मूल़ 25

आबरामे आद-लुआद

1 आबरामै आणी एक होर बेटल़ी, तैहा नाअं थिअ कतूरा।

2 कतूरा का हुऐ आजू छ़ह शोहरू: ज़िमरान, जोकशान, मदान, मिद्यान, ईशबाक अर शूहा। 3 जोकशाना का हुऐ शेबा अर ददान अर ददाने खिंबा दी हुऐ अश्शूरी, लतूशी अर लुम्मी। 4 मिद्याने हुऐ एपा, एपेर हणोक, अबीदा अर एल्दा ईंयां सोभै आसा कतूरा का हुऐ दै।

5,6 आबरामै ज़ुंण होर बेटल़ी हागार अर कतूरा ती डाही दी तेऊ दैनी आपणीं ज़िऊंदी ज़िता तिन्‍नां दुही लै थोल़ी-थोल़ी ज़ैदात बांडी। तिन्‍नें शोहरू बी छ़ाडै तेऊ इसहाका का दूर तेऊ देशे पुर्बा बाखा। बाकी सारी ज़ैदात डाही तेऊ आप्पू मरनै का बाद इसहाका लै।

आबरामे मौत

7,8 आबरामे अमर ती खास्सी लाम्मी सह गअ एकी शौआ पझत्तरा साले अमरा ज़ांऐं।

9,10 तेऊए शोहरू इसहाक अर इशमाईलै डाहअ सह हेब्रोने पुर्बा बाखा तेऊ ई मकपेला नाओंए डुआरै ममरे सम्हनै तैहा ज़ैगा दाबी ज़ुंण आबरामै हित्ती मणछ सोहारे शोहरू एप्रोना का मोलै लई ती। आबराम डाहअ तिन्‍नैं तैहा ज़ैगा दाबी ज़िधी तेऊ आपणीं लाल़ी सारा थिई दाबी दी।✝25:9-10 मूल. 23:3-16

11 बिधाता दैनी आबरामा मरने का बाद इसहाका लै खास्सी बर्गत। इसहाक लागअ तेखअ तेऊ कुहै सेटा रहंदअ ज़हा लै "लहरोई*25:11 लहरोई सह कुहअ ज़िधी ज़िऊंदै बिधाता हुंह भाल़अ।" कुहअ बोला।

इशमाईलो खिंब

12 इशमाईल थिअ आबरामो हागारो शोहरू। हागार ती सारे मिसर देशा का आणी दी गलाम दासी।

13 इशमाईले हुऐ बारा शोहरू, तेऊओ सोभी का ज़ेठअ थिअ नबयोत, तेऊ बाद हुऐ कदार, अदबेल, मिबसाम, 14 मिशमा, दुमा, मासा, 15 हदाद, तेमा, जतूर, नपीश अर कदमा।

16 इशमाईले ईंयां सोभै शोहरू हुऐ आपणैं-आपणैं गोत्रे सैणैं अर इने नाओंए साबै पल़ै आजू गराऊंए अर ज़ैगे नाअं बी।

17,18 इशमाईल बस्सअ आपणैं सोभी भाई-बंधा संघै हबीला का सूर तैणीं मिसर देशे पुर्बा बाखा ज़ुंण ज़ैगा अश्शूरे बाता आसा। तिंयां डाहा तै आबरामे होरी आद-लुआदा संघै ज़ीद*25:17-18 ज़ीद तिंयां रहा तै आपणैं रिश्तैदारा का ज़ुदै पुर्बा बाखा देशै, इशमाईल गअ एकी शौआ सैईंती साले अमरा ज़ांऐं अर सह बी डाहअ तेऊए दादा-बाबा ई ज़िहअ दाबी।

19 इसहाक थिअ आबराम अर सारा का हुअ द शोहरू।

रिबके दोगल़ शोहरू-याकब अर एसाब

20 ज़ांऊं इसहाके अमर च़ाल़्ही साले हुई, तेऊ किअ रिबका संघै बैह। रिबका थिई पद्दनराम मुल्खै रहणैं आल़ै अरामी मणछ बतूएले शोहरी अर लाबाने कान्हीं बैहण।

