1 हाम्हां फेर आसा खास्सै मणछ ज़सरी ज़िन्दगी करै हाम्हां का थोघ लागा कि विश्वासो किज़ै मतलब हआ। तै एछा हरेक रोक्‍कणै आल़ी च़िज़ा अर उलझ़ण पाणै आल़ै पाप दूर करी ठुर्हा तैहा ठुर्हा दी सबर डाही करै ज़ेथ हाम्हां ठुहर्नअ लागा। 2 विश्वासा बणाणैं आल़ै अर सिध्द करनै आल़ै ईशू मसीहा दी डाहा आछी टकैल़ी। तेऊ आसा हाम्हां लै आजू खुशी डाही दी, तेता लै निं तेऊ लाज़ शरमें कोई बी परबाह किई अर क्रूसो दुख ज़िरी बेठअ परमेशरे राज़गाद्दी दी दैहणीं बाखा सोभी का बडी पदबी दी।✝

3 ईशूए बारै सोठा ज़ुंणी नफरत करनै आल़ै पापी लोगे हाथै सबर करी हर दाह-दुख ज़िरअ, ताकि तम्हैं आशा छ़ाडी हिम्मत नां हारे।

4 तम्हैं निं पापे खलाफ इहअ दुख ज़िरअ कि ज़िधी लोग तम्हां मारी पाए। 5 तम्हैं गऐ परमेशरे तिन्‍नां हैअ दैणैं आल़ै बैणा बिस्सरुई ज़ुंण तम्हां लै आपणैं लान्हैं हणें नातै आसा खोज़ै दै। सह बोला इहअ,

"हे मेरै लान्हैंआ, प्रभूए इना गल्‍ला दी दै धैन ज़ेभै सह ताल्है ऐहा गल्‍ला प्रगट करे कि तूह आसा गलत,

अर ज़ेभै सह ताह नैरदअ लागे तेभै निं हिम्मत छ़ाडी।

6 किल्हैकि प्रभू ज़हा संघै झ़ूरी करा, तेऊ दैआ नैरनीं बी,

ज़हा सह आपणअ शोहरू बणाआं; तेऊ लै बाहा शोठी बी।"

7 तम्हैं ज़िरा दुख सबक समझ़ी, परमेशर करा तम्हां संघै शोहरू समझ़ी बर्ताअ, इहअ कुंण शोहरू आसा, ज़हा तेऊओ बाब नैरदअ निं आथी?✝

8 ज़ै तम्हां बाब तिहअ नांईं नैरा ज़िहअ सह आपणैं होरी शोहरू नैरा, एतो मतलब आसा इहअ कि तम्हैं निं तेऊए असली शोहरू आथी तै आसा तम्हैं कहा होरीए लुआद।

9 तेखअ ज़ै म्हारअ संसारे देहीओ बाब बी हाम्हां नैरना लै शोठी च़का, अर हाम्हैं करा एता लै तिन्‍नों अदर। तै कै अह ठीक निं आथी कि हाम्हैं म्हारै स्वर्गै रहणैं आल़ै बाबे डरा हेठै रही ज़िऊंदै रहे।

10 संसारे बाबे शोठी, हआ हाम्हां नैरना लै सिधी थोल़ै धैल़ै ज़िहअ तिन्‍नां आपणैं साबै ठीक लागा, पर परमेशर च़का म्हारै फाईदे तैणीं हर बगत शोठी ताकि सह हाम्हां इहै पबित्र करे ज़िहअ सह पबित्र आसा। 11 ज़ेभै हाम्हां सज़ा भेटा सह निं हाम्हां तेभै ठीक लागदी, हाम्हैं हआ तेभै खास्सै दुखी पर तैबी ज़ुंण तेता ज़िरदी-ज़िरदी पाक्‍कै आसा गऐ दै हई, बादा का भेटा तिन्‍नां तेतो फल मेल़-ज़ोल़ अर धर्म।

12 एते तैणीं करा ढिलै हाथा अर दुबल़ै ज़ान्हूं आज़रै।✝

13 ओर्ही-पोर्ही भाल़ै निं लागा, आज़री बाता लागा हांढदै ज़ुंण ईशू सेटा लै डेओआ, ताकि ज़ुंण हाम्हां मांझ़ै आत्मां दी दुबल़ै आसा तिंयां निं लोल़ी कबाता पेठै पर तिन्‍नों विश्वास लोल़ी मज़बूत हुअ।✝

14 सोभी संघै डाहणअ मेल़-ज़ोल़, पबित्र ज़िन्दगी ज़िऊंणें कोशिश करनी, ज़ुंण पबित्र होए सह सका परमेशरा भाल़ी।✝

