1,2 युसुफे बोलअ तेखअ दरोगै लै, "ज़ेतरी ज़िणस ईंयां निंईं सका इना लै दैआ तेतरी। इना सोभिए ढब्बै बी डाहै इने खाल्हल़ी दी, संघा डाहै सोभी का कान्हैं भाऊए खाल्हल़ी दी मेरअ च़ंदीओ प्रिहअ बी पाई।"

ज़िहअ युसुफै बोलअ, तेऊ दरोगै किअ तिहअ ई।

3 दुजै धैल़ै दोत्ती छ़ाडै तिंयां तिन्‍नें गाधै दी ज़िणस लादी करै घअरा लै।

4 ज़ेतरी तिंयां नगरी का बागै निखल़ै तेतरी छ़ाडअ युसुफै सह दरोगअ तिन्‍नां पिछ़ू इहअ बोली, "तिन्‍नां पिछ़ू डेऊ, तिन्‍नां ठिमकी करै बोलै तिन्‍नां लै, ‘तम्हैं आसा खरै मणछ! मेरै मालकै किई तम्हां लै एतरी भलाई अर तम्हैं पाअ तेऊओ च़ंदीओ प्रिहअ च़ोरी!

5 "‘सह प्रिहअ आसा सह ज़ेता का मेरअ मालक झुटा अर प्रिहै करै लाआ मेरअ मालक जोतष बी कि आजू किज़ै हणअ। अह किअ तम्हैं बेघै बडअ कशूर।’"

6 ज़ांऊं तेऊ दरोगै तिंयां ठिमकी हेरै, तेऊ बोलअ तिन्‍नां लै तिहअ ई ज़िहअ युसुफै तेऊ का खोज़ी त डाहअ द।

7 तिंयां लागै तेऊ लै बोल्दै, "म्हारै मालक, तूह इहअ किल्है बोला? हाम्हैं किल्है लाअ इहअ करी!

8 "ज़ै हाम्हैं तिहै हंदै, तै निं हाम्हां तिंयां ढब्बै बी कनान देशा का एछी बापस दैणैं तै ज़ुंण पिछ़ली बारी नाज़ा जैंदरी म्हारी खाल्हल़ी दी आऐ तै। एतरअ समझ़ तूह आप्पी बी कि हाम्हैं कै तेरै मालके घअरा का सुन्‍नैं-च़ंदीए च़िज़ा लाई च़ोरी?

9 "तूह दै हाम्हां का लोल़णी, ज़ै हाम्हां मांझ़ै कहा का तेरअ च़ंदीओ प्रिहअ भेटे, तेऊ पाऐ ज़ाथी तूह मारी बी, मालक! हाम्हैं होर करूं तेखअ तेरी गलामी।"

10 तेऊ बोलअ, "ठीक आसा, ज़िहअ तम्हैं बोलअ, हुंह करूं तिहअ ई, पर ज़हा का सह च़ंदीओ प्रिहअ भेटे, सह डाहणअ मुंह आपणअ गलाम, तम्हैं होर लागै तेखअ घअरा लै डेऊंदै।"

11 तेखअ थुआल़ी तिन्‍नैं गाधै प्रैंदा का लाद धरनीं संघा लागै आपणीं-आपणीं खाल्हल़ी खोल्हदै।

12 सह दरोगअ लागअ तेखअ बारी-बारी करै तिन्‍नें खाल्हल़ी दी लोल़अ। पैहलै भाल़अ तेऊ ज़ेठै भाई का, खिरी भेटअ सह च़ंदीओ प्रिहअ बिन्यामीने खाल्हल़ी भितरी नाज़ा जैंदरी।

13 तिंयां सोभै भरैर झाखुऐ तेखअ बेघै, तिंयां हुऐ एतरै दुखी कि तिन्‍नैं धेल़ै आपणैं झिकल़ै बी। तेखअ लादी तिन्‍नैं आपणीं खाल्हल़ी गाधै दी संघा डेऊऐ नगरी लै बापस फिरी।

14 यहूदा अर तिंयां सोभै भाई पुजै युसुफे मैहलै फिरी अर युसुफ थिअ तिधी, तिंयां पल़ै तेऊ सेटा उटी बाखा धरनीं।

15 युसुफ लागअ तेखअ तिन्‍नां लै बोल्दअ, "तम्हैं किल्है किअ इहअ काम? तम्हां का निं थोघै कि हुंह लाआ जोतष।"

16 यहूदा दैनअ ज़बाब, "मालक, हाम्हैं किज़ै सका ऐबै बोली? हाम्हैं किहअ करै खोज़मैं कि एथ निं म्हारअ किछ़ै कशूर आथी? ज़ुंण कशूर हाम्हैं किअ, अह भेटी हाम्हां तेते सज़ा। ज़हा का तेरअ च़ंदीओ प्रिहअ भेटअ अर हाम्हैं सोभै आसा ऐबै तेरै गलाम।"