21 बैह करी गई ती बिह साला हई पर रिबके निं आजू लुआद हुई ती। इसहाकै किई बिधाता सेटा अरज़ कि मेरी लोल़ी आजू लुआद हुई। बिधाता दैनअ तेऊ लै बअर संघा हुई रिबका सुंदी।

22 सूंणैं का आजी गअ रिबका का थोघ लागी कि तेसे पेटै आसा दोगल़ शोहरू, किल्हैकि तैहा का ज़ाण्हिंआं तै भितरी आसा दुहै झ़घल़दै लागै दै। तैहा सोठअ इहअ, "मुंह संघै इहअ किल्है आसा लागअ द हंदअ?"

खिरी लागी सह बिधाता का पुछ़दी, "ईंयां दोगल़ शोहरू पेटै ई किल्है आसा लागै दै झ़घल़दै?"

23 बिधाता बोलअ तैहा लै इहअ,

"तेरै दोगल़ शोहरूए हणीं आजू

दूई ज़ुदी-ज़ुदी ज़ातीए देश।

इना दूई मांझ़ै हणअ

कान्हअ शोहरू बलबान,

ज़ेठअ शोहरू हणअ

तेऊओ गलाम।"✝25:23 रोम. 9:12

24 तेखअ सिक्‍कै रिबके सूंणें धैल़ै, 25 ज़ुंण शोहरू आजी हुअ सह थिअ झुशलअ, तिन्‍नैं डाहअ तेऊओ नाअं एसाब*25:25 एसाब ज़हा सारी घेरी शराल़ हआ, झुशलअ।

26 एसाबा पिछ़ू हुअ नढैऊऐ दुजअ शोहरू, तेऊ ती आजू हणैं आल़ै शोहरूए घुंढी डाही दी ढाकी, तिन्‍नैं डाहअ तेऊ नाअं याकब*25:26 याकब इब्रानी दी बोला घुंढी।

इसहाके ईंयां दूई शोहरू हुऐ तेऊए शाठी साले अमरा दी।

एसाबै बेच़अ आपणैं ज़ेठै हणैंओ हक

27 एसाब अर याकब हुऐ ज़ुआन। एसाब रहा त बणैं-बूटै खुश अर सह बणअ मशूर शकारी। याकब त सिधअ-सादअ मणछ, सह रहा त खिम्भे डेरै दी अर सह बणअ फुआल।

28 एसाब करा त आपणैं बाबा लै बणां-बूटा का शकार आणी, तैही झ़ूरा त इसहाक आपणैं ज़ेठै शोहरू एसाबा लै खास्सअ। याकबै थिअ आपणीं ईजा रिबको पैरअ।

29 एकी धैल़ै हुअ इहअ कि याकबै ती मसरे दाल़ लाई दी सिटदी, एसाब आअ बणां का अर तेऊ ती खास्सी भुखै आई दी।

30 तेऊ बोलअ याकबा लै, "मेरै च़ाल्‍लअ भुखै मर्हुई! मुल्है दै ऐहा मसरे दाल़ी का धख ज़ेही खाणां लै!" तैही पल़अ एसाबा नाअं एदोम*25:30 एदोम मतलब लाल।

31 याकबै बोलअ एसाबा लै, "एते बदल़ै दै आपणअ ज़ेठै हणैंओ हक मुल्है।" 32 एसाबै बोलअ, "मेरै च़ाल्‍लअ भुखै मर्हुई, ज़ेठै हणैं करै किज़ै च़ाल्‍लअ मुंह भेटी?"

33 पर याकबै बोलअ एसाबा लै, "पैहलै काढ सोह कि तंऐं दैनअ एते बदल़ै आपणअ ज़ेठै हणैंओ हक ऐबै मुल्है।"

एसाबै किअ तिहअ ई।✝25:33 इब्रा. 12:16

34 याकबै दैनी तेखअ एसाबा लै रोटी अर सह मसरे दाल़। खाई-पिई लागअ एसाब हांढदअ, इहअ रहैऊंणा लै कि हुंह निं ज़ेठै हणें हका किछ़ै समझ़दअ।