15 एकी-दुजैओ डाहा धैन, इहअ निं हआ कि कुंण परमेशरे जशा बाझ़ी एही रहे, या किज़ै विश्वास नांईं करनै ज़िहअ कल़ुअ ज़लैल़अ निखल़ी कष्ट दैए। कई आसा गऐ दै एऊ बिशा करै भ्रष्ट हई।✝

16 इहअ निं हआ कि कोई मणछ पापी होए, या ज़िहअ कदुष्ट आबरामो पोचअ एसाब थिअ, ज़ुंणी रोटी पिछ़ू आपणअ ज़ेठै हणें पदबी आपणैं भाऊ का बेच़ी पाई।✝

17 तम्हां का आसा ऐहा गल्‍लो थोघ कि बादा का ज़ांऊं तेऊ आपणैं बाबा का बर्गत लणी च़ाही, सह निं तेऊ भेटी, अर लेरा-पकारा पाई बी निं तेऊ ज़ेठै हणैंओ हक अर बर्गत पाणैओ मोक्‍कअ भेटअ।

18 तम्हैं निं इज़राईली मणछा ज़िहै तैहा सीनाई धारा सेटा आऐ, ज़ेता छ़ुंहीं सका तै, अर ज़ेथ आग ती लागी दी, ज़ेथ काल़ै बादल़ तै, न्हैरै अर ढिश-बागर ती। 19 तिन्‍नैं शूणीं नादे एही छ़ेल़ कि सह थिई एही डरैऊंणी कि तिन्‍नैं पाई परमेशरा सेटा लैल़ा पकारा कि ऐबै निं होर गल्‍ला करी आथी।✝

20 किल्हैकि तिन्‍नैं बोलअ इहअ एते तैणीं कि तिंयां निं एऊ हुकमा ज़िरी सकदै, "ज़ै कोई पशू बी तैहा धारा छ़ूंऐं; तेऊ बी पाऐ मारी" लोग तै डरै दै।✝

21 सह दर्शण त इहअ डरैऊंणअ कि मोसा बी बोलअ इहअ, "मुंह लागी डअर अर काम्मणीं।"✝

22 पर तम्हैं आऐ सियोने धारा ज़िधी स्वर्गो एरुशलेम आसा, ज़ुंण ज़िऊंदै परमेशरे नगरी आसा अर ज़िधी लाखों स्वर्ग दूत खुशीओ थैर मनाऊंआं। 23 तम्हैं आऐ परमेशरे सोभी ज़ेठै शोहरूए टोली दी ज़सरै नाअं स्वर्गै आसा लिखै दै। तिंयां आसा धर्मीं आत्मां ज़ुंण सिध्द आसा गऐ दै हई। तम्हैं आऐ परमेशरा सेटा ज़ुंण सोभी गल्‍लो नसाफ करा।

24 ✝तम्हैं आऐ ईशू सेटा, ज़ुंण मणछा अर परमेशरा मांझ़ै नऊंईं करारो खणोढी आसा अर मसीहो लोहू ज़ुंण पाप माफ करने बारै खोज़ा, सह निं आबले लोहू ज़िहअ नसाफ मांगदअ।

25 चतैन रहा अर परमेशरे गल्‍ला निं शूणीं नां शूणीं करी, किल्हैकि ज़ेभै इज़राईली मोसा गूरे गल्‍ला नांईं शूणीं, तिन्‍नां भेटी सज़ा, हाम्हैं बी निं स्वर्गा का चतैनगी दैणैं आल़ै परमेशरे गल्‍ला नांईं मनी सज़ा बच़ी सकदै। 26 ज़धू परमेशरै सीनाई धारा का गल्‍ला किई ती, तेऊए बोला करै हुई ती सारी पृथूई दी ज़ाज़री। पर ऐहा बारी आसा तेऊ इहअ बोलअ द कि पृथूई संघै हणीं सरगै बी ज़ाज़री।✝

27 अह गल्‍ल करा ऐहा गल्‍ला बाखा शारअ कि ज़ुंण बी च़िज़ा परमेशरै आसा बणाईं दी तेथ हणीं ज़ाज़री अर तिंयां हणीं खतम। पिछ़ू बच़णीं तिंयां ई च़िज़ा ज़ेथ कधि ज़ाज़री निं हणीं।✝

28 हाम्हां लागा परमेशरो शूकर करनअ कि हाम्हां लै आसा सह राज़ दैनअ द ज़ेथ कधि निं हणीं ज़ाज़री। एऊ राज़ा दी करा हाम्हैं परमेशरो अदर अर परमेशरा करा हाम्हैं स्तोती अर च़ाकरी करै खुश। 29 किल्हैकि म्हारअ परमेशर आसा भस्सम करनै आल़ी आगी ज़िहअ सह पाआ सोभी छ़ोतली च़िज़ा ज़ाल़ी।✝