मूल़ 42

याकबै छ़ाडै आपणैं शोहरू मिसर देशा का ज़िणसा आणदै

1 याकबै बी शूणीं एही गल्‍ला कि मिसर देशै आसा नाज़, तेऊ बोलअ आपणैं शोहरू लै, "इधी घअरै बेशी एकी दुजे मुंहां भाल़ी किज़ै च़ाल्‍लअ तम्हां भेटी?

2 "मंऐं शूणीं गल्‍ला कि मिसर देशै आसा नाज़। तम्हैं बी डेओआ संघा आणा तिधा का ज़िणस लई, ताकि हाम्हैं भुखै नां मरे।" ✝42:2 शधा. 7:12

3 तेखअ आऐ युसुफे तिंयां दस भाई मिसर देशा लै कि तिंयां तिधा का नाज़ मोलै निंए।

4 पर याकबै निं आपणअ सोभी का कान्हअ शोहरू युसुफो भाऊ बिन्यामीन तिन्‍नां संघै छ़ाडी, किल्हैकि तेऊ रहा त तेऊओ फिकर कि तेऊ संघै निं लोल़ी किज़ै हुअ।

5 नकाल़े मार पल़ी कनान देशै बी खास्सी अर खास्सै मणछ आऐ कनान देशा का मिसर देशा लै नाज़ा लंदै अर तिन्‍नां संघै आऐ इज़राईले तिंयां दस शोहरू बी। ✝42:5 शधा. 7:11

6 युसुफ त मिसर देशो माहा मंत्री, नाज़ा बेच़णें ज़िम्मैंबारी बी थिई तेऊ का, तेऊए तिंयां भाई बी आऐ तेऊ सेटा लै संघा किई धरनीं उटअ पल़ी तेऊ सेटा ढाल।

7,8 तिन्‍नैं निं युसुफ बछ़ैणीं, पर युसुफै हेरै तिंयां तेभी बछ़ैणीं, पर तेऊ किअ इहअ दखाअ कि सह निं तिन्‍नां बछ़ैणदअ, संघा लागअ तिन्‍नां संघै करेर्हुई करै गल्‍ला करदअ। तेऊ पुछ़अ तिन्‍नां का, "तम्हैं किधा का आसा आऐ दै?"

तिन्‍नैं बोलअ, "हाम्हैं आसा कनान देशा का इधा लै नाज़ा लंदै आऐ दै।"

9 तिन्‍नें बारै युसुफा ज़ुंण सुपनअ हुअ त, युसुफा फिरी तेभै सह आद संघा बोलअ तिन्‍नां लै, "तम्हैं आसा भेख लणैं आल़ै! तम्हैं आसा इहअ थोघ करदै आऐ दै कि म्हारै देशे कमज़ोरी कै आसा।"✝42:9 मूल. 37:5-10

10 तिंयां लागै बोल्दै, "नांईं ओ मालक नांईं, हाम्हैं आसा तेरै दास इधा लै ज़िणसा लंदै आऐ दै। 11 हाम्हैं निं भेख लणैं आल़ै आथी, हाम्हैं आसा मानदार अर हाम्हैं आसा आप्पू मांझ़ै सक्‍कै भाई।"

12 युसुफै बोलअ भिई, "नां, इहअ निं हई ई सकदअ, तम्हैं आसा पाक्‍कै दी म्हारै एऊ देशो इहअ भेख लंदै आऐ दै कि एऊ देशे कमज़ोरी कै आसा।"

13 तिंयां लागै तेखअ सारी गल्‍ला खोज़दै, "मालक, हाम्हैं आसा म्हारै बाबे बारा शोहरू, सोभी का कान्हअ शोहरू आसा कनान देशै म्हारै बाबा सेटा ज़िधी म्हारअ घअर आसा अर तेऊ का ज़ेठअ आसा गअ द ज़ांऐं गछ़ी।"

14 युसुफै बोलअ तिन्‍नां लै, "ज़ुंण गल्‍ल मंऐं बोली सह ई आसा असली, तम्हैं आसा भेख लणैं आल़ै।

15 "ऐबै लाणअ मुंह एतो थोघ कि असली दी तम्हैं आसा कुंण। मंऐं काढै मिसर देशे माहा राज़ेए सोह कि ज़ेभै तैणीं थारअ सोभी का कान्हअ शोहरू इधी निं एछे, तेभै तैणीं निं तम्हैं इधा का डेऊई सकदै।

