करारो बधान
1 अब्रामे अमर हुई ती नडिनुंऐं साले, बिधाता हुअ भिई तेऊ सेटा प्रगट संघा बोलअ तेऊ लै इहअ, "हुंह आसा सह बिधाता17:1 बिधाता इब्रानी बोली दी आसा "एलशदाई" मतलब सह परमेशर ज़हा का सारअ बल आसा ज़हा का सारअ बल आसा। ज़िहअ हुंह बोला, ज़ै तूह हर बगत तिहअ ई करे, 2 तै रहणीं मेरी ताल्है अह करार अर ताल्है दैणीं मुंह खास्सी आद-लुआद ज़हा कुंण गणी निं सकदअ।"
3 अब्रामै टेक्कअ धरनीं उटअ पल़ी माथअ संघा किई स्तोती अर बिधाता बोलअ तेऊ लै इहअ, 4,5 "भाल़ मेरी आसा ताल्है करार कि तूह हणअ खास्सै देशे लोगो मूल़ बाब, तैही लाअ मंऐं तेरअ नाअं अब्रामा17:4-5 अब्रामा मतलब मूल़ दाद-बाब का आबराम17:4-5 आबराम मतलब सोभी देशो मूल़ दाद-बाब डाही।17:4-5 रोम. 4:7
6 "मुंह दैणीं ताल्है खास्सी आद-लुआद, अर आजू बणनैं तिंयां बडै-बडै देश, इधी तैणीं कि कई बणनैं तिन्नां मांझ़ा का राज़ै बी।
7 "ज़ुंण मंऐं ताह संघै करार किई, सह आसा ताह संघै अर आजू तेरी आद-लुआदा संघै बी, किल्हैकि हुंह आसा तेरअ अर तिन्नों दुहीओ बिधाता।17:7 लूक. 1:55
8 "अह ज़ैगा दैणीं मुंह ताल्है अर आजू तिन्नां लै, ज़हा ज़ैगा तूह एभै परदेसी आसा। कनान देशे सारी ज़ैगा दैणीं मुंह सदा लै तेरै खिंबा लै अर हुंह हणअ तिन्नों बी बिधाता।
9 "आबराम, ज़ुंण मंऐं ताह संघै करार किई, तेऊ बधाना मनै तूह अर आजू तेरी आद-लुआद पोस्ती दर पोस्ती तिहअ ई।
10,11 "मेरअ सह बधान ज़ुंण तम्हां पोस्ती दर पोस्ती करनअ सह आसा इहअ कि तम्हैं करै थारै गुप्त आंगे मुंडकीए खाल काटी लान्हैं का प्रोढै तैणीं सोभी मणछो खतैर। अह हणअ ऐहा गल्लो नछ़ैण कि तम्हैं आसा मेरी करार आद डाही दी।17:10-11 शधा. 7:8; रोम. 4:11
12,13 "एभा पोर्ही लोल़ी तेरै सोभी टांडै-टबरै सोभी लान्हैंओ ज़ल्म हणैं का बाद आठुऐ धैल़ै खतैर किअ। तेरै घअरै च़ाऐ ढब्बै करै मोलै लऐ गलाम बी होए, तेऊओ खतैर बी करै ज़रूर, सह लान्हअ होए च़ाऐ प्रोढअ, सह च़ाऐ तेरै घअरै होए हुअ द, च़ाऐ सह तंऐं परदेसा का च़ंदी दैई लई होए आणअ द, इना दुहीओ करै खतैर। इहअ करै हणअ मेरी करारो अह बधान नछ़ैणें रुपै थारी देही दी जुगै-जुगै।
14 "ज़ै कुंण मणछ आपणैं गुप्त आंगे खाल काटी खतैर निं करे, सह निं मेरअ आथी, तेऊ काढै आप्पू मांझ़ा का ज़ुदै17:14 आप्पू मांझ़ा का ज़ुदै सह निं आजू मेरअ आथी किल्हैकि तेऊ निं मेरी करारो सह बधान मनअ।"
करारे साबै शोहरू इसहाक
15 "आबराम, ऐबै निं आपणीं लाल़ी लै साराई17:15 साराई मतलब मेरी राणीं बोली, मुंह डाहणअ ऐबै तैहा नाअं सारा17:15 सारा मतलब राणीं। 16 मुंह दैणीं तैहा लै बर्गत अर तैहा का हणअ ताल्है एक शोहरू। सह हणीं खास्सै देशे लोगे मूल़ माता अर तैहा का हुई दी आद-लुआदा मांझ़ै हणैं आजू कई राज़ै बी।"
17 आबरामै टेक्कअ उटी बाखा धरनीं पल़ी माथअ संघा लागअ इहअ सोठदअ, "मेरी अमर गई ऐबै शौआ साले हई, ऐबै किहअ करै सका हुंह एतरी प्रोढी अमरा बाब बणी? सारा गई नबै साले हई, तेसे कै हणैं-ज़ाणें कुछ सिक्कणी?" संघा लागअ सह हास्सदअ।
18 आबरामै बोलअ परमेशरा लै, "मालक, ज़ुंण तंऐं मुल्है करार आसा किई दी, तैहा कर इशमाईला लै पूरी, मुल्है आसा एचल़ी गल्ल बतेर्ही।"
19 पर परमेशरै बोलअ इहअ, "नां, तेरी बेटल़ी सारा का हणअ ताल्है एक शोहरू। तूह डाहै तेऊ नाअं इसहाक। मुंह करनी आपणीं करार तेऊ अर आजू तेऊ का हुई दी आद-लुआदा संघै पूरी।
20 "मंऐं हेरअ शूणीं कि तंऐं इशमाईले बारै किज़ै बोलअ। मुंह दैणीं तेऊ लै बी बर्गत, तेऊ लै बी दैणीं मुंह खास्सी आद-लुआद। तेऊ का बी हणैं आजू बारा सैणैं अर तेऊओ बी बणाणअं मुंह बडअ देश।
21 "पर सारा का हणअ तेरअ शोहरू इसहाक आगली साला ऐहा ई ऋता, ज़ुंण करार मंऐं ताह अर तेरी आद-लुआदा लै किई, सह हणीं आजू तेऊ अर तेऊए खिंबा का सदा लै।"
22 ज़ांऊं परमेशर आबरामा संघै गल्ला करी मुक्कअ, तेखअ डेऊअ बिधाता तिधा का।
23-27 तैहा ई धैल़ी ज़िहअ बिधाता आबरामा लै बोलअ त तेऊ किअ तिहअ ई संघा किअ तेऊ इशमाईलो खतैर।
आबरामै किअ आपणअ बी खतैर, संघा ज़ेतरै लान्हैं का प्रोढै तैणीं तेऊए टबरा जैंदरी दास अर ढब्बै करै मोलै लऐ दै गलाम थिऐ, तिन्नां सोभिओ किअ तेऊ गुप्त आंगे मुंडकीए खाल काटी खतैर।
सोभिओ खतैर हुअ तैहा ई धैल़ी। ज़धू आबरामै खतैर किअ तधू थिअ सह नडिनुंऐं सालो अर तेऊओ शोहरू इशमाईल थिअ तेर्हा सालो।