोल़ी शांती हुई। तिंयां मणछ आसा परमेशरै आप्पै छ़ांटै दै।

17 आजू निं कोहै मुल्है दुख दैई, किल्हैकि ज़ुंण मेरी देही दी ईंयां दाग आसा ईंयां करा ऐहा गल्‍ला प्रगट कि हुंह आसा मसीहा ईशूओ गलाम।

18 भाईओ, हुंह करा परमेशरा का अरज़ कि म्हारै प्रभू ईशूए झींण लोल़ी तम्हां सोभी लै सदा रही। एवमस्तू।