1 थोल़ै धैल़ै बाद पल़अ तेऊ देशै खास्सअ नकाल़, सह नकाल़ थिअ तेऊ नकाल़ा का होरी साबो ज़ुंण अब्रामे ज़मानैं पल़अ त। तैही डेऊअ इसहाक पलिश्ती देशे राज़ै अबीमोलका सेटा गरार नगरी लै।

2 परमेशर बिधाता हुअ तिधी प्रगट संघा बोलअ इसहाका लै इहअ, "मिसर देशा लै निं डेऊई, हुंह रहैऊं ताखा कि ताह किधा लै डेऊणअ।

3 "तूह रहणअ तिधी परदेसी ज़िहअ, पर हुंह हणअ आप्पू ताह संघै अर मुंह दैणीं ताल्है बर्गत अर अह देश दैणअ मुंह ताल्है अर आजू तेरी आद-लुआदा लै, ज़ेही मंऐं तेरै बाब आबरामा संघै करार आसा किई दी, सह करनी मुंह पूरी।✝

4 "तेरी आद-लुआद करनै मुंह सरगे तारै ज़िहै खास्सै अर तिन्‍नां लै दैणअ मुंह अह सारअ देश। तिन्‍नां करै भेटणीं संसारे सोभी देशे लोगा बर्गत।✝

5 "किल्हैकि ज़िहअ-ज़िहअ मंऐं आबरामा लै बोलअ त, तेऊ किअ मेरअ हुकम अर बधान तिहअ ई पूरअ।"

6 तेखअ लागअ इसहाक गरार नाओंए ज़ैगा रहंदअ।

7 इसहाके लाल़ी ती हेरनी शुणनी बधिया। तेऊ पल़ी आप्पू एही डअर कि ऐहा पिछ़ू सका मुंह कुंण मारी पाई अर तेऊ बोलअ सोभी का इहअ कि रिबका आसा तेऊए बैहण।✝

8 ज़ांऊं तेऊ तिधी रहंदी खास्सै धैल़ै हुऐ, पलिश्ती देशे राज़ै अबीमोलकै भाल़अ आपणैं मैहले ताक्‍की का बागै कि इसहाक आसा रिबका लै मल़्हैची दैंदअ लागअ द।

9 अबीमोलकै शादअ इसहाक आप्पू सेटा लै संघा बोलअ इहअ, "अह गल्‍ल ज़ाण्हिंआं मुखा पाक्‍की कि रिबका आसा तेरी लाल़ी! तै तंऐं किल्है बोलअ कि सह आसा तेरी बैहण?"

इसहाकै दैनअ ज़बाब, "मंऐं सोठअ इहअ कि ऐहा मेरी लाल़ी पिछ़ू सका मुंह कुंण मारी बी पाई।"

10 राज़ै अबीमोलकै बोलअ तेऊ लै, "ताखा थोघ बी लागा कि तंऐं किज़ै किअ? इहअ करै सका तेरी लाल़ी कज़ोहै आप्पू लै पाई अर ताह पाणै इहअ करै हाम्हैं सोभै पापा दी।"

11 तेखअ दैनी अबीमोलकै आपणीं सारी परज़ा लै चतैनगी, ज़ै कुंण इसहाक अर रिबका लै हाथ बी लाए, सह पाणअ हेरे मारी।

12 तैहा साला दैनी बिधाता इसहाका लै खास्सी बर्गत, इसहाके खटी ज़िम्मीं-ज़ैगा अर तेऊए हुई खास्सी पज़ैआ 13 अर इसहाक रहअ हर गल्‍ला लै उझै ई हंदअ लागी अर सह हुअ खास्सअ सेठ मणछ।

14 ज़ांऊं तेऊए डागै-चैणैं, गाधै-गाधी, ऊँटे हेल़्ही अर खास्सै नोकर-च़ाकर हुऐ, पलिश्ती लोग बी लागै तेऊ संघै ज़ीद-मिश करदै।

15 पलिश्ती लोगै किअ इहअ कि इसहाके बाब आबरामे ज़िऊंदी ज़िता ज़ुंण तेऊए नोकर-च़ाकरा करै कुहै थिऐ खण्हैं दै, तिंयां किऐ तिन्‍नैं माट्टै भरी बंद।

16 खिरी बोलअ राज़ै अबीमोलकै इसहाका लै इहअ, "हुंह च़ाहा इहअ कि तूह डेऊ ऐबै म्हारै एऊ देशा का दूर किल्हैकि ताखा हुअ ऐबै हाम्हां का बी खास्सअ बल।"

17 इसहाक लागअ तेऊ देशा का हांढअ, संघा लागअ गरार खागै आपणअ डेरअ पाई तिधी रहंदअ।

18 तेखअ खण्हैं तिन्‍नैं आपणैं बाबा आबरामे ज़मानैं दी कोतै दै तिंयां कुहै भिई, ज़ुंण आबरामे ज़ांऐं हणैं बाद पलिश्ती लोगै माट्टै भरी दाबै तै। इसहाकै डाहै तिन्‍नां कुहै नाअं तिहै ई ज़ुंण तेऊए बाब आबरामै थिऐ डाहै दै।

