1 युसुफा का खोज़अ कुंणी कि तेरअ बाब आसा खास्सअ दाहुअ द। युसुफै निंयैं आपणैं शोहरू मनिश्शे अर एप्रैम आप्पू संघै तेखअ डेऊऐ याकबा सेटा।

2 ज़ांऊं युसुफ पुजअ, कुंणी बोलअ याकबा का इहअ, "तेरअ शोहरू युसुफ आअ ताह सेटा लै तेरी हेर-सभाल़ा।"

इज़राईल उझ़ुअ बडी मसा मांज़ै प्रैंदै खल़अ संघा बेठअ।

3 याकबै बोलअ युसुफा का, "सह बिधाता ज़हा का सारअ बल आसा, तेऊ आसा मुल्है कनान देशै लूज नगरी नेल़ दर्शण दैई बर्गत दैनी दी।✝

4 "तेखअ आसा बिधाता मुखा इहअ बी बोलअ द, ‘मुंह बढाऊंणीं तेरी आद-लुआद खास्सी अर सारै देशे लोगो मूल़ हणअ तूह। मंऐं दैनी अह ज़ैगा ताल्है अर आजू तेरी पोस्ती लै।’"

5 तेखअ बोलअ इज़राईलै युसुफा लै इहअ, "युसुफ, तेरै ईंयां दूई शोहरू एप्रैम अर मनिश्शे आसा मिसर देशै हुऐ दै, पर मंऐं मनै ईंयां मेरै आपणैं शोहरू, ज़िहै रूबेन अर शमौन आसा मेरै।

6 "इना दूई बाद तेरी ज़ुंण बी लुआद होए सह हणीं तेरी, पर बांडणीए बगती भेटणअ तिन्‍नां ज़ैदाता दी एप्रैम अर मनिश्शे संघै हेस्सअ।

7 "इहअ लाअ मंऐं तेरी ईजा राहेले तैणीं करी। ज़धू हुंह मेसोपोटामिया का बापस त एछदअ लागअ द, एप्रात पुजणैं का थोल़ी आजी गई सह कनान देशै मेरी आछी सम्हनै ज़ांऐं एप्रात ज़ुंण आझ़कअ बेतलेम आसा, सह आसा मंऐं तैहा बाता दाबी डाही दी।"✝

8-10 इज़राईल थिअ खास्सअ प्रोढअ गअ द हई अर आछी का बी शुझिआ त तेऊ का धुंमधुंमअ। तेऊ निं तिंयां दूई लान्हैं बछ़ैणीं, तेऊ पुछ़अ युसुफा का, "ईंयां दूई लान्हैं कुंण आसा?" युसुफै बोलअ, "ईंयां आसा मेरै शोहरू। बिधाता आसा ईंयां मुल्है इधी मिसर देशै दैनै दै।"

इज़राईलै बोलअ, "ओर्ही आण इना मुंह सेटा लै, मुंह दैणीं इना लै बर्गत।"

युसुफै निंयैं तिंयां दुहै शोहरू नेल़ ज़िहै संघा दैनी इज़राईलै तिन्‍नां लै च़ुंज़ी-माख्खी अर मल़्हैची।

11 इज़राईल फिरअ युसुफा बाखा संघा बोलअ इहअ, "कई साला रहअ हुंह इहअ सोठदअ लागी कि तूह आसा मरी गअ द अर तेरअ मुंह निं हुंह ऐबै कधि भाल़ी सकदअ। पर बिधाता रहैऊऐ मुखा ऐबै तेरै शोहरू-माठै बी।"

12 तेखअ किऐ तिंयां शोहरू युसुफै याकबे ज़ान्हूं मांझ़ा का पोर्ही संघा आप्पू टेक्‍कअ याकबा सेटा उटी बाखा माथअ।

13 संघा निंयैं युसुफै तिंयां दुहै शोहरू भिई याकबा सेटा, आपणअ शोहरू एप्रैम किअ तेऊ बाऊंईं बाखा खल़अ अर मनिश्शे किअ इज़राईले दैहणीं बाखा खल़अ।

14 पर बर्गत दैणैं का आजी लाऐ इज़राईलै आपणैं हाथ ओर्ही-पोर्ही, खाणअ हाथ लाअ तेऊ एप्रैमे मुंडै अर खिंज़अ हाथ लाअ तेऊ मनिश्शे मुंडै।

15 तेखअ बोलअ इज़राईलै युसुफा लै बर्गत दैंदी बारी, "ज़हा परमेशर बिधाते च़ाकरी मेरै दाद-बाब आबराम अर इसहाकै किई, सह रहअ मेरी सारी ज़िन्दगी मुंह संघै। 16 तेऊए स्वर्ग दूतै डाहअ हुंह आझ़ तैणीं राज्ज़ी-राम्बल़अ। ऐबै करा हुंह एही प्राथणां कि सह दैए इना दुही लै एही बर्गत कि मेरअ अर मेरै दादू आबराम अर मेरै बाब इसहाको नाअं लोल़ी इना दूई करै आजू बढअ।

"हुंह करा बिधाता का एही अरज़ कि इने लोल़ी आजू खास्सी आद-लुआद हुई।"

17 युसुफा निं अह गल्‍ल ढबी कि इज़राईलै डाहअ आपणअ दैहणअ हाथ कान्हैं शोहरू एप्रैमे मुंडा प्रैंदै। तेऊ दैनी याकबे दैहणै हाथा एप्रैमे मुंडा का मनिश्शे मुंडा लै करनी। 18 तेखअ लागअ युसुफ इहअ बोल्दअ, "बाबा, ताखा निं थोघै लागअ, ज़ेठअ शोहरू आसा अह, आपणअ खाणअ हाथ डाह एऊए मुंडा प्रैंदै।"

19 पर इज़राईलै बोलअ इहअ, "बेटैआ, मुखा आसा राम्बल़ै करै थोघ कि हुंह किज़ू करदअ आसा लागअ द। मनिश्शेओ खिंब हणअ खास्सअ। पर एप्रैम हणअ तेऊ का बी खास्सअ, अर एऊए खिंबा दी हणैं आजू कई देश।"

20 इज़राईलै बोलअ इहअ कि आजू मांगणी इज़राईली मणछा बिधाता का इहअ बोली बर्गत, "हाम्हैं करा बिधाता का एही अरज़ कि हाम्हां लै दै एही बर्गत ज़ेही एप्रैम अर मनिश्शे लै दैनी।"✝

21 तेखअ बोलअ इज़राईलै इहअ, "युसुफ, ताखा आसा लागअ द शुझदअ कि हुंह निं ऐबै खास्सअ ज़िऊंणअ। पर बिधाता रहणअ तम्हां संघै अर तेऊ हेरनै तम्हैं तेऊ देशै पजैल़ी ज़ेते करार तेऊ खास्सी साला पैहलै म्हारै दादा-बाबा का आसा किई दी।

22 "हुंह दैंऊं ताल्है तेरै होरी भाई का खास्सी ज़िम्मीं ज़ुंण मंऐं अमोरी लोगा का जुध करी आसा छ़ड़ैऊई दी*।" ✝