1 तैही लागा हाम्हां तिंयां गल्‍ला बडी धैन-मन्‍न लाई करनी ज़ुंण हाम्हैं शूणीं दी आसा, ताकि हाम्हैं सत्ता का दूर निं डेओए।

2 ज़ुंण समाद परमेशरै स्वर्ग दूता बाती दैनअ तेता करै हुअ हर बगत सत्त प्रगट, अर बधाने ज़ुंण बी गल्‍ला लोगै नांईं मनी तेता लै भेटी तिन्‍नां सज़ा। 3 इहअ किज़ै आसा ज़ुंण हाम्हैं इहअ सोठा कि एऊ महान उद्धारे गल्‍ला नांईं मनी कै हाम्हैं बच़ी जाणैं ज़ुंण प्रभू ईशू आप्पै आसा खोज़अ द? अह उद्धारो समाद आसा हाम्हां लै तिन्‍नैं खोज़अ द ज़ुंणी सह तेऊ का आसा शूणअ द। 4 आपणैं दिला-मन्‍नें साबै ज़ेभै परमेशरै च़ाहअ तेऊ दैनअ नछ़ैण, नुआहरै काम, च़मत्कार अर पबित्र आत्मों दान दैई एऊ उद्धारे समादो सबूत।

5 परमेशरै निं सह आजू एछणैं आल़अ संसार, ज़ेते बारै हाम्हैं लिखदै आसा लागै, तेतो हक निं तेऊ स्वर्ग दूता लै दैनअ पर सह दैनअ प्रभू ईशू लै। 6 पबित्र शास्त्रा दी आसा एकी ज़ैगा परमेशरा लै इहअ बोलअ द,

"कोहै मणछ निं एता जोगी आथी कि तूह तिन्‍नें बारै सोठे?

नां कुंण मणछो शोहरू एता जोगी आथी कि तूह तेऊए हेर-सभाल़ करे?

7 तंऐं बणाअं मणछ स्वर्ग दूता का धख ई होछ़अ,

तंऐं दैनअ तेऊ लै इज़त अर अदरो मुगट। तेऊ लै दैनअ तंऐं तेऊए हाथे कामां दी हक।

8 तंऐं दैनअ तेऊ लै सोभी गल्‍ला दी हक।"

इधी ज़ाण्हिंआं इहअ कि परमेशरै किई सोभै गल्‍ला मणछे बशै। एही निं किछ़ै गल्‍ला छ़ुटी ज़ुंण तिन्‍नें बशै निं किई। पर हाम्हां का शुझिआ आझ़ इहअ कि सोभै गल्‍ला निं मणछे बशै आथी।✝

9 पर हाम्हैं भाल़ा ईशू! सह किअ थोल़ी घल़ी स्वर्ग दूता का धख होछ़अ ताकि सह परमेशरे झींणा करै सह सोभिए तैणीं मरे। तेऊ ज़िरअ दुख अर सह मूंअ, अर तेऊ लै दैनअ प्रतप्प अर अदरो मुगट। 10 परमेशरै बणाईं सोभै गल्‍ला अर सोभै गल्‍ला डाही तेऊ आप्पू लै ज़िऊंदी। एता लै किअ परमेशरै इहअ बच़ार कि प्रभू ईशू दुख ज़िरे अर सोभी गल्‍ला दी सिध्द होए ताकि खास्सै मणछ तेऊए प्रतप्पा दी साझ़ू होए। किल्हैकि सह आसा ईशू ई ज़ुंण तिन्‍नां लै उद्धार सका दैई।

11 किल्हैकि ज़ुंण पाप दूर करी पबित्र करा अर ज़ुंण पापा का छ़ुटी पबित्र हुऐ, तिन्‍नां सोभिओ बाब आसा एक्‍कै ई, तैही निं ईशू तिन्‍नां लै आपणैं भाई अर बैहणी बोल़णा लै शरम लागदी। 12 मसीहा बोला परमेशरा लै एते बारै इहअ,✝

"ज़ुंण तंऐं किअ, मुंह खोज़णअ तेते बारै आपणैं सोभी लोगा का

मुंह तिन्‍नें सभा दी तेरी ज़ै-ज़ैकार।"

13 तेखअ बोला सह इहअ बी,✝

"मुंह डाहणअ ताह दी भरोस्सअ।"

तेखअ बोला सह भिई इहअ,

"हुंह आसा तिन्‍नां मणछा संघै ज़ुंण मुल्है परमेशरै दैनै, ईंयां आसा लान्हैं ज़िहै।"

14 ज़ै कि परमेशर ज़हा लै आपणैं लान्हैं बोला तिंयां बी आसा मणछ अर ईशू बी बणअ तिन्‍नां ई ज़िहअ मास्सा-लोहू आल़अ मणछ। राख्सा का आसा शगती कि मौते डअर रहैऊई करै डरैओए पर मसीहा बणअ मणछ एते तैणीं कि तेऊए मौत होए अर मौता हारी करै सह राख्से शगती खतम करे

15 अर ज़ेतरै मौतै डरा संघै सारी ज़िन्दगी गलामा ज़िहै तै, सह तिन्‍नां आज़ाद करे।✝

16 किल्हैकि प्रभू ईशू निं स्वर्ग दूते हेर-सभाल़ करदअ, पर सह करा आबरामे खिंबे हेर-सभाल़।✝

17 एते ई तैणीं लोल़ी त तेऊ कि सोभी गल्‍ला दी आपणैं होरी भाई-बैहणी ज़िहअ मणछ बणें, ज़िहअ करै सह परमेशरो इहअ माहा प्रोहत बणें ज़ुंण झणैल़ू अर शुचअ-पाक्‍कअ होए। ताकि ज़ुंण बल़ीदान तेऊ तिन्‍नां लै किअ तेता करै तिन्‍नें पाप माफ होए। 18 किल्हैकि सह परखअ अर तेऊ ज़िरअ दुख, तैही सका सह खरी दी पल़ै दै मणछे मज़त करी।