1 ✝अह समाद खोज़अ तेऊ ज़मानै बिधाता बेरीए शोहरू होशे का, ज़धू यहूदा मुल्खै उज़ियाह, जताम, अहाज अर हिजकिया राज़ किअ अर इज़राईल मुल्खै थिअ जोआशो शोहरू जरोबाम राज़अ।✝

2 ज़धू पैहली बारी बिधाता आपणैं गूर होशे का इज़राईला लै समाद खोज़अ, तधू बोलअ बिधाता इहअ, "तूह डेऊ संघा कर कंज़री बेटल़ी संघै बैह, तेसे लुआद बी हणीं ज़ेही सह आसा तेही ई। सह हणअ ज़ाथी तिहअ ई ज़िहअ मेरी परज़ा मुल्है विश्वास घात किअ। मुंह बिधाता का दूर हई लागै तिंयां होरी देअए च़ाकरी करदै।"

3 होशे किअ गोमेर नाओंए बेटल़ी संघै बैह। तेसे बाबा नाअं त दिबलाम। गोमेर हुई सुंदी अर तैहा का हुअ होशे लै एक शोहरू। 4 बिधाता बोलअ होशे लै, "एऊ नाअं डाह तूह, ‘जज्रेल,’ किल्हैकि थोल़ै धैल़ै बाद दैणीं मुंह जज्रेल खागै राज़ै ज़ैऊए खिंबा लै सज़ा। किल्हैकि राज़ै ज़ैऊ किई ती तिधी खास्सै लोगे हत्या। मंऐं लाअ इज़राईल देश खतम करी।✝ 5 तेभै करनअ मुंह जज्रेल खागै इज़राईले सैनो बल पठी खतम।"

6 बादा का हुई गोमेर भिई सुंदी अर तेसे हुई एक शोहरी। बिधाता बोलअ होशे लै, "ऐहा शोहरी नाअं डाह, ‘कपैरी*,’ किल्हैकि ऐबै निं हुंह मेरी इज़राईली परज़ा लै झ़ूरदअ अर नां तिन्‍नां लै माफी छ़ाडदअ। 7 पर यहूदा मुल्खे मेरी परज़ा संघै रहणीं मेरी झ़ूरी बरकरार। तिंयां बच़ाऊंणै मुंह तिन्‍नें दुशमणा का। तेता लै निं तिन्‍नें सैना हणीं ज़ुंण कतीर-कबाणा अर तलबारा करै जुध करा, नां एता लै तिन्‍नें सैना हणीं ज़ुंण रथ अर घोल़ै प्रैंदै बेशी जुध करा। पर तिंयां बच़ाऊंणै मुंह तिन्‍नें बिधाता आपणैं ज़ोरै।"

8 ज़ांऊं गोमेर कपैरी का च़ूई चल़ाऊई मुक्‍की, सह हुई भिई सुंदी अर तेसो हुअ एक होर शोहरू। 9 बिधाता बोलअ होशे लै, "एऊ शोहरू नाअं डाह, ‘परज़ात*,’ किल्हैकि इज़राईली निं ऐबै मेरी आपणीं परज़ा आथी अर नां हुंह तिन्‍नों परमेशर आथी।

10 "पर तज़ी बी हणैं आजू इज़राईली समुंदरे रेता ज़िहै इहै खास्सै कि तिन्‍नां निं कुंण गणी सकदअ। एभै बोला हुंह तिन्‍नां लै, ‘तम्हैं निं मेरी परज़ा आथी।’ पर तेभै बोल़णअ तिन्‍नां लै, ‘तम्हैं आसा ज़िऊंदै परमेशरे लुआद।’✝ 11 यहूदा अर इज़राईल दुही मुल्खै बस्सै दै इज़राईली हणैं भिई एक। तिन्‍नां छ़ांटणअ आप्पू लै एक्‍कै राज़अ अर तेखअ फिरनैं तिंयां आपणीं ऐहा ज़ैगा लै बापस कि इधी बस्से। जज्रेले सह धैल़ी हणीं महान!