1 बिधाता बोला इहअ, "ज़ेभै मुंह यहूदा मुल्ख अर

एरुशलेम नगरी भिई भरपूर करनै,

2 तेभै करनै मुंह सोभ देश कठा,

संघा पजैल़णैं मुंह जहोशापात खागै।

तिधी करनअ मुंह तेता लै तिन्‍नों नसाफ

ज़ुंण तिन्‍नैं मेरी परज़ा इज़राईली संघै किअ।

तिन्‍नैं दरल़ाऊई ती मेरी परज़ा देशा-देशा जैंदरी

अर मेरै देशै बी पाई ती तिन्‍नैं फूट।

3 तिन्‍नैं पाई मेरी परज़ा बांडणां लै परच़ी

कि मेरी परज़ा मांझ़ै कुंण ज़ण्हअ हणअ तिन्‍नों गलाम।

कंज़रैई करना अर नशिलै दाखे रसा लै बेच़ै तिन्‍नैं मेरी परज़ा मांझ़ै शोहरू-शोहरी।

4 ✝"सूर अर सदोन नगरीए लोगो! पलिश्ती देशे लोगो! तम्हैं मुल्है किज़ू करदै आसा लागै दै? तम्हैं कै मुल्है मेरै कामों बदल़अ लाअ दैई? ज़ै इहअ आसा, तै दैंऊं हुंह थारै कामों बदल़अ झ़ट च़ारै तम्हां लै बापस! 5 तम्हैं निंयं मेरअ सुन्‍नअ-च़ंदी अर मेरअ किम्मती खज़ानअ संघा डाही तिंयां च़िज़ा आपणैं कई देहुरै दी। 6 तम्हैं किऐ यहूदा मुल्ख अर एरुशलेम नगरीए लोग तिन्‍नें आपणैं देशा का दूर संघा बेच़ै यूनानी* लोगा का। 7 ज़ेथ-ज़ेथ देशै तम्हैं तिंयां बेच़ै दै आसा, ऐबै लाऐ मंऐं तिंयां तेता का बापस आणी। ज़िहअ तम्हैं मेरी परज़ा लै किअ, तिहअ ई लाअ मंऐं ऐबै तम्हां लै करी। 8 थारै शोहरू-शोहरी पाणै मुंह यहूदा मुल्खे लोगा का बेच़ी। तिन्‍नां पाणै तिंयां सदूर देशे लोगा का बेच़ी ज़ुंण खास्सअ दूर आसा। अह गल्‍ल डाही मंऐं बिधाता बोली।✝

9 देशा-देशा का खोज़ा इहअ समाद,

‘जुधा लै तैर्हिआ, जोधै लै पाआ हाक्‍का,

आपणीं सारी सैना झाल़ा संघा लागा जुधा लै हांढदै!

10 ✝आपणैं हल़े लुहाल़ा गाल़ी बणाआं तलबारा,

दाची गाल़ी करै बणाआं बर्छ़ै, बाख दुबल़अ मणछ बी बोलै,

"हुंह आसा जोधअ।"’

11 फेर-फिरदै देशो! छ़ेक्‍कै एछा,

तेऊ खागै हआ कठा।"

बिधाता, आपणैं जोधै छ़ाड तिधा लै!

12 बिधाता बोला इहअ, "देशा-देशे मणछो, उझ़िआ,

संघा डेओआ जहोशापात खागा लै।

तिधी हणअ हुंह बिधाता नसाफ करदअ बेठअ द।

मुंह करनअ तिधी फेर-फिरदै सोभी देशो नसाफ।

13 तिंयां आसा खास्सै कदुष्ट,

तिन्‍नां काटा धरनीं ज़िहअ फसल पाक्‍की करै नाज़ दाची करै लऊआ।

तिन्‍नां पिल्‍ला कोफरी दाखा ज़िहै ज़ेभै तैणीं दाखा का रस पठी निं निखल़अ।"✝

14 फैंसलै करने खागै आसा हज़ारो-लाखों लोग झाल़्हुऐ दै!

तिंयां आसा तिधी आऐ दै कि सह धैल़ी गई एछी

ज़ेभै बिधाता नसाफ करनअ।

15 तेभै फिरनैं सुरज़ अर ज़ोथ न्हैरै,

अर तारैओ झ़ामण मुक्‍कणअ पठी।

16 ✝बिधाता पाणीं सियोन धारा का क्रुंगा,

एरुशलेम नगरी का शुण्हनै तेऊए बोल गुल़ूबिज़ल़ू ज़िहै।

तेता करै हणीं सारै भ्रमंडै ज़ाज़री, पर बिधाता करनी

आपणीं परज़े फाज़त, सह हणअ तिन्‍नां लै उछ़टै गहल़ा ज़िहअ

ज़ेथ पिछ़ू इज़राईली शरण लआ।

17 बिधाता बोला इहअ, "तेखअ लागणअ तम्हां इज़राईली का थोघ कि

हुंह आसा बिधाता ज़ुंण थारअ परमेशर आसा।

हुंह रहा आपणीं पबित्र सियोन धारा।

एरुशलेम हणीं पबित्र नगरी अर एथ निं ऐबै कधि परदेसीओ कबज़अ हणअ।

18 तेऊ ज़मानै हणीं धारा दाखे बागा करै भरी,

धारठी हणीं हर ज़ैगा गाऊई, अर पाणीं हणअ यहूदा मुल्खै बतेर्हअ।

बिधाते भबना का निखल़णीं गाड अर

तेता करै दैणअ शितीम खागै पाणीं।

19 मिसर देश हणअ शुन्‍नअ रेगीस्तान,

एदोम देश हणअ पठी उज़र, किल्हैकि

तिंयां पल़ै तै यहूदा मुल्खा लै चुटी अर

तिन्‍नैं किई ती नर्दोश मणछे हत्या।

20 यहूदा मुल्ख रहणअ सदा आबाद,

एरुशलेम नगरी रहणीं मेरी परज़ा पोस्ती दर पोस्ती सदा।

21 ज़ुंणीं-ज़ुंणी देशै तिन्‍नें हत्या किई,

तिन्‍नां का लणअ मुंह ज़रूर बदल़अ।

तिन्‍नें हत्या करनैओ पाप निं हुंह माफ करदअ।

मुंह बिधाता बस्सणअ सियोन धारा।"