19 ज़ांऊं इसहाके दास तेऊ खागै कुहै कोतदै थिऐ लागै दै तिन्‍नां भेटी तिधी पाणींए सोबल़। 20 गरार खागै रहणैं आल़ै होरी फुआलै किअ इसहाके फुआला संघै तेता पिछ़ू झ़गल़अ कि अह पाणीं आसा म्हारअ। इहअ करै पल़अ तेऊ कुहै नाअं झ़गल़ैओ कुहअ, किल्हैकि तेता पिछ़ू हुअ त इसहाका संघै झ़गल़अ।

21 इसहाके दासै कोतअ तेखअ होर कुहअ, तेता पिछ़ू बी किअ तिन्‍नैं होरी फुआलै झ़गल़अ, अर तेऊ कुहै नाअं पल़अ "मिश*।"

22 खिरी कोतअ तिन्‍नैं एक होर कुहअ, तेता लै निं तिंयां होर फुआल झ़घल़दै आई, इहअ करै पल़अ तेऊ कुहै नाअं "रोहबोत*" किल्हैकि इसहाकै बोलअ इहअ, "ऐबै दैनी हाम्हां लै बिधाता बतेर्ही बिरली ज़ैगा ताकि हाम्हैं ऐहा ज़ैगा सारै दी बस्से।"

23 तिधा का डेऊअ सह बेर्शेबा लै। 24 तैहा ई राची हुअ परमेशर बिधाता तेऊ लै प्रगट संघा बोलअ तेऊ लै इहअ, "डरै निं आथी ज़हा बिधाते च़ाकरी तेरअ बाब अब्राम करा त हुंह आसा मेरै तेऊ दासो सह बिधाता, हुंह रहणअ ताह संघै आप्पै अर मुंह दैणीं ताल्है बर्गत, आबरामे बज़्हा दैणीं मुंह ताल्है खास्सी आद-लुआद।"

25 इसहाकै बणाईं तिधी एक बेदी संघा किई तिधी परमेशर बिधाते स्तोती। तेखअ पाअ तेऊ तिधी आपणअ खिम्भ खल़अ करी डेरअ अर तेऊए दास लागै तिधी कुहै खण्हदै।

26 तेखअ आअ राज़अ अबीमोलक आपणैं सलाहकार अहुज्जत अर आपणैं सैनापति पिकोला संघा लई करै गरार खागा का इसहाका सेटा लै।✝

27 ज़ांऊं तिंयां तिधी पुजै, इसहाकै बोलअ तिन्‍नां लै, "पैहलै ता तम्हैं मुंह संघै ज़ीद डाही करै हुंह आपणैं देशा का बागै काढअ! ऐबै किल्है आऐ इधी मुंह सेटा लै?"

28 तिन्‍नैं दैनअ ज़बाब, "हाम्हां गअ ऐबै थोघ लागी कि परमेशर बिधाता आसा सच्च़ी ताह संघै, हाम्हैं किअ ऐबै इहअ बच़ार कि हाम्हां रहणअ आप्पू मांझ़ै राम्बल़ै अर एता लै करनी हाम्हां आप्पू मांझ़ै सोह खाई आप्पू मांझ़ै करार कि, 29 हाम्हां निं एकी-दुजै लै हाथ लाणअ, तैहा गल्‍ला कर आद कि हाम्हैं निं तेरी किछ़ै हान्‍नी किई अर हाम्हैं छ़ाडअ तूह आपणैं देशा का राज्ज़ी-राम्बल़अ, तै ऐबै निं तूह बी हाम्हां लै हान्‍नी करी।"

30 इसहाकै दैनी तिन्‍नां लै धाम, तिन्‍नैं खाअ-पिअ सोभी। 31 दोत्ती-दोत्थी इसहाक अर तिन्‍नैं होरी सोभी दैनी एकी-दुजै लै ज़बान, तेखअ लागै तिंयां राज्ज़ी-राम्बल़ै घअरा लै हांढदै।

32 तैहा ई धैल़ी आऐ इसहाके दास संघा सारअ हाल खोज़दी बोलअ तिन्‍नैं इहअ, "हाम्हां भेटी पाणींए सोबल़।"

33 तधू डाहअ इसहाकै तैहा नगरी नाअं शिबा*, सह नाअं आसा आझ़ तैणीं बी बेर्शेबा पल़अ द।

34 ज़धू एसाब च़ाल़्ही सालो हुअ, तेऊ आणी दूई लाल़ी, एकी नाअं थिअ जूदीथ, सह थिई हित्ती बेरीए शोहरी। दुजी ती हित्ती एलोने शोहरी बासमत।

35 इना दूई बेटल़ी करै हुऐ इसहाक अर तेऊए लाल़ी रिबका खास्सै दुखी।