1 याकब रहा त कनान देशै तैहा ई ज़ैगा ज़िधी तेऊओ बाब इसहाक रहा त, 2 याकबे सोभी टबरे बारै आसा एही गल्‍ला कि

याकबे शोहरू युसुफे अमर थिई सतारा साले, सह डेओआ त आपणैं भाई बिल्हा अर ज़िल्पे शोहरू संघै भेडा-बाकरीए हेल़्ही फुआल। पर सह खोज़ा त फुआला बणैं हुई दी आपणैं भाईए सारी शरारते बारै कबल्‍लअ आपणैं बाबा का।

3 इज़राईल झ़ूरा त होरी शोहरू का खास्सअ युसुफा लै, किल्हैकि सह हुअ त तेऊओ खास्सी प्रोढी अमरा। याकबै त युसुफा लै एक झिटबझिट्टअ च़ोल़अ सिऊंअ द।

4 युसुफे होरी भाई ज़ाणअ इहअ कि म्हारअ बाब झ़ूरा युसुफा लै हाम्हां का खास्सअ, एता पिछ़ू डाहा तै तिंयां तेऊ संघै ज़ीद अर तेखअ निं तिंयां तेऊ संघै राम्बल़ै करै गल्‍ला बी करदै।

5 एकी धैल़ै हुअ इहअ कि युसुफै खोज़अ तिन्‍नां का एक सुपनअ कि इहअ-इहअ हुअ, तेता बाद लागै तिन्‍नां तेऊए होर बी रोश्श।

6 युसुफै खोज़अ तिन्‍नां का इहअ, "शूणां भाल़ै मुंह किहअ सुपनअ हुअ, 7 मुखा शुझुअ इहअ कि हाम्हैं सोभै आसा खेचै पूल़ै बान्हदै लागै दै, तेखअ हुअ इहअ कि नच़ानक हुअ मेरअ पूल़अ आज़रअ खल़अ। संघा आऐ थारै पूल़ै मेरै पूल़ै फेर, संघा लागै ढाला करदै।"

8 तिन्‍नैं होरी बोलअ युसुफा लै, "तूह कै इहअ सोठा कि तूह च़ाल्‍लअ राज़अ बणी अर ताह करनअ हाम्हां प्रैंदै राज़?" युसुफे एऊ सुपनै खोज़णैं का बाद ज़िधूऐ तिंयां तेऊ संघै होर बी खास्सै।

9 थोल़ै धैल़ै बाद हुअ युसुफा एक होर सुपनअ, तेऊ बोलअ आपणैं होरी भाई का भिई, "शूणां भाल़ै मंऐं भाल़अ एक होर सुपनअ, मंऐं भाल़अ इहअ कि सुरज़, ज़ोथ अर गैरा तारै आसा मुल्है ढाला करदै लागै दै।"

10 ज़ांऊं अह सुपनअ तेऊ आपणैं बाबा का खोज़अ, तेऊए बाबा बी आई तेऊ लै रोश्शै संघा बोलअ इहअ, "एतो कै मतलब हुअ? तेरै ईज-बाब अर सोभै भाई कै ताह सेटा हणैं खल़ै कि संघा करनी तिन्‍नां ताल्है ढाल?"

11 युसुफे भाई, लागै तेऊ संघै ज़ीद-मिश करदै, पर तेऊए बाबै डाही ईंयां सुपनै हुई दी गल्‍ला आपणैं दिलै च़की।✝

12 एकी धैल़ै निंईं युसुफे होरी भाई शकेम नगरी बाखा भेडा-बाकरीए हेल़्ह च़राऊंणा लै। 13 इज़राईलै बोलअ युसुफा लै, "तूह डेऊ आपणैं होरी भाई सेटा लै, तिंयां आसा शकेम नेल़ भेडा-बाकरी च़ारदै लागै दै।"

युसुफै बोलअ, "हो, हुंह डेऊं तै।"

14 याकबै बोलअ तेऊ लै, "डेऊ, संघा दैऐ भाल़णीं कि तेरै होर भाई अर भेडा-बाकरीए हेल़्ह राम्बल़ै बी आसा। तेखअ खोज़ै बापस फिरी करै मुखा बी।" याकबै छ़ाडअ सह हेब्रोन खागा लै।

युसुफ पुजअ शकेम नगरी नेल़ 15 संघा लागअ सह तेस्सी सारै दी लोल़अ। एकी मणछै पुछ़अ तेऊ भाल़ी, "तूह किज़ै लोल़ा एथ?"

16 युसुफै बोलअ, "मेरै भाई आसा एसी किधी भेडा-बाकरी फुआल आऐ दै हुंह आसा तिन्‍नां लोल़अ लागअ द, तम्हैं किनी भाल़ै तिंयां किधी ऐ?"

