नसाफ करने धैल़ी
1 "सह महान धैल़ी ज़ेभै मुंह बिधाता संसारे लोगो नसाफ करदै एछणअ, सह एछणी ज़रूर। सज़ा एछणी आगीए दरैऊआ ज़ेही अर आग भकी दी भठी ज़ेही। कदुष्ट काम करनै आल़ै घमंडी मणछ हणैं तेता करै खतम। तिंयां करनै इहै खतम ज़ेही आग शुक्कै घाहा दहा। तेखअ निं किछ़ बच़णअ।
2 "पर ज़ुंण मेरअ अदर करा, तिन्नां लै निं इहअ हणअ। तम्हां बच़ाऊंणे मेरी शगती निखल़णीं तम्हां लै सुरज़ा ज़ेही अर तेते धुप्पै करै हणैं तम्हैं नरोगै। तम्हैं हणैं आज़ाद अर खुश ज़िहअ खुढे गल़ैऊंडी का खोल्हअ द बाछ़ू पटिक्कल़ै दैआ। 3 ज़ेभै मुंह नसाफ करदै एछणअ, तम्हां झेचणैं कदुष्ट मणछ आपणैं खूरा हेठै, तिंयां हणैं थारै खूरा हेठै छ़ारा ज़िहै। अह डाहअ मंऐं बिधाता बोली ज़ुंण स्वर्गे सारी सैनो मालक आसा।
4 "ज़ुंण बधान मंऐं मेरै दास मोसा का होरेब धारा सोभी इज़राईली लै दैनअ त, तेते बिधी अर हुकम करा आद।
5 "भाल़ा! मुंह बिधाता छ़ाडणअ तैहा घोर डरैऊंणी अर खरीए धैल़ी एछणैं का आजी आपणअ गूर एलियाह तम्हां सेटा लै। 6 तेऊ करनअ बाबा अर शोहरू दी मेल़-ज़ोल़, ताकि सोभ मणछ प्राश्त करे। इहअ निं हआ कि हुंह पृथूई दी एछूं अर सोभिओ बनाश करूं।"