Romanos 2

परमेशरो नसाफ

1 तूह समझ़ इहअ कि तूह सका होरी लै दोश लाई, पर ज़ुंण तूह होरी लै दोश लाआ, तूह निं एते बारै किछ़ै बोली सकदअ। ज़हा गल्‍ला दी तूह होरी लै दोश लाआ, तैहा ई गल्‍ला दी हणअ तुबी दोशी। ज़िहअ दोश तूह लाआ, तूह करा आप्पू बी तेऊ ई कामां। 2 हाम्हां का आसा थोघ कि इहै कामां करनै आल़ै लै दैआ परमेशर शुचअ नसाफ करी सज़ा दैणैंओ हुकम।

3 तूह ज़ुंण इना इहै कामां करनै आल़ै लै दोश लाआ, अर आप्पू बी करा तिहै ई काम, ताखा इहअ थोघ बी आसा कि तूह निं परमेशरे सज़ा का बच़ी सकदअ। 4 कै तूह परमेशरे झींण, ज़िरने शगती अर सबर रुपी ज़ैदाता बृथा समझ़ा? तूह इहअ निं समझ़दअ कि परमेशरे झींण सखाऊआ ताखा पापो प्राश्त करनअ अर पाप करनअ छ़ाडी परमेशरा बाखा फिरनअ?

5 पर तूह हुअ होर बी काठअ अर तंऐं निं पाप करनअ छ़ाडअ, तूह आसा आप्पू लै घोर सज़ा कठा करदअ लागअ द ज़ेभै परमेशरा आपणअ रोश्श रहैऊंणअ अर ज़हा धैल़ी परमेशरा शुचअ नसाफ करनअ। 6 परमेशरा दैणअ सोभी लै तिन्‍नें कामां भाल़ी तिन्‍नां लै बदल़अ।✝2:6 भज. 62:12; सैणीं. 24:12

7 ज़ुंण भलै कामां दी टेक्‍की रहे, अर प्रतप्प, अदर अर ज़िन्दगीए लोल़-तोप करदअ होए, तिन्‍नां लै दैणीं परमेशरा सदा रहणैं आल़ी ज़िन्दगी।

8 पर ज़ुंण सिधअ आपणैं ई बारै सोठणैं आल़अ, ज़ुंण सत्त नांईं मंदअ अर ज़ुंण कदुष्ट काम करा, तिन्‍नां लै एछणी परमेशरा रोश्शै अर तिन्‍नां लै दैणीं घोर सज़ा। 9 दुख-सांगट एछणअ तिन्‍नां सोभी मणछा लै, ज़हा कदुष्ट कामां करनैओ भैस्स आसा पल़अ द, परमेशरा करनअ पैहलै यहूदी मणछो नसाफ अर तेखअ करनअ तिन्‍नों नसाफ ज़ुंण यहूदी निं आथी। 10 पर प्रतप्प, अदर अर शांतीए आत्मां भेटणीं तिन्‍नां, ज़हा भलै कामां करनैओ भैस्स आसा पल़अ द, पैहलै यहूदी लै तेखअ तिन्‍नां ज़ुंण यहूदी निं आथी। 11 किल्हैकि परमेशर निं कोही लै पक्षपात करदअ।✝2:11 बधा. 10:17; 2 इति. 19:7

12 होरी ज़ातीए मणछा का निं परमेशरो बधान आथी ज़ुंण तेऊ मोसा का दैनअ। ज़ै होरी ज़ातीए मणछ पाप करे, परमेशरा दैणीं तिन्‍नां लै सज़ा पर, तिन्‍नों नसाफ निं तेऊ बधाने साबै हणअ। पर यहूदी का आसा बिधातो बधान, ज़ै यहूदी पाप करे, तिन्‍नों नसाफ हणअ बधाने साबै। तिन्‍नां लै खोज़णअ बधाना कि तिन्‍नैं किअ पाप।

13 किल्हैकि परमेशरा सेटा निं मोसा गूरे बधान शुणनै आल़ै धर्मीं आथी, पर तिंयां हणैं धर्मीं ज़ुंण परमेशरे बधाने साबै ज़िन्दगी काटे। 14 होरी ज़ातीए मणछ ज़हा का परमेशरो बधान निं आथी, तिंयां सका आपणैं साबै तेही ज़िन्दगी ज़िऊई ज़िहअ बधान बोला। एऊ साबै रहैऊआ तिंयां ऐहा गल्‍ला कि मोसा गूरे बधानो थोघ नांईं हंदी बी आसा बधान तिन्‍नें मन्‍नैं।

