1,2 ज़ेऊ ज़मानै इज़राईली प्रैंदै पांच़ो राज़ थिअ, तेऊ ज़मानै पल़अ एकी बारी देशै घोर नकाल़। यहूदा मुल्खे बेतलेम नगरीओ एलीमोलक नाओं एक मणछ डेऊअ आपणीं बेटल़ी अर दूई शोहरू संघा निंईं मोआब देशा लै संघा बस्सअ तिधी।✝1:1-2 मिक. 5:2; 1 इति. 4:4 एलीमोलक थिअ एप्रात खिंबा का अर तेऊए लाल़ी नाअं थिअ नाओमी, तिन्‍नें तै दूई शोहरू मलोन अर कलोन। 3 मोआब देशै रहंदी मूंअ नाओमीओ लाल़अ एलीमोलक पोर्ही, पिछ़ू छ़ुटै नाओमी अर तेसे दूई शोहरू। 4 तिन्‍नैं दूई शोहरू किअ मोआब देशे शोहरी संघै बैह*1:4 शोहरी संघै बैह इज़राईली नांईं तै आपणीं टोली छ़ाडी कनानी ज़ेही होरी ज़ाती संघै बैह करदै थिऐ, किल्हैकि बधाना दी थिई इहअ करना लै नांह।, एकी नाअं त ओरपा अर दुजी नाअं त रूत। तेता बाद रहै तिंयां तिधी कोई दस साला तैणीं। 5 तेता बाद मूंऐं नाओमीए तिंयां दूई शोहरू मलोन अर कलोन बी अर ऐबै नां नाओमीओ लाल़अ रहअ अर नां शोहरू रहै।

6 थोल़ै धैल़ै बाद खोज़अ मोआब देशै कुंणी नाओमी का इहअ कि बिधाता दैनी आपणीं परज़ा इज़राईली लै एही बर्गत कि तिन्‍नें हुई खास्सी साल-फसल। तेखअ डाही नाओमी आपणीं दुही नुशा संघी मोआब देशा का बापस आपणैं देशा लै एछणें। 7 नाओमी आपणीं दूई नुशा संघै यहूदा बाखा लै हांढदी लागी दी, पर बाता लागी सह आपणीं दुही नुशा लै इहअ बोल्दी, 8 "शोहरीओ, मेरअ दिल बोला इहअ कि तम्हैं डेओआ आपणैं पेऊकै लै बापस। तम्हैं झ़ूरा ती मेरै शोहरू लै खास्सी ज़ुंण मरी डेऊऐ, अर मुल्है बी करा तम्हैं खास्सी झींण। मेरी आसा बिधाता का एही अरज़ कि तम्हां लै लोल़ी ती तेऊ खास्सी झींण किई। 9 तम्हां लोल़ी तै दुही बधिया घअर भेटै ज़िधी तम्हैं आपणैं लाल़ै संघै मौज़ी रहे।"

नाओमी दैनी तिन्‍नां दुही लै मल़्हैची अर तिंयां दुहै नुशा लागी ज़ोरै-ज़ोरै लेरा लांदी नाओमी लै बोल्दी, 10 "हाम्हैं निं पेऊकै च़ाल्‍ली डेऊई! हाम्हां डेऊणअ ताह ई संघै अर रहणअ बी तेरै ई लोगा जैंदरी।"

11 पर नाओमी बोलअ तिन्‍नां लै इहअ, "मेरी शोहरीओ, तम्हां हुअ आपणैं पेऊकै लै डेऊणअ! मुंह संघै एछी किज़ै लाअ तम्हैं करी? मेरै निं ऐबै होर शोहरू हई च़ाल्‍लै कि तम्हां लै मर्ध होए!✝1:11 मूल. 38:11; बधा. 25:5 12 तैही बोला हुंह तम्हां लै मेरी शोहरीओ, तम्हैं फिरा घअरा लै बापस, भिई बैहा करना लै बी गई हुंह खास्सी प्रोढी हई। ज़ै मेरै आझ़ हणैं-ज़ाणें आशा बी हंदी अर आझ़ ज़ै हुंह बैह बी करदी अर बादा का मेरै शोहरू बी हंदै, तम्हां निं तेतो बी किछ़ै फाईदअ हणअ! 13 तम्हैं कै तिन्‍नां ज़ुआन हंदी न्हैल़ी च़ाल्‍ली लागी? एता पिछ़ू तम्हां होर बैह करनअ ई निं आथी? मेरी शोहरीओ, तम्हां का आसा थोघ कि इहअ निं हई ई सकदअ। बिधाता पाई मुल्है घोर मार अर मेरअ दुख आसा थारै दुखा का खास्सअ।"