17 तेऊ मणछै बोलअ, "एसी का आसा गऐ दै तिंयां कधू-धर डेऊई! मंऐं शूणैं तै तिंयां इहअ बोल्दै, ‘च़ाल्‍ला हाम्हां डेऊणअ दतान नगरी बाखा।’"

संघा लागअ युसुफ तिधा का हांढदअ, तेखअ पुजअ सह दतान। 18 तिधी पुजणैं का आजी हेरअ तिन्‍नैं होरी भाई युसुफ दूरा का एछदअ भाल़ी अर तिन्‍नैं बोलअ आप्पू मांझ़ै कि अह पाणअ हाम्हां मारी।

19 तिंयां लागै आप्पू मांझ़ै इहअ बोल्दै, "भाल़ा, सह सुपनै भाल़णैं आल़अ गअ एछी! 20 एछा ला, अह पाणअ हाम्हां किधी डुघी खात्ती दी संघा बोल़णअ घअरै हाम्हां इहअ कि सह पाअ बणें ज़ीबै खाई। तेखअ भाल़णअ हाम्हां बी हैनूं एऊओ सुपनअ किहअ करै हणअ सच्च़ी।"

21 रूबेनै हेरी ईंयां गल्‍ला शूणीं, सह च़ाहा त युसुफा तिन्‍नें हाथा का बच़ाऊंणअ तेऊ बोलअ तिन्‍नां लै, "होलो एऊ निं मारा आथी।"

22 तेखअ बोलअ रूबेनै इहअ, "एऊ निं मारा, नां एऊ च़िक्‍कदै लागा। एऊ डाहा शुन्‍नैं रेगीस्तानै शुक्‍कै कुहै दी पाई।" रूबेनै सोठअ इहअ कि अह काढणअ मुंह बादा का उझै संघा पजैल़णअ मुंह घअरै बाबा सेटा।

23 ज़ांऊं युसुफ तिन्‍नां नेल़ पुजअ, तिन्‍नैं खोल्हअ तेऊओ सह झिटबझिट्टअ च़ोल़अ पोर्ही 24 संघा पाअ सह एकी डुघै कुहै दी ज़ुंण पाणीं बाझ़ी शुक्‍कअ थिअ।

25 ज़ांऊं युसुफे तिंयां भाई रोटी खांदै बेठै, इशमाईली लोगे एक टोली आसा लागी दी गलादा बाखा एछदी। तिंयां लोग थिऐ आपणैं ऊँटा दी सैंट, सेल्हरअ, गंधरस, लादी करै मिसर देशा बाखा डेऊंदै लागै दै।

26 तिन्‍नां भाल़ी बोलअ यहूदा, "हाम्हां आपणैं भाई मारी अर एऊए ल्हासा च़ोरी डाही करै किज़ै च़ाल्‍लअ भेटी? 27 अह आसा म्हारअ ई भाऊ, आपणैं हाड-खिंबो, च़िक्‍कणै मारनै का पाणअ हाम्हां अह इना इशमाईली का बेच़ी।"

तिन्‍नैं होरी बी मनी तेऊए सह गल्‍ल।

28 ज़ांऊं तेस्सी बाती मिद्यानी बपारी इशमाईली डेऊऐ, युसुफे तिन्‍नैं भाई काढअ सह कुहै का उझै संघा पाअ तिन्‍नां का बिहा च़ंदीए* सिक्‍कै दी बेच़ी। तिन्‍नैं बपारी पजैल़अ युसुफ मिसर देशै। ✝

29 ज़ांऊं बादा का रूबेन तेऊ कुहै सेटा आअ, तेऊ भाल़अ कि युसुफ निं तिधी आथी, तेऊ किअ आपणैं झिकल़ै धेल़ी शोग संघा लागअ लेरा लांदअ।

30 तेखअ डेऊअ सह तिन्‍नां होरी भाई सेटा संघा पुछ़अ, "युसुफ निं कुहै दी आथी! ऐबै किज़ै करूं हुंह?"

31 तिन्‍नैं काटअ तेखअ एक छ़ेल्हू संघा छ़ल़िकअ तेतो लोहू युसुफे झिटबझिट्टै च़ोल़ै दी।

32 संघा निंयं सह च़ोल़अ आप्पू संघै घअरा लै, तेखअ बोलअ आपणैं बाबा का इहअ, "हाम्हां भेटअ अह च़ोल़अ, भाल़णीं दै हैनूं अह तेरै शोहरूओ किनी आसा?"

33 याकबै हेरअ बछ़ैणीं कि अह आसा युसुफो च़ोल़अ, तेऊ बोलअ, "अह आसा मेरै शोहरूओ च़ोल़अ! मेरअ शोहरू पाअ आझ़ बणें कुंणी ज़ीबै धेल़ी-च़िरी करै खाई।"

34 याकबै किअ आपणैं झिकल़ै धेल़ी शोग अर कुछी डाही गाची पल़ेटी संघा किअ खास्सै धैल़ै शोग।

35 होर सोभै शोहरू आऐ तेऊ सेटा लै हैअ दैंदै पर सह निस्सअ केही फांभअ हई अर सह रहअ इहअ बोल्दअ लागी, "मुंह रहणअ आपणैं शोहरू लै शोग करदै लागी, मेरै लोल़ी त ऐबै मर्हुअ।"

इहअ करै रहअ याकब शोग करदअ लागी।

36 पोरी हेरअ युसुफ तिन्‍नैं मिद्यानी बपारी मिसर देशे माहा राज़ेए दरोगै पोतीपोर नाओंए मणछा का बेच़ी, सह थिअ राज़े सपाहीओ सरदार।