मूल़ 14

लूत किअ कैद

1 तेऊ ज़मानैं थिअ शिनार देशै आम्रपाल राज़अ, एल्सार देशै थिअ अर्योक, एलाम देशे कदार्ला ओमर, गोईम देशै थिअ राज़ै तिदालो राज़।

2 इनै च़ऊ राज़ै किअ एक्‍कअ संघा छ़ेल़अ सदोम नगरीए राज़ै बेरा, अमोरा नगरीए राज़ै बिर्शा*14:2 बिर्शा मतलब कमज़ोरी दी , अदमा देशे राज़ै शिनाब, सबोईम नगरीए राज़ै शेमेबर अर बेला ज़हा लै ज़ोआर नगरी बी बोला, इना पांज़ा नगरीए राज़ै संघै जुध।

3,4 राज़अ कदार्ला ओमर अर तेऊए साथी राज़ै किअ इना पांज़ा राज़ै प्रैंदै बारा साला तैणीं राज़, पर तेर्हुई साला किअ इनै पांज़ राज़ै एक्‍कअ करी द्रोह संघा हुऐ सदोम खागै तिधी कठा ज़ेता लै खार समुंदर बी बोला।

5 च़ौदुई साला निखल़ै राज़ै कदार्ला ओमर अर तेऊए साथी राज़ै जुधा लै, अश्तारोतकम ज़ितै तिंयां रपाई ज़ाती का, हाम ज़ितै तिंयां जूजी ज़ाती का अर शबे-किर्यातैम ज़ितै तिंयां एमी ज़ाती का जुध।

6 सेईर धारा रहणैं आल़ै हूरी ज़ातीए लोग बी हारै तिन्‍नैं, संघा पुजै तिंयां शुन्‍नैं रेगीस्ताने बान्‍नै एल-परान तैणीं।

7 तिधा का फिरै तिंयां बापस संघा पुजै मिशपाट, ज़ेता लै कादेश बी बोला। तिन्‍नैं गिम्मी अमोलकी ज़ातीए सारी ज़ैगा, संघा हारै हसोन-तामर रहणैं आल़ै अमोरी ज़ातीए लोग।

8,9 तेखअ निखल़ी सदोम खार समुंदरे खागै सदोम, अमोरा, अदमा, सबोईम अर बेला ज़हा लै ज़ोआर बी बोला, इना च़ऊ राज़े सैना एलामे राज़ै कदार्ला ओमर, गोईमे राज़ै तिदाल, शिनार राज़ै आम्रपाल अर एल्सारे राज़ै अर्योक, इना पांज़ा राज़ै संघै जुधा करना लै।

10 सदोम खागा दी थिई च़िक्‍करै आल़ी कई खाल़्ही। ज़ांऊं सदोम अमोरा नगरीए राज़ैए सैना तिधा का ठुर्हदी लागी, तिन्‍नें कई सपाही पटिक्‍कै तिन्‍नां खाल़्ही दी, बाकी ज़ुंण बच़ै, तिंयां ठुर्है उझै धारा लै।

11 तिन्‍नें दुशमणै लुटी सदोम-अमोरा नगरीए सारी ज़ैदात, इधी तैणीं कि तिन्‍नें ज़िणस बी लुटी सारी।

12 तिन्‍नैं किअ अब्रामो भतिज़अ लूत बी कैद संघा तेऊए ज़ैदात लुटी करै लागै तिंयां सैना पाई तिधा का हांढदै।

अब्रामै आणअ लूत छ़ड़ैऊई

13 अब्राम थिअ इब्रानी ज़ातीओ, तिन्‍नां धैल़ै रहा त सह महरूए बणैं, अह बण थिअ अमोरी ज़ातीए ममरे नाओंए मणछो ज़हा संघै आबरामै करार किई ती। ममरे, तेऊओ भाई एशकोल अर आनेर डाहा तै चिहै अब्रामा संघै बडी साथ। तिन्‍नां सेटा लै आअ कुंण जुधा जैंदरा का बच़ी अर तेऊ खोज़ी सारी गल्‍ला अब्रामा कि 14 तेरअ भतिज़अ निंयं कैद करी। अब्रामा संघै तै चअन शौ ठारा मर्ध तेऊए दास ज़ुंण जुध बिद्या ज़ाणा तै, तेऊ निंयैं तिंयां आप्पू संघा, तेखअ पल़ै दान नगरी तैणीं दुशमणे पिछ़ै।

15 राची बांडै अब्रामै आप्पू संघे तिंयां सारै मणछ कई छ़ुंढा दी, संघा दैनअ दुशमणा लै फेरा-फेर गोट अर तिंयां ज़ितै। कई दुशमण दरल़ाऊऐ तिन्‍नैं दमिश्क नगरीए उतर दिशा बाखा होबा नगरी तैणीं तिन्‍नां पिछ़ू डेऊई। 16 तेखअ आणअ अब्रामै आपणअ भतिज़अ लूत तेऊए बेटल़ी, मर्ध अर सारी ज़ैदाता संघी तिन्‍नां का छ़ड़ैऊई।

अब्रामा लै मल्किसदोक प्रोहता का बर्गत

17 अब्राम फिरअ राज़ै कदार्ला ओमर अर तेऊए होरी साथी राज़ै का जुध ज़िती बापस। तेखअ पुजअ सदोम नगरीओ राज़अ शबे खागा दी अब्रामा सेटा मिलदअ, ज़ेता लै राज़ैओ खाग बी बोला।

18 शालेमो राज़अ मल्किसदोक थिअ परम प्रधान परमेशरो प्रोहत। तेऊ आणी रोटी अर दाखो रस,✝14:18 इब्रा. 7:1-10 19 संघा बोलअ अब्रामा लै,

"हुंह दैआ ताल्है सारै भ्रमंडा बणाणैं आल़ै

परम प्रधान परमेशरा बाखा बर्गत।

20 सारी ज़ै-ज़ैकार लोल़ी तेऊ परम प्रधान परमेशरे हुई

ज़ुंणी ताल्है दुशमणा हारना लै बल दैनअ।"

21 सदोम नगरीए राज़ै बोलअ अब्रामा लै, "सारी ज़ैदात डाह तूह आप्पू का, मुल्है दै सिधै मेरै लोगा बापस।"

22 अब्रामै बोलअ सदोमे राज़ै लै, "मंऐं आसा सरग अर धरती बणाणैं आल़ै बिधाता परम प्रधान परमेशरे सोह खाऐ दै कि, 23 हुंह निं आप्पू का तेरअ किछ़ डाहंदअ, इधी तैणीं कि नां तेरै एक बान्हणैंओ ज़ेऊल़अ या एक धाग्गअ बी निं, ताकि तूह काल्‍ला धैल़ी इहअ निं बोले कि तेरी ज़ैदाता करै बणअ हुंह अब्राम सेठ।

24 "पर ज़ुंण मुंह संघै डेऊऐ दै इनै मणछै पेटै खाअ सह हेरअ खाई, अर ज़ुंण मेरै ईंयां चअन साथी आनेर, एशकोल अर ममरे आसा, इना ता लोल़ी इनो हेस्सअ भेटअ, एता का लाऊआ निं हुंह किछ़ै डाहंदअ।"