1 इज़राईली आसा च़ुंढुई दी दाखे बेला ज़िहै ज़ेथ खास्सै दाखे लुम्बरू आसा लागै दै। ज़िहै ई तिंयां खास्सै सेठ हुऐ, तिन्‍नैं बणाईं होर बी खास्सी बेदी। ज़ेही तिन्‍नें ज़िम्मीं का खास्सी साल-फसल लागी हंदी, तिहै ई लागै तिंयां पूज़ा करना लै पात्थरे ओडै बणाऊंदै। 2 तिन्‍नों मन्‍न च़ला दोहरअ, ऐबै लागणीं तिन्‍नां आपणैं पापे सज़ा भुगतणी। परमेशरा पाणीं तिन्‍नें बेदी ढोल़ी अर तिन्‍नें पूज़ा करने ओडै फाल़ी।

3 तेखअ बोल़णअ ऐबै इना लोगा इहअ, "म्हारअ निं कोह राज़अ आथी अर तैही निं हाम्हैं बिधातो अदर किअ। ज़ै म्हारै राज़अ हंदअ बी, सह बी निं म्हारी किछ़ मज़त करी सकदअ त!" 4 तिंयां दैआ ज़बान पर आपणीं ज़बान निं तिंयां पूरी करदै अर तिंयां करा बृथा करार। इहअ करै हआ नसाफे बाहै दै खेचै लागै दै झ़रीलै घाहा ज़ेही बेनसाफी।

5 राज़धानी सामरी नगरी बस्सै दै लोगा लागणीं डअर। तिन्‍नां करनअ सुन्‍नें बाछ़ू ज़ांऐं हणां लै शोग ज़ुंण बेताबेन नगरी आसा। तैहा बाछ़ूए मुहुर्तीए च़ाकरी करनै आल़ै प्रोहता बी लाणीं लेरा। तिन्‍नैं हेरअ ज़ाणीं कि दुशमणा निंणीं तिन्‍नें सुन्‍नें शोभली मुहुर्ती तिन्‍नां का दूर। 6 सह बाछ़ूए मुहुर्ती निंणीं अश्शूरी सैना। सह करनी तिन्‍नां अश्शूरी माहा राज़ै लै भैंट। एप्रैमी लोगै ज़ुंण सलाह मनी, तिंयां हणैं तेता लै बेइज़त अर शर्मिंदै। 7 सामरी नगरीए लोग अर तिन्‍नों राज़अ निंणै ज़िहअ गाडो पाणीं होछ़ै ज़िहै शेटू निंयां। 8 उझै धारा पाप करने बेदी ज़ेथ इज़राईली मुहुर्तीए पूज़ा करा, तिंयां पाणीं ढोल़ी अर तेथ लागणै झ़िंझ़रै कांडै अर बाण-भेखल़। लोगा बोल़णअ धारा लै इहअ, "हाम्हां प्रैंदै ढूल़ा!" अर ढेक्‍का लै बोल़णअ इहअ, "हाम्हां डाहा दाबी!"✝

9 बिधाता बोला इहअ, "इज़राईलीओ, तम्हैं आसा आझ़ बी तिहै ई पाप करदै लागै दै ज़िहअ थारै दादै-बाबै गिबा नगरी किअ त। गिबा ज़ुंणीं पाप किअ थिअ, तेतो फल भेटअ तिन्‍नां इहअ कि तिंयां हुऐ जुधा दी खतम।✝ 10 ज़ेभै मेरअ दिल बोले, मुंह दैणीं तिन्‍नां लै सज़ा ज़ुंण पापी आसा। तिन्‍नां लै करनअ देशा-देशा एक्‍कअ अर तिन्‍नां भेटणीं तेते सज़ा ज़ुंण तिन्‍नैं पाप किऐ।

11 "एप्रैम त तैहा बाछ़ी ज़िहअ ज़ुंण मंऐं खहल़ै नाज़ा मांडणा लै थिई शखैल़ी दी, सह झ़ूरा ती खहल़ै फिरना लै। पर ऐबै सोठअ मंऐं इहअ कि तेसे ल्हाशै कैल़ै पाणअ मुंह जूँ। यहूदा ज़ुंडणअ मुंह हल़ै अर याकबा करै दैणअ ददाल़।"

12 मंऐं बोलअ त इहअ, "कृषाणा ज़िहअ बऊआ राम्बल़अ बेज़अ धर्म अर नसाफ। तै झाल़णीं तम्हां सह फसल ज़ुंण शुची झ़ूरी आसा। थारै दिल आसा शणैहतै खेचा ज़िहै, तेथ लाआ हल़। अह आसा तम्हां लै बिधाता सेटा बापस फिरनेओ बगत कि सह एछे अर तम्हां लै आपणीं बर्गते बरसात करे।"✝ 13 पर तम्हैं लाअ हल़ संघा डाहै कदुष्ट काम बऊई अर तम्हैं झाल़ी तिन्‍नां ई पापे फसल। तम्हैं भुगतअ थारै धोखै दी रहणैंओ नतिज़अ।

किल्हैकि तम्हैं तै आपणैं रथ-घोल़े आसरै रहै दै। तम्हैं सोठअ इहअ कि थारी बडी सैना अर तेता करै जाणैं तम्हैं बच़ी। 14 तम्हां जाणअ छ़ेक्‍कै जुधो हाल्‍लअ-गोल्‍लअ शुण्हुंई। दुशमणा पाणै थारै बडै-बडै गहल़-कोट ढोल़ी, ज़िहै राज़ै शालमाने सैना बेथ-अरबेल नगरीओ बनाश किअ त। तेऊ जुधा लै पाई ती तेऊए नर्दैई सैना माआ तिन्‍नें होछ़ै शोहरू संघी मारी। 15 बेतेल नगरीए लोगो, ज़ुंण तम्हैं घोर कदुष्ट काम किऐ, तेता पिछ़ू हणीं थारी बी एही ई दशा। ज़ेभै सह सज़ा दैणें धैल़ी एछणी, इज़राईल देशो राज़अ पाणअ मारी।