14 तिंयां लागी दुहै ज़ण्हीं भिई ज़ोरै-ज़ोरै लेरा लांदी। खिरी डेऊई ओरपा आपणीं शाशुई नाओमी लै मल़्हैची दैई फिरी, पर रूत रही आपणीं शाशुई नाओमी ई संघै। 15 नाओमी बोलअ तेखअ तैहा लै इहअ, "रूत, बेटीऐ तेरी ज़ठाणीं, च़ाल्‍ली भाल़ आपणैं पेऊकै आपणैं लोगा अर आपणैं देअआ सेटा लै बापस डेऊई। तूह बी डेऊ ऐहा ई संघै फिरी।"

16 रूतै दैनअ आपणीं शाशुई लै इहअ ज़बाब, "ज़ीबाण, मुल्है निं आप्पू छ़ाडी पेऊकै फिरी डेऊणा लै बोली! मुंह दै आप्पू संघै एछणैं। ज़िधा लै तूह डेओए, मुंह डेऊणअ ताह संघै तिधा लै अर रहणअ बी मुंह तिधी ज़िधी तूह रहे। ज़ुंण लोग तेरै आसा, मेरै बी हणैं तिंयां ई अर ज़ुंण परमेशर तेरअ आसा सह ई हणअ मेरअ बी परमेशर।✝1:16 2 शमू. 15:21 17 ज़िधी तूह मरे, मुंह बी मरनअ तिधी अर दाबी बी लोल़ी हुंह तिधी ज़िधी लोग ताह दाबै। मुल्है लोल़ी बिधाते घोर सज़ा पल़ी ज़ै हुंह मौता का सुआई किज़ू होरी गल्‍ला पिछ़ू ताखा ज़ुदी होए।"

18 ज़ांऊं नाओमी ज़ाणअ कि रूत निं संघा डेऊणैं का पिछ़ू हटणै आल़ी आथी, अर तेखअ निं तैहा सह ज़ोरा-ज़ोरी बापस छ़ाडी। 19 तेखअ लागी तिंयां दुहै ज़ण्हीं आजू हांढदी संघा पुजी बेतलेम नगरी। तिधी पुजी ज़ांऊं नगरीए लोगा का थोघ लागअ कि तिंयां आई, अर सारै दी लागी तिन्‍नें ई बारै गल्‍ला अर बेटल़ी लागी इहअ बोल्दी, "अह सच्च़ी नाओमी आसा?"

20 नाओमी बोलअ तिन्‍नां लै इहअ, "मुल्है निं नाओमी बोला, मुल्है बोलअ मारा किल्हैकि बिधाता दैनअ मुल्है खास्सअ दुख। 21 इधा का डेऊंदी बारी ती हुंह भरी पूरी, पर बिधाता पजैल़ी हुंह रित्तै हाथै बापस। बिधाता ज़हा का सारअ बल आसा, ज़ै तेऊ हुंह घोर आफ़ता दी आसा पाई दी*1:21 घोर आफ़ता दी आसा पाई दी नाओमी थिई बडी दुखी मनै बच़ार करदी लागी दी कि बिधाता ज़ो ईंयां दुख मुल्है पाऐ तिंयां पाऐ तेऊ मुल्है मेरै पाप करनै पिछ़ू। , तै किल्है बोला तम्हैं मुल्है नाओमी?"✝1:21 आयू. 1:21

22 इहअ करै आई नाओमी आपणीं मोआबी नुशा रूता संघै आपणैं देशा लै बापस फिरी। ज़ांऊं तिंयां बेतलेम नगरी पुजी, लोग गऐ तै ज़ौआ लऊंदै लागी।