1 पैहलै जुगै किई परमेशरै म्हारै दादा-बाबा का कई बारी भांती-भांती करै आपणैं गूरा बाती गल्‍ला, 2 एऊ जुगै किई तेऊ इना खिरीए धैल़ै हाम्हां संघै परमेशरै आपणैं पूता बाती गल्‍ला। परमेशरै बणाईं सोभै गल्‍ला तेऊ ई करै। तैही किअ परमेशरै इहअ बच़ार कि सह ई बणाणअं खिरी ऐबै इना सोभी गल्‍ला दी मालक।✝1:2 1 करि. 8:6; जोह. 1:3

3 सह शोहरू ई आसा तेऊए प्रतप्पो प्रैश्शअ अर सह तेऊ ई करै लागा हाम्हां का थोघ कि परमेशर किहअ महान आसा, सह आसा हर गल्‍ला दी तेऊ ई ज़िहअ अर तेऊए बैणा दी आसा एही शगती कि सारअ भ्रमंड रहा तिहअ ई काम करदअ लागी ज़िहअ सह आसा, तेऊ किऐ मणछे पाप दूर अर तेखअ बेठअ सह स्वर्गै सर्वशक्तिमान परमेशरे दैहणीं बाखा सोभी का बडी पदबी दी।

4 तेऊए एऊ कामां लै दैनी परमेशरै तेऊ लै सोभी का बडअ नाअं ज़ुंण स्वर्ग दूता का बी खास्सी बडी आसा इहअ करै लागा हाम्हां का थोघ कि ज़ुंण शोहरू आसा सह आसा तिन्‍नां का महान।

5 किल्हैकि परमेशरे निं स्वर्ग दूता मांझ़ै कोही लै इहअ बोलअ ज़ुंण तेऊ बोलअ ईशू लै बोलअ,✝1:5 2 शमू. 7:14; 1 इति. 17:13; भज. 2:7

"तूह आसा मेरअ पूत,

आझ़ किअ मंऐं अह प्रगट कि तूह आसा मेरअ पूत!"

इहअ बी निं तेऊ कोही स्वर्ग दूता लै बोलअ,

"हुंह हणअ तेऊओ बाब अर

सह हणअ मेरअ पूत?"

6 ज़ांऊं परमेशर आपणैं कल्है ज़ेठै पूता संसारा लै छ़ाडा, तेभै बोला सह इहअ,

"सोभै स्वर्ग दूत टेक्‍का तेऊ सेटा माथअ।"✝1:6 बधा. 32:13; 1 पत. 3:22

7 स्वर्ग दूते बारै बोला परमेशर इहअ,✝1:7 भज. 104:4

"तेरै दूत आसा पऊंण, तेरै दास आसा बिज़ल़ी।"

8 पर पूता लै बोला सह इहअ,✝1:8 भज. 45:5

"हे परमेशर तेरअ राज़ रहणअ जुगै-जुगै तैणीं सदा लै।

तूह करा आपणैं लोगा प्रैंदै नसाफ डाही राज़।

9 तूह झ़ूरा भलै लै अर कदुष्ट कामां का आसा ताह नफरत।

तैही आसा तूह बिधाता, तेरै परमेशरै आप्पै छ़ांटअ द,

तेऊ किअ तेरअ होरी सोभी साथी का खास्सअ अदर

अर खुशीओ खास्सअ तेल तरैल़ी अभिषेक।"

10 सह बोला पूता लै इहअ बी,✝1:10 भज. 102:25; मूल. 1:1

"हे प्रभू सोभी का आजी बणाईं तंऐं ई पृथूई अर

सारअ भ्रमंड बणाअं तंऐं आपणैं हाथै।

11 धरती संघी सारअ भ्रमंड हणैं एकी धैल़ै खतम पर तूह रहणअ सदा,

तिंयां सोभै हणैं झिकल़ै ज़िहै पराणैं।

12 "ताह च़फल़णै तिंयां मांदरी ज़िहै,✝1:12 इब्रा. 13:8; भज. 102:25-26

तिंयां बदल़णैं ताह झिकल़ै ज़िहै पोर्ही

संघा बणाणैं ताह तिंयां नऊंऐं।

पर आप्पू आसा तूह सदा ज़िहअ आसा तिहअ ई,

तेरी अमर निं कधि खतम हंदी।"

13 परमेशरै निं कधू कोही स्वर्ग दूता लै इहअ बोलअ ज़िहअ तेऊ बोलअ ईशू लै बोलअ,✝1:13 मोत्त. 22:44; भज. 110:1

"तूह बेश मेरै दैहणै सोभी का बडी पदबी दी,

ज़ेभै तैणीं कि हुंह तेरै दुशमणा

हारी करै सोभी गल्‍लो हक ताल्है निं दैंऊं?"

14 तै स्वर्ग दूत किज़ै काम करा? तिंयां आसा परमेशरे च़ाकरी करनै आल़ै। परमेशर छ़ाडा तिन्‍नां स्वर्ग दूता तिन्‍नें हेर-सभाल़ करदै ज़हा मणछा उद्धार भेटा।✝1:14 भज. 103:20-21