16 "तम्हैं छ़ाडा आप्पू मांझ़ै एकी ज़ण्हैं घअरा लै तेऊ कान्हैं भाऊ आणदै, बाकी होर रहणैं तेभै तैणीं इधी कैदखाने दी। तेखअ लागणअ थोघ कि तम्हैं शुचै आसा कि नांईं। मंऐं काढै मिसर देशे माहा राज़ेए सोह, ज़ै थारअ कान्हअ भाऊ इधी निं पुजअ, तै हेरनअ मुंह ज़ाणीं कि तम्हैं आसा भेख लंदै ई आऐ दै।"

17 युसुफै डाहै तिंयां चिई धैल़ै तैणीं सपाहीए पहरै दी।

18 चिऊथै धैल़ै शादै तिंयां युसुफै आप्पू सेटा लै संघा बोलअ इहअ, "हुंह आसा बिधाता का डरनै आल़अ मणछ, तम्हां लै दैणअ मुंह बच़णेंओ एक मोक्‍कअ।

19 "ज़ै तम्हैं सच्च़ी मानदार आसा, तै करा इहअ, तम्हां मांझ़ै रहा एक भाई इधी कैदखाने दी अर बाकी डेओआ घअरै आपणैं टबरा लै ज़िणस लई।

20 "पर आपणअ कान्हअ भाऊ हुअ तम्हां मुंह सेटा पजैल़णअ, तैही लागणअ मुखा थोघ कि तम्हैं आसा मानदार अर तम्हैं जाणैं तेखअ मरनै का बच़ी।"

तिन्‍नां सोभी पल़ी अह गल्‍ल मनणी, 21 तेखअ लागै एकी-दुजै का बोल्दै, एथ निं कोई बैहम कि हाम्हैं आसा आपणैं भाऊ युसुफे दोशी, हाम्हां का शुझुअ त आपणीं आछी कि सह पल़अ खरी दी, लेरा लाई-लाई त सह हाम्हां लै बोल्दअ लागअ द कि धख झींण ता करा, मुंह छ़ाडा, पर हाम्हैं निं तेऊए एक शूणीं। आझ़ लागअ बै तेतो फिटक अर सह खरी पल़ी ऐबै हाम्हां लै।

22 रूबेन लागअ तेखअ तिन्‍नां लै बोल्दअ, "मंऐं समझ़ाऊऐ तै तम्हैं कि इहअ पाप निं करा, पर तम्हैं निं मेरी शूणीं, ऐबै लागणअ हाम्हां आपणैं भाऊ मारनैओ फल भुगतणअ।"✝42:22 मूल. 37:21,22

23 युसुफै हआ त तिन्‍नां संघै गल्‍ला करना लै एक होर तर्ज़ुमै करनै आल़अ डाहअ द, ज़ुंण तिन्‍नें बोली ज़ाणा त। तिहअ करै ज़ाणअ तिन्‍नैं इहअ कि अह निं म्हारी बोली फैल़दअ।

24 युसुफ डेऊअ तिन्‍नां सेटा का पोर्ही संघा लागअ लेरा लांदअ। पर तेखअ आअ सह तिन्‍नां सेटा भिई संघा लागअ तिन्‍नां संघै गल्‍ला करदअ। तेखअ किअ शमौन तेभी तिन्‍नां सम्हनै कैद।

युसुफे भाई आऐ कनान देशा लै फिरी

25 तेखअ किअ तिधी कामां करनै आल़ै लै युसुफै हुकम कि इने खाल्हल़ी भरा नाज़ा करै अर इना सोभिए ढब्बै बी डाहै इने ई खाल्हल़ी दी। बाता लै दैऐ इना सोभी लै खाणां-पिणां लै बी। ज़िहअ युसुफै बोलअ तिन्‍नैं किअ तिहअ ई।

26 तिन्‍नैं सोभी भाई लादी तेखअ आपणीं खाल्हल़ी गाधै प्रैंदै संघा लागै मिसर देशा का घअरा लै हांढदै।

