1 "प्रोहतो, ऐबै शूणां मेरी गल्‍ल धैन दैई! 2 तम्हां लै आसा इहअ ई भलअ कि तम्हैं मेरै नाओंए कदर करे। नांईं ता मुंह स्वर्गे सारी सैने मालक बिधाता करनअ इहअ कि ज़ुंण च़िज़ा तम्हां मेरी बर्गता करै आसा भेटी दी, तेता लै दैणअ मुंह फिटक। मेरअ फिटक आसा तम्हां लै लागी गअ द, किल्हैकि तम्हैं निं मेरअ अदर करदै ज़िहअ किअ लोल़ी। 3 तम्हां पिछ़ू दैणीं मुंह थारी आद-लुआदा लै सज़ा अर थारै मुंहैं छ़िट्टणैं मुंह थारै तिन्‍नां पशूए शेदू करै ज़ेता तम्हैं तिह-थैरे धैल़ी मुल्है हूम करना लै आणा। तम्हैं शोटणै मुंह शेदू ई संघै पोर्ही। 4 तेखअ एछणी तम्हां समझ़ हुंह स्वर्गे सारी सैनो मालक बिधाता आसा तम्हां लै एते तैणीं बोल्दअ लागअ द कि मेरी करार ज़ुंण मंऐं लेबीए आद-लुआद प्रोहता संघै आसा किई दी, सह नांईं चुटे।

5 "लेबी संघै ज़ुंण मेरी करार हुई ती, तेथ ती मंऐं तेऊ अर आजू तेऊए आद लुआदा लै ज़िन्दगी अर बर्गत दैणीं किई दी। मंऐं किअ बी तिहअ ई ज़ेही मंऐं ज़बान ती दैनी ती, ताकि तिंयां मेरअ अदर करे। तिन्‍नैं बी किअ मेरअ अदर अर मेरी च़ाकरी ज़िहअ प्रोहतै किअ लोल़ी। 6 तिन्‍नैं दैनी लोगा का सत्त ई, गलत शिक्षा निं तिन्‍नैं दैनी ई आथी। तिंयां ज़िऊआ तै धर्म अर मेल़-ज़ोल़े ज़िन्दगी ज़ेही हुंह च़ाहा तेही। तिन्‍नैं बदल़ी खास्सै लोगे सोर अर तिहअ करै छ़ाडअ लोगै पाप करनअ।

7 "अह आसा प्रोहते ज़िम्मैंबारी कि तिंयां मुंह बिधाते बारै सत्त खोज़े। लोगा लागा प्रोहता सेटा डेऊई पुछ़णअ कि हुंह बिधाता किज़ै च़ाहा। किल्हैकि मंऐं स्वर्गे सारी सैने मालक बिधाता आसा तिंयां आपणअ समाद खोज़णा लै दूत छ़ांटै दै। 8 पर तम्हैं प्रोहतै आसा मुंह बाखा पिठ डाही दी फरेऊई, थारी शिक्षा कराऊआ होरी लोगा का बी पाप। तम्हैं पाई सह करार चोल़ी ज़ुंण मंऐं थारै दाद-बाब लेबी संघै आसा ती किई दी। 9 तैही दैनअ मंऐं इहअ हणैं कि इज़राईली परज़ा तम्हां बेइज़त करे किल्हैकि तम्हैं निं मेरै बधाने साबै ज़िन्दगी ज़िऊई अर नां तम्हैं सोभी लोगा संघै एक बराबर बभार करदै ज़िहअ मेरअ बधान चतैनगी दैआ।"

10 तम्हां सोभी का आसा थोघ कि हाम्हां सोभिओ आसा एक्‍कै बाब। सह आसा परमेशर आप्पै ज़ुंणीं हाम्हैं सोभै आसा बणाऐं दै। तै किल्है करा हाम्हैं एकी दुजै लै धोखअ? तै किल्है निं हाम्हैं तैहा करारे इज़त करदै ज़ुंण परमेशरै म्हारै दादा-बाबा संघै आसा किई दी?

