1 याकब त आपणैं घअरा बाखा बाता आजू डेऊंदअ लागअ द, तेऊ सेटा लै आऐ बिधाते खास्सै दूत।

2 ज़ांऊं याकबै तिंयां दूत भाल़ै, तेऊ बोलअ, "अह आसा बिधाते सैना।" इहअ करै डाहअ तेऊ तैहा ज़ैगा नाअं "माहानीम*।"

3 याकबो भाई एसाब रहा त सेईर* देशै, ज़हा लै एदोम बी बोला। याकबै छ़ाडै तिधा लै आपणैं दूत।

4 याकबै दैनअ तिन्‍नां का एसाबा लै इहअ समाद, "मेरै मालक, हुंह आसा तेरअ च़ाकर! हुंह त आझ़ तैणीं लाबान मामे घअरै परदेसी ज़िहअ रहंदअ लागअ द, 5 ऐबै आसा मुखा खास्सै गाऊई-बल्द, भेडा-बाकरी, ऊँट अर गाधे हेल़्ही अर दास-दासी। तैही छ़ाडै मंऐं ताह सेटा लै समाद लई मेरै आदमी ऐहा आशा डाही कि तंऐं मेरै मालकै लोल़ी मुल्है झींण किई।"

6 ज़ांऊं तिंयां दूत याकबा सेटा बापस फिरै, तिन्‍नैं खोज़अ याकबा का, "हाम्हैं डेऊऐ तेरै भाई एसाबा सेटा लै, सह गअ पिछ़ू ताह सेटा मिलदअ एछी, आप्पू संघा आणै तेऊ च़ार शौ मणछ बी।"

7 याकब डरअ, तेऊ बांडै आपणैं सोभै लोग, सोभै भेडा-बाकरी, गाऊई-बल्द, गाधै-गाधी, ऊँट दूई हेल़्ही दी। 8 तेऊ सोठअ इहअ, ज़ै एसाब तेऊए एकी छ़ुंढा बाखा च़िक्‍कदअ-मारदअ एछे, दुजअ छ़ुंड ता सका तेऊ का दूर ठुर्ही बच़ी।

9 संघा किई याकबै बिधाता का एही प्राथणां, "हे बिधाता, तूह आसा सह ज़सरी च़ाकरी मेरअ दादू आबराम अर मेरअ बाब इसहाक करा त। तंऐं बोलअ आप्पै मुल्है कि आपणैं नातै-रिश्तैदारा सेटा लै डेऊ घअरा लै फिरी! तंऐं इहअ बी आसा बोलअ द कि तूह रहणअ मुंह संघै आप्पै।

10 "ज़ुंण भलाई तंऐं मुंह संघै किई, हुंह नांईं त तेता जोगी आथी, ज़धू हुंह जरदण नदी पार डेऊअ त, तधू थिअ मेरै हाथै हांढणा लै सिधअ शोठअ, पर तंऐं दैनी मुल्है एही बर्गत कि भाल़ ऐबै आसा मुखा मणछा अर डागै-चैणें दूई बडै छ़ुंढ।

11 "ऐबै आसा ताखा मेरी एही अरज़, मालक, ज़ीबाण, तूह बच़ाऊ आझ़ मेरै भाई एसाबा का, मुंह लागअ हैल़अ कि तेऊ पाणै मुंह संघै मेरी बेटल़ी अर शोहरू-माठै बी मारी।

12 "तंऐं आसा इहअ पै बोलअ द कि हुंह हणअ सफल अर एकी धैल़ै हणीं मेरी एतरी आद-लुआद कि तिन्‍नां निं कुंण गणी सकदअ ज़िहै कुंण समुंदरे रेता अर तारै निं गणी सकदै।"✝

13 तेखअ रहअ याकब बैल़ी तिधी, तेऊ छ़ांटै धख डागै-चैणैं कि तिंयां दैणैं तेऊ आपणैं भाई एसाबा लै आप्पू बाखा भैंट।

14,15 तेऊ छ़ांटी दूई शौ बाकरी अर बिह छ़ेल्हू, दूई शौ भेडा अर बिह गाभू, तिह लाहुदी सूई दी ऊँटणी, च़ाल़्ही गाऊई, दस बाछ़ू, बिह गाधी अर दस गाधै।

16 याकबै सभाल़ै तिंयां सोभै हेल़्ही आपणैं दासा का संघा बोलअ, "तम्हैं लागा मुखा आजू-आजू हांढदै, अर सोभ हेल़्ही छ़ेल़्है एकी-दुजै का दूर-दूर।"

17 तेखअ बोलअ याकबै तेऊ लै ज़ुंण सोभी का आजूए हेल़्ही छ़ेल़्हअ त लागअ द, "ज़ेभै ताह मेरअ भाई एसाब भेटे, अर ज़ै सह तम्हां का पुछ़े, ‘तम्हैं कसरै दास आसा? तम्हैं किधा लै च़ाल्‍लै? ईंयां कसरै डागै-चैणैं आसा?’