27 बाता ज़िधी तिन्‍नैं बैल़ी बशैघ किअ, तिधी दैनअ एकी आपणीं खाल्हल़ी का नाज़ काढी गाधै लै। नाज़ा काढदी बारी भाल़ै तेऊ कि तेऊए ढब्बै तै खाल्हल़ीए मुंडै नाज़ा जैंदरी! 28 तेऊ बोलअ तिन्‍नां होरी भाई लै, "मेरै ढब्बै ता इधी आसा! इधी भाल़ा नाज़ा जैंदरी खाल्हल़ीए मुंडै।"

तिन्‍नां छ़ुटी डरै काम्मणीं संघा लागै एकी दुजे मुंहैं भाल़ै, संघा बोलअ तिन्‍नैं इहअ, "बिधाता हाम्हां संघै अह किज़ै किअ?"

29 ज़ांऊं तिंयां कनान देशै पुजै, तिन्‍नैं खोज़ी घअरै पुजी आपणैं बाब याकबा का सारी गल्‍ला कि हाम्हां संघै हुअ इहअ-इहअ, 30 "ज़ुंण मणछ मिसर देशै राज़ करा तेऊ किअ हाम्हां संघै बडअ काठअ बभार। तेऊ बोलअ हाम्हां लै कि हाम्हैं आसा भेख लणैं आल़ै।

31 "हाम्हैं थकै तेऊ लै बोली-बोली कि हाम्हैं आसा मानदार मणछ हाम्हैं निं भेख लणैं आल़ै आथी।

32 "हाम्हैं खोज़अ तेऊ का इहअ बी कि हाम्हैं आसा आप्पू मांझ़ै भरैर अर हाम्हैं आसा एकी बाबे बारा शोहरू, एक भाई गअ म्हारै ज़ांऐं गछ़ी अर सोभी का कान्हअ आसा बाबा सेटा घअरै कनान देशै।

33 "तेखअ बोलअ तेऊ हाम्हां लै, ‘हुंह भाल़ूं कि तम्हैं मानदार आसा कि नांईं। आपणैं एकी भरैरा डाहा इधी मुंह सेटा, संघा एछा घअरै आपणैं टबरा लै ज़िणस पजैल़ी, 34 पर तेऊ कान्हैं भाई पजैल़ै इधी मुंह सेटा, तै ज़ाणूं हुंह कि तम्हैं आसा मानदार अर तम्हैं निं भेख लणैं आल़ै आथी। तेखअ छ़ाडूं हुंह थारै एऊ भाऊ पोर्ही। तेखअ सका तम्हैं एऊ देशै बपार बी करी।’"

35 ज़ांऊं तेखअ तिंयां आपणीं-आपणीं खाल्हल़ी तेरैल़दै लागै, तिन्‍नैं भाल़अ कि तिन्‍नें ढब्बे थैल्‍लू आसा तिन्‍नें खाल्हल़ीए मुंडै नाज़ा जैंदरी। तेता भाल़ी छ़ुटी तिन्‍नां सोभी अर याकबा डरै काम्मणीं।

36 तेखअ लागअ याकब इहअ बोल्दअ, "तम्हैं लाअ हुंह ऐबै शोहरू बाझ़ी करी, युसुफ निं रहअ, शमौन बी डाहअ तम्हैं शोटी, ऐबै लाअ तम्हैं बिन्यामीन निंईं! ईंयां सारी खरी आई ऐबै मुल्है ई।"

37 तेखअ लागअ रूबेन बोल्दअ, "बाबा, तूह निं फिकर करै, ज़ै हाम्हैं बिन्यामीना ताह सेटा लै बापस निं आणे, तूह पाऐ मेरै दुही शोहरू आपणैं हाथै मारी। ज़ीबाण, ऐहा गल्‍लो फिकर निं तूह करै बिन्यामीना दै हाम्हां संघै एछणैं।"

38 पर याकबै बोलअ इहअ, "हुंह निं मेरै शोहरू बिन्यामीना तम्हां संघै उंधै मिसर देशा लै छ़ाडदअ। एऊओ भाई ता आसा पैहलै ई मरी गअ द, ऐबै आसा अह एक्‍कै रहअ द।

"हुंह गअ ऐबै प्रोढअ हई, ज़ै बाता एऊ संघै किज़ै होए, तेऊ दुखै निखल़णअ मेरअ शाह अर एते ज़िम्मैंबार हणैं तम्हैं सोभै।"