11 यहूदा मुल्ख अर एरुशलेम नगरीए परज़ा आसा परमेशरा का दूर हुऐ दै। लोग आसा एरुशलेम नगरी अर इज़राईल देशै च़िल़्हखरै कामां करदै लागै दै। तम्हैं लाई पबित्र ज़ैगा छ़ोत, तेऊ भबना दी ज़ेता लै बिधाता झ़ूरा। मर्ध बैहुऐ तिन्‍नां बेटल़ी संघै ज़ुंण परदेसी देअए पूज़ा करा। 12 मेरी आसा बिधाता का एही अरज़ कि सह इहै कामां करनै आल़ै मणछा यहूदा मुल्खा का दूर करे। तिन्‍नां मांझ़ै निं एक बी याकबे खिंबा संघै लोल़ी रहअ अर नां तिंयां स्वर्गे सारी सैने मालक बिधाता लै भैंट दैणैं जोगी लोल़ी रहै।

13 एक नुक्श आसा तम्हां इज़राईली दी होर। तम्हैं लाआ बिधाते बेदी सेटा खल़्हुई ज़ोरै बिधाता सेटा लेरा। किल्हैकि सह निं थारै भैंट अर बल़ीदान मंदअ ज़ुंण तम्हैं तेऊ सेटा लै आणै अर सह निं तेता करै खुश हंदअ। 14 तम्हैं पुछ़ा इहअ, "ऐबै बिधाता म्हारी भैंट अर बल़ीदाना करै किल्है निं खुश हंदअ?" ऐबै शूणां! बिधाता का आसा थोघ कि तम्हैं मर्धै निं आपणीं बेटल़ी संघै भलअ किअ। ज़ेभै तम्हैं ज़ुआनी दी बैह किअ, तेभै तै तम्हैं आपणीं बेटल़ीओ सारी अमरा धैन-खैल डाहणें बच़न दैनै दै। पर ऐबै करा तम्हैं तिन्‍नां संघै विश्वास घात ज़ै कि बैहे बच़णे साबै आसा ती तिंयां थारी सारी ज़िन्दगी साथी।

15 तम्हैं बिधाता बैहे बधाना करै मर्ध-बेटल़ी एक देही हणां लै निं आथी बणाऐं दै? थारी देही अर आत्मां आसा दुहै बिधाते। तै किज़ू लै किऐ बिधाता तम्हैं कठा? सह च़ाहा इहअ कि थारी लुआद होए अर तिंयां बी बिधाता लै होए। तैही सोठा राम्बल़ै करै कि तम्हैं केही ज़िन्दगी ज़िऊआ। तम्हैं निं आपणीं बेटल़ी संघै विश्वास घात करी ज़हा संघै भर ज़ुआनी थारअ बैह आसा हुअ द।

16 इज़राईलो परमेशर बिधाता बोला इहअ, "इहै नर्दैई कामां का करा हुंह नफरत ज़ेभै कुंण आपणीं बेटल़ी छ़ाडी दैआ! हुंह स्वर्गे सारी सैनो मालक बिधाता बोला तम्हां लै इहअ, ‘ऐहा गल्‍ला डाहै आद, आपणैं बैहे बच़न निं चोल़ी, आपणीं बेटल़ी संघै विश्वास घात करदै निं लागी।’

17 "प्रोहतो! तम्हैं फरेऊअ आपणीं गल्‍ला करै बिधाता का रुंज़ू।

"तज़ी बी बोलअ तम्हैं इहअ, ‘सह किल्है रुंझ़ुअ हाम्हां का?’

"तम्हैं फरेऊअ बिधाता लै इहअ बोली रुंज़ू, ‘ज़ुंण बूरअ करा बिधाता समझ़ा तेऊ भलअ! सह हआ बूरै करना लै खुश!’

"अर इहअ पुछ़ी, ‘नसाफ करनै आल़अ परमेशर किधी आसा?’"