15 तिंयां भाल़ा बधाने गल्‍ला आपणैं दिला दी लिखी दी अर सोर-समझ़ बी दैआ शाजत अर तिन्‍नों फिकर बी लाआ आप्पू मांझ़ै दोश या बणाआं तिन्‍नां नर्दोश। 16 अह आसा सह खुशीओ समाद ज़हा हुंह खोज़ा कि सह धैल़ी आसा एछणैं आल़ी ज़ेभै मसीहा ईशू करै परमेशरा सोभिए गुप्त गल्‍लो नसाफ करनअ।

यहूदी अर बधान

17 मंऐं लाई इधी थोल़ी ज़ेही गल्‍ला तम्हां मांझ़ै ज़ुंण यहूदी आसा तिन्‍नां लै लिखी, तम्हैं मना ऐहा गल्‍ला कि परमेशरा बच़ाऊंणै तम्हैं किल्हैकि तम्हां का आसा तेऊ बधानो थोघ ज़ुंण परमेशरै मोसा लै दैनअ। तम्हैं समझ़ा आप्पू लै ऐहा गल्‍ले बड़ैई कि तम्हैं आसा परमेशरे खास। 18 ताखा आसा थोघ कि परमेशर किज़ै च़ाहा। किल्हैकि ताखा आसा परमेशरे बधानो थोघ कि तिन्‍नां लै भलअ किज़ै आसा कि तिंयां करे। 19 ताह आसा आप्पू दी इहअ भरोस्सअ कि तूह सका होरी ज़ातीए लोगा का परमेशरे तेऊ सत्ता खोज़ी अर तिन्‍नां मणछा का सका बात रहैऊई ज़हा का परमेशरे बारै थोघ निं आथी। 20 तूह समझ़ा इहअ कि तूह आसा बेसमझ़ मणछा सखाऊंणै आल़अ अर शोहरू-माठै लै शिक्षा दैणैं आल़अ अर तूह समझ़ा इहअ कि मोसा गूरो बधान दैआ ताल्है पूरअ सत्त अर ज्ञैन।

21 तै किज़ै तूह सिधअ होरी का सखाऊआ, आप्पू निं शिखल़दअ? तूह कै च़ोरी नांईं करने शिक्षा दैआ? अर आप्पू करा तूह च़ोरी?✝2:21 मोत्त. 23:3

22 तूह ज़ुंण इहअ बोला कि कंज़रैई निं करनी, आप्पू ई करा तूह कंज़रैई? तूह ज़ुंण मुहुर्ती का नफरत करा, अर आप्पू लुटा तूह भबना बी? 23 तूह ज़ुंण शास्त्रे समझ़णें बारै दी घमंड करा, तूह कै बधान नांईं मनी परमेशरे खलाफ पाप निं करा? 24 किल्हैकि तम्हां पिछ़ू हआ होरी ज़ाती मांझ़ै बी परमेशरे निंदा, ज़िहअ शास्त्रा दी बी आसा लिखअ द,

25 "हुंह बोला तम्हां लै एही गल्‍ल, थारै खतैर करनैओ फाईदअ थिऐ ज़ै तम्हैं बधाना मने। पर ज़ै तम्हैं ज़िहअ बधान बोला तिहअ नांईं करे तै आसा तम्हैं खतैर किऐ दै यहूदी तिन्‍नां ई ज़िहै ज़ुंण यहूदी निं आथी अर ज़सरअ खतैर निं आथी हुअ द।"✝2:25 जेर. 4:4

26 ज़ै खतैर नांईं किअ द मणछ बधाने बिधी मने; सह कै खतैर नांईं किई दी दशा दी खतैर किऐ दै मणछा बराबर निं मनणअ? 27 खतैर नांईं किऐ दै मणछ ज़ुंण परमेशरो बधान मना तिंयां सका ताल्है दोश लाई। किल्हैकि तूह आसा यहूदी अर ताह आसा मोसा गूरो बधान भेटअ द अर तेरअ खतैर बी आसा हुअ द, पर ज़िहअ बधान बोला तिहअ निं तूह करदअ!

28 किल्हैकि इहअ निं आथी कि थारअ ज़ल्म आसा यहूदी मांझ़ै हुअ द या थारअ आसा देही दी खतैर हुअ द तै आसा तम्हैं असली यहूदी। 29 पर असली यहूदी आसा सह ई ज़ुंण मना का आसा अर खतैर आसा सह ई ज़ुंण दिला दी पबित्र आत्मां करै हआ, नां कि मोसा गूरे बधाना करै। इहै मणछे बड़ैई निं मणछा बाखा का हंदी पर तेऊए बड़ैई हआ परमेशरा बाखा का।✝2:29 फलि. 3:3