17 युसुफ लागअ तिन्‍नां लै बोल्दअ, "हुंह निं तम्हां सोभी लै सज़ा दैंदअ। सिधअ सह आसा मेरअ गलाम ज़हा का मेरअ च़ंदीओ प्रिहअ भेटअ। तम्हैं होर डेओआ राज्ज़ी-राम्बल़ै आपणैं बाबा सेटा घअरा लै।"

18 यहूदा डेऊअ युसुफा नेल़ ज़िहअ संघा किई एही अरज़, "मालक, ताखा आसा मिसर देशे माहा राज़ै बराबर हक, हुंह आसा तेरअ गलाम। ज़ीबाण, मुल्है निं रोश्श आणी, मुंह दै एकी गल्‍ले अरज़ करनै।

19 "मेरै मालक, तंऐं पुछ़अ त भाल़ हाम्हां का, ‘थारअ बाब अज़ी बी ज़िऊंदअ आसा, तम्हैं होर केतरै भरैर आसा?’

20 "हाम्हैं बोलअ त तेऊ लै इहअ बी, ‘मालक, म्हारअ घअरै बाब, सह आसा खास्सअ प्रोढअ, तेऊए प्रोढी अमरा आसा म्हारअ सोभी का कान्हअ एक होर भाई, तेऊ का ज़ेठअ त तेऊओ एक सक्‍कअ भाई सह आसा ज़ांऐं गअ द हई, म्हारै बाबा लागा तेऊए बेघै झ़ूरी।’

21 "तंऐं बोलअ तेखअ हाम्हां लै इहअ, ‘तेऊ आणा मुंह सेटा लै, हुंह भाल़ूं।’

22 "म्हारै मालक, तधू बोलअ त भाल़ हाम्हैं इहअ, ‘सह शोहरू निं आपणैं बाबा छ़ाडी एछी सकदअ, नांईं ता बाब मरनअ तेऊ बाझ़ी।’

23 "तंऐं दैनी हाम्हां लै चतैनगी, ‘ज़ेभै तैणीं तम्हैं आपणअ कान्हअ भाऊ मुंह सेटा निं आणे, तेभै तैणीं निं मुखा आपणीं शकल रहैऊई।’

24 "मालक, खिरी खोज़ी हाम्हैं घअरै पुजी सारी गल्‍ला आपणैं बाबा का ज़ेही तंऐं बोली तेही ई।

25 "खास्सै धैल़ै बाद बोलअ तेखअ म्हारै बाबै हाम्हां लै, ‘ज़िणस च़ाल्‍ली मुक्‍की, मिसर देशा का एछा होर आणी।’

26 "हाम्हैं बोलअ इहअ, ‘हाम्हैं निं च़ाल्‍लै डेऊई। ज़ै लाअ तंऐं बिन्यामीन हाम्हां संघै छ़ाडी, तै च़ाल्‍लै हाम्हैं डेऊई, किल्हैकि ज़ै अह हाम्हां संघै नांईं होए तै निं हाम्हैं मिसर देशे माहा मंत्री सेटा डेऊई सकदै।’

27 "माहा राज़अ, तेखअ बोलअ म्हारै बाबै इहअ, ‘तम्हां का आसा थोघ कि मेरी पैरी लाल़ी राहेले हुऐ तै दूई शोहरू।

28 "‘एक ता गअ मुंह छ़ाडी डेऊई, सह धेल़अ-च़िरअ बणें ज़ीबै, अर मुंह निं तेऊओ मुंह बी भेटअ भाल़णअ।

29 "‘हुंह हुअ ऐबै प्रोढअ, ऐबै ज़ै तम्हैं बिन्यामीना बी निंए अर बाता किज़ै एऊ संघै होए, एऊ दुखै हणीं मेरी मौत।’

30 "तैही आसा बिन्यामीनो हाम्हां संघै डेऊणअ ज़रूरी, म्हारअ बाब निं एऊ बाझ़ी रही सकदअ। 31 ज़ै तेऊ का बिन्यामीन हाम्हां संघै नांईं शुझिए, सह सका मरी बी।

32 "मंऐं आसा आपणैं बाबा लै एही ज़बान दैनी दी कि हुंह पजैल़ूं बिन्यामीना ताह सेटा राज्ज़ी-राम्बल़अ घअरै। ज़ै हुंह इहअ नांईं करे, हुंह हणअ सारी अमरा तेऊओ कशूरबार।

33 "मालक, तैही आसा मेरी ताखा अरज़, ज़ीबाण बिन्यामीना छ़ाड मेरै इना होरी भाई संघै घअरा लै, अर हुंह रहूं एऊए बदल़ै इधी तेरअ गलाम।

34 "ज़ै बिन्यामीन मुंह संघै नांईं होए, हुंह किहअ करै डेऊं आपणैं बाबा सम्हनै? एता करै ज़ुंण दुख मेरै बाबा लै पल़णअ, तेता निं हुंह भाल़ी सकदअ।"