1 थोल़ै धैल़ै बाद बोलअ परमेशरै याकबा लै, "खल़अ उझ़ू, इधा का डेऊ बेतेल नगरी लै। हुंह आसा सह ज़ुंण ताह तिधी भेटअ त ज़धू तूह आपणैं भाई एसाबा सेटा का ठुर्हअ त। तूह बस्स तिधी संघा बणा तिधी मुल्है एक बेदी।"✝

2 याकबै बोलअ आपणैं सोभी टबरा लै अर तिन्‍नां सोभी लै ज़ुंण तेऊ संघै डेऊंदै थिऐ, "तम्हां मांझ़ै आसा होरी देअए मुहुर्ती, तिन्‍नां करा आप्पू का दूर संघा हआ आप्पू शुचै। आप्पू बान्हां धोऐ दै झिकल़ै।

3 "तेभा बाद डेऊणअ हाम्हां बेतेल नगरी लै। तिधी बणाणीं मुंह तेऊ परमेशरा लै बेदी, ज़ुंणी खरीए पलका म्हारी मज़त किई, अर ज़ुंण हर ज़ैगा हाम्हां संघै रहअ।"

4 तेखअ दैनै सोभी आपणैं-आपणैं देअए मुहुर्ती अर काने कनऊज़ू याकबा का। तेऊ डाहै तिंयां तेऊ शकेम नेल़ ममरे महरूए बूटा गोधै दाबी।

5 ज़ांऊं याकब, तेऊए शोहरू अर होर सोभै लोग तिधा का आजू लागै हांढदै, तिन्‍नां ओर्ही-पोर्हीए नगरीए लोगे मन्‍नैं पाअ बिधाता हैल़अ फिकर। तेखअ निं तिंयां याकबे शोहरूए पिछ़ै पल़ै आथी।

6 खिरी पुजअ याकब आपणैं नातै-रिश्तैदारा संघी कनान देशे लूज नगरी ज़ेता लै बेतेल* नगरी बी बोला।

7 तिधी पुजी बणाईं याकबै परमेशरा लै बेदी संघा डाहअ तैहा ज़ैगा नाअं एल-बेतेल*। किल्हैकि अह ती सह ज़ैगा ज़िधी परमेशर तेऊ लै तधू प्रगट हुअ त ज़धू सह आपणैं भाई एसाबे डरै ठुर्हअ त।

8 तिधी रहंदी हुअ इहअ कि रिबके ज़ुंण दुधा पणैऊंणै आल़ी दासी दबोरा थिई, सह गई ज़ांऐं। तिन्‍नैं दाबी सह बेतेले महरूए बूटा गोधै संघा डाहअ तेता नाअं "लेरा-पकारो महरू*।"

9-11 पद्दनरामा का एछणैं का बाद कनान देशा लै फिरी एछणैं का बाद हुअ बिधाता भिई याकबा लै प्रगट। ऐहा बारी डाहअ बिधाता याकबो नऊंअ नाअं संघा दैनी इहअ बोली बर्गत, "हुंह आसा सह बिधाता ज़हा का सारअ बल आसा, आझ़ा पोर्ही निं तेरअ नाअं याकब रहणअ, मंऐं डाहअ तेरअ नाअं इज़राईल। तेरी हणीं खास्सी आद-लुआद अर तेरी लुआदे बणनैं कई देश। तिन्‍नां मांझ़ा का निखल़णैं कई राज़ै बी।✝

12 "मुंह दैणीं ताल्है सह ज़ैगा, ज़ेते मंऐं आबराम अर इसहाका संघै करार आसा किई दी, ऐबै दैणीं मुंह सह सारी सदा तेरै खिंबा लै।"

13 ज़ांऊं बिधाता डेऊअ, 14 याकबै किअ तिधी बडअ पात्थरो थाम्ह खल़अ, ताकि तेऊ आद रहै कि बिधाता आसा इधी मुंह संघै गल्‍ला किई दी। संघा दैनअ तेऊ दाखे रस अर जैतूने तेलो अर्घअ बी।✝ 15 तेखअ डाहअ याकबै तैहा ज़ैगा नाअं बेतेल मतलब बिधातो घअर।

16 तेखअ लागै याकब अर तेऊए सोभ टांडै-टबर बेतेल नगरी का आजू हांढदै। ज़ांऊं तिंयां एप्रात नगरी नेल़ पुजै, राहेले सिक्‍कै सूंणें धैल़ै अर तैहा लागी खास्सी दाह। 17 ज़ांऊं तैहा खास्सै शूल़ उझ़िआ तै, तेभै-तेभै करा ती तेसे सुआऊई इहअ बोली, "डरै निं आथी, ऐहा बारी बी हणअ तेरै शोहरू।" 18 खिरी गई सह ज़ांऐं, पर मरनै का आजी गअ त शोहरू हई अर तैहा डाहअ तेऊ नाअं बेनोमी* पर याकबै डाहअ तेऊ शोहरू नाअं बिन्यामीन*।

19 राहेल डाही तेखअ एप्रात नगरी डेऊणे बाता दाबी ज़हा लै बेतलेम नगरीए बात बी बोला।

20 याकबै किअ तेसे घोरी प्रैंदै एक थाम्ह खल़अ। तेता लै बोला राहेले घोरीओ थाम्ह बी। सह आसा आझ़ तैणीं बी तिधी खल़अ।

21 याकब, ज़हा लै ऐबै इज़राईल बी बोला, सह लागअ आजू हांढदअ, संघा पाअ तेऊ एदर नाओंए उछ़टी पुंडरी आजू डेऊई खिम्भ खल़अ करी डेरअ।

22 तेऊ देशै रहंदी हुअ इहअ कि इज़राईलो ज़ेठअ शोहरू रूबेन सुत्तअ-बेठअ बिल्हा संघै ज़ुंण तेऊए बाबै याकबै होर डाही दी बेटल़ी आसा ती, अर याकबा का गअ ऐहा गल्‍लो थोघ लागी।✝

23-26 पद्दनराम रहंदी हुऐ याकबे बारा शोहरू। तेऊओ ज़ेठअ शोहरू रूबेन आसा लिआ का हुअ द, तेऊ बाद हुऐ लिआ का शमौन, लेबी, यहूदा, इस्साकार अर ज़बलून। लिए दासी ज़िल्पा ज़ुंण याकबै डाही तैहा का हुऐ दूई शोहरू गाद अर आशेर।

याकब अर तेऊए दुजी लाल़ी राहेला का हुऐ युसुफ अर बिन्यामीन। राहेले दासी बिल्हा ज़ुंण याकबै होर ती डाही दी तैहा का बी हुऐ दूई शोहरू दान अर नप्ताली।

27 याकब डेऊअ आपणैं बाब इसहाका सेटा ममरे मतलब हेब्रोन नगरी लै, ज़ेता लै किर्यात-अराबा बी बोला। तिधी रहा तै आबराम अर इसहाक परदेसी।✝

28,29 इसहाक ज़िऊअ खास्सी अमरा, ज़ेभै सह ज़ांऐं गछ़ी आपणैं दादा-बाबा सेटा पुजअ, तेभै ती तेऊए अमर एकी शौआ अश्शी साले। तेखअ किअ एसाब अर याकबै तेऊओ क्रिया-कर्म।