18 "तेभै बोलै तम्हैं इहअ, ‘ईंयां आसा तेरै च़ाकर याकबे, मालक, ईंयां छ़ाडै तेऊ आप्पू का आजू ताल्है भैंट। आप्पू बी आसा सह पिछ़ू एछदअ लागअ द।’"

19 दुजै, चिऊथै अर च़ौथै, ज़हा का ज़ुदी-ज़ुदी हेल़्ही थिई सभाल़ी दी तिन्‍नां का बी डाहअ याकबै इहअ ई बोली कि ज़ेभै मेरअ भाई एसाब भेटे तेभै बोलै तम्हैं एही गल्‍ला, 20 तेऊ का बोलै इहअ बी कि याकब आसा आप्पू बी हाम्हां पिछ़ू ई लागअ द एछदअ, तेऊ आसा एही आशा कि मेरी इना भैंटा भाल़ी जाए भाईओ रोश्श फांभअ हई, अर ज़ेभै हाम्हैं मिले तेभै लोल़ी मुंह भाल़ी मेरअ भाई खुश हुअ।

21 याकबे तिन्‍नैं दासै बी छ़ेल़्ही भैंट दैणा लै आपणीं-आपणीं सभाल़ी दी तिंयां हेल़्ही, संघा लागै याकबा का आजू-आजू हांढदै।

22,23 याकब उझ़ुअ आधा राची खल़अ, संघा निंयैं तेऊ आपणैं गैरा शोहरू, आपणीं दुहै लाल़ी अर तिन्‍नें दासी ज़बोग गाडा पार ताकि तिन्‍नां सह राज्ज़ी-राम्बल़अ सभाल़ी सके।

24 तेखअ डेऊअ याकब डेरै लै फिरी, संघा काटी तिधी राच एकी ज़ण्हैं।

इहअ हुअ कि एक मर्ध आअ तेऊ सेटा, संघा रहअ तेऊ संघै राची भैणै तैणीं मल्‍ल जुधा करदअ लागी।✝

25 ज़ांऊं तेऊ मर्धै ज़ाणअ कि हुंह निं एऊ का ज़िती सकदअ, तेऊ छ़ुंहीं याकबे ज़ांघे नस, संघा बधल़ूई तेऊए ज़ांघे नस।

26 तेखअ बोलअ तेऊ मर्धै, "राच च़ाल्‍ली भैई, मुंह दै ऐबै डेऊणैं!"

याकबै दैनअ ज़बाब, "ज़ेभै तैणीं तूह मुल्है बर्गत निं दैए, तेभै तैणीं निं हुंह ताह छ़ाडदअ।"

27 तेऊ बोलअ याकबा लै, "ताह नाअं किज़ै आसा?" याकबै दैनअ ज़बाब, "मुंह नाअं आसा याकब।"

28 तेऊ मर्धै बोलअ, "ऐबै निं ताह नाअं याकब रहणअ। किल्हैकि तंऐं ज़ित्तअ मणछ अर बिधाता दुही का मल्‍ल जुध। तैही पल़णअ तेरअ नाअं ऐबै इज़राईल*।"✝

29 याकबै बोलअ इहअ, "ऐबै खोज़ तूह, ताह नाअं किज़ै आसा।"

तेऊ बोलअ, "ताखा सच्च़ी निं थोघै कि हुंह कुंण आसा?"

तेखअ दैनी तेऊ याकबा लै बर्गत।✝

30 तेखअ बोलअ याकबै, "मंऐं भाल़अ बिधाता आपणीं आछी पर तज़ी बी आसा हुंह ज़िऊंदअ!" तेऊ डाहअ तेखअ तैहा ज़ैगा नाअं पनीएल*।

31 ज़ांऊं याकब पनीएला का हांढदअ लागअ, तेभै गअ त धैल़अ निखल़ी। सह थिअ लाट्टअ लागअ द हांढदअ किल्हैकि तेऊए ती ज़ांघे नस बधल़ूई दी।

32 इज़राईली निं आझ़काला बी ज़ांघे नसे ज़ोल़ा खांदै किल्है तेऊ मणछै छ़ुंहीं ती याकबे ज़ांघे नस।