एकी दुजे करा मज़त
1 भाईओ, तम्हैं ज़ुंण पबित्र आत्में साबै ज़िन्दगी ज़िऊआ ज़ै तम्हां का कसरै बारै इहअ थोघ लागे कि तेऊ किअ पाप, तेऊ फरेऊआ बडी झ़ूरी संघै बापस। आपणअ बी डाहा धैन कि तम्हैं बी निं किधी तिहअ ई पाप करे। 2 हाम्हां लागा एकी दुजे मज़त करनी ज़ुंण बी हाम्हां मांझ़ै तंगी-तकलिफी दी होए अर एऊ ई साबै करै मसीहे बधाना पूरै।
3 ऐहा गल्लो डाहै धैन ज़ुंण इहअ समझ़ी दुजे मज़त नांईं करदै कि तिंयां आसा होरी का खास्सै ज़रूरी, असली दी निं तिंयां खास्सै ज़रूरी आथी अर तिंयां दैआ आप्पू लै धोखअ।
4 हरेक मणछ दैआ आप्पू परखणीं कि थारै काम भलै आसा कि नांईं। ज़ै तम्हैं बधिया किअ, तैहा गल्ला सका आपणीं बड़ैई करी पर होरीए कामां संघै निं तेते तोल करदै लागणअ। 5 किल्हैकि हाम्हां सोभी लागा आपणैं कामें ज़िम्मैंबारी आप्पै लणी।