1 सह आदमी अर तेऊए बेटल़ी लागै आजू रहंदै बस्सदै संघा हुअ तिन्‍नों एक शोहरू। ज़नानी बोलअ इहअ, "एऊ शोहरू नाअं डाहणअ मुंह कैन किल्हैकि मुंह भेटअ अह शोहरू बिधाता का।"

2 तेऊ शोहरू बाद हुअ तिन्‍नों एक होर शोहरू, तेऊ नाअं डाहअ तिन्‍नैं आबल। आबल बणअ डागै-चैणें हेल़्ही फुआल अर कैन लागअ ज़ैगा-ज़िम्मीं खटदअ।

3 एकी धैल़ै हुअ इहअ कि कैनै आणी आपणीं ज़िम्मींए पज़ैआ मांझ़ै बिधाता सेटा भैंट।

4 आबलै बी दैनी आपणैं चैणें हेल़्ही मांझ़ै भैंट, तेऊ काटअ पैहलअ हुअ द मिम्मूं ज़ुंण सोभी का बधिया थिअ। बिधाता हुअ तेऊए भैंटा करै खुश। ✝

5 पर कैन अर तेऊए भैंट निं बिधाता मनी। इहअ करै आई कैना बेघै खास्सी रोश्शै अर तेऊ शेऊअ आपणअ मुंह। 6 बिधाता बोलअ कैना लै, "ताह किल्है आई एही रोश्शै, अर तंऐं किल्है डाहअ आपणअ मुंह शेऊई? 7 ज़ै तंऐं राम्बल़अ किअ हंदअ, तै हणअ त तेरअ मुंह खिल्‍लअ द। तंऐं किअ कशूर अर पाप आसा ताह धेल़णा-च़िरना लै बराघा ज़िहअ ताखुअ द। पाप च़ाहा ताह बरैबाद करनअ, पर तूह करै तेऊ आपणैं काबू दी।" 8 कैनै बोलअ आपणैं भाऊ आबला लै, "च़ाल्‍ल हाम्हां डेऊणअ पोर्ही खेचा बाखा लै*।" ज़ांऊं तिंयां दूर सरलै दहल़ै थिऐ, कैनै पाअ आपणअ भाऊ आबल मारी।✝

9 ज़ांऊं इहअ हुअ, बिधाता पुछ़अ कैना का, "तेरअ भाऊ आबल किधी आसा?" कैनै दैनअ ज़बाब, "मुखा निं थोघै, हुंह कै तेऊ पहरी आसा?" 10 बिधाता बोलअ तेऊ लै, "तंऐं इहअ घोर पाप किल्है किअ? तंऐं पाअ आपणअ भाऊ मारी अर तेऊओ लोहू बगअ धरती दी। तेऊए लेरा-पकार पुजी मुंह सेटा कि ऐबै दैंऊं हुंह ताल्है तेते सज़ा।✝

11 "ताह लागणअ एतो फिटक किल्हैकि तंऐं पाअ आपणअ भाऊ मारी अर तेऊओ लोहू बगअ धरती दी, ऐबै हणअ ताह धरती दी खटणअ कठण।

12 "ऐबै च़ाऐ तूह ज़िम्मीं-ज़ैगा खटे बी तैबी निं ताह तेते पज़ैआ का इहअ किछ़ै भेटणअ। तेरअ निं आझ़ा पोर्ही घअर बार हणअ अर आजूए ज़िन्दगी हणीं तेरी ज़ैगै-ज़ैगै रिंगी करै खतम।"

13 तेखअ पाई कैनै बिधाता सेटा पकार, "अह सज़ा निं मेरै ज़िर्हुई च़ाल्‍ली। 14 तंऐं लाअ हुंह मेरै घअरा अर आप्पू का दूर रहंदअ छ़ाडी। हुंह हणअ घअरा छ़ाडी सारै देशै ठुल़्दअ अर मुंह सका कज़ोहै पाई मारी।"

15 बिधाता बोलअ, "नां, ज़ै कुंण ताह मारे तेऊ लै दैणीं मुंह ताखा बी सात गुणा ज़ादी सज़ा।" तेखअ लाअ बिधाता कैना दी एक नछ़ैण कि तेता भाल़ी होर लोग तेऊ नांईं मारे।

16 इहअ करै लागअ कैन बिधाता सेटा का हांढदअ संघा पुजअ सह अदने पुर्बा दिशा बाखा नोद* नाओंए ज़ैगा संघा लागअ तिधी रहंदअ।

17 बादा का हुअ कैन अर तेऊए लाल़ीओ एक शोहरू तेऊ नाअं थिअ हणोक। तेखअ बसाऊई कैनै आपणैं शोहरूए नाओंआं करै हणोक नाओंए एक नगरी। 18 हणोको हुअ आजू ईराद नाओं शोहरू, ईरादा का हुअ आजू महूयाएल, अर तेऊओ हुअ आजू मतूशेल, अर तेऊ का हुअ आजू लेमेक।

19 लेमेकै किअ दूई बेटल़ी संघै बैह, एकी नाअं थिअ आदा अर दुजी नाअं त सिल्‍ला।

20 आदा का हुअ याबाल, सह आसा तिन्‍नां लोगो दाद-बाब ज़ुंण खिम्भा दी रहा तै अर आपणअ ज़िऊंण करा तै तिंयां डागै-चैणैं धाची करै।

21 याबाले भाऊ नाअं थिअ यूबाल सह आसा तिन्‍नां लोगो दाद-बाब ज़ुंण बींन-बशूरी बाज़ा तै।

22 सिल्‍ला का बी हुअ तूबल-कैन नाओं एक शोहरू। सह हुअ कांस्सअ अर लोहे सोभी तिछै चाणां बणाणैं आल़अ। तेऊए ती एक च़ेई बी तैहा नाअं त नामाह। 23 एकी धैल़ै बोलअ लेमेकै आपणीं दुही लाल़ी आदा अर सिल्‍ला का,

"मेरी गल्‍ला शूणां,

एक ज़ुआन मणछ

करा त मुंह तंग

अर सह पाअ मंऐं मारी।

24 ज़ै कुंण कैना मारे

तेऊ भेटणीं सात गुणा सज़ा,

तेखअ ज़ै कुंण मुंह लेमेका मारे

तेऊ भेटणीं सत्तर गुणा सज़ा।"

25 आदमी अर तेऊए लाल़ी का हुअ एक होर शोहरू। तिन्‍नैं डाहअ तेऊ नाअं इहअ बोली शेत, "बिधाता दैनअ आबले ज़ैगा हाम्हां लै एक होर शोहरू, ज़ुंण तेऊए भाई कैनै मारी पाअ त।"✝

26 बादा का ज़ांऊं शेत ज़ुआन हुअ तेऊओ हुअ शोहरू तेऊ नाअं डाहअ तेऊ एनोश। तधा पोर्ही लागै लोग बिधाता का प्राथणां करदै।