रूत 2

बोआज़े खेचै किअ रूतै काम

1 नाओमीओ त एक रिश्तैदार तेऊ नाअं त बोआज़, सह थिअ मनअ-तनअ द अर सह आसा एलीमोलके ई टबरा मांझ़ा का।✝2:1 लेब. 19:9; बधा. 24:19 2 एकी धैल़ै बोलअ मोआबण रूतै आपणीं शाशुई नाओमी लै, "मुंह दै कसरै खेचै डेऊणैं, तेता का आणू हुंह तिन्‍नां नाज़े सीला च़ुंघी ज़ुंण लऊंणै आल़ै का पिछ़ू छ़ुटा।"

नाओमी बोलअ, "तूह लाग डेऊंदी।"

3 तेखअ डेऊई रूत एकी खेचै संघा लागी लऊंणै आल़ै पिछ़ू धरनीं छ़ुटै दै नाज़े सीला च़ुंघदी। सह हुअ इहअ सजोग कि सह खेच त कुदरती एलीमोलके टबर बोआज़ो खेच।

4 तेतरी आअ बोआज़ बेतलेम नगरी आपणैं घअरा का खेचा लै आप्पै संघा किअ कामां करनै आल़ै लै इहअ बोली नमस्ते, "बिधाता लोल़ी तम्हां संघै रहअ।" ✝2:4 भज. 129:7

लऊंणै आल़ै दैनअ ज़बाब, "बिधाता लोल़ी तम्हां लै खास्सी बर्गत दैनी।"

5 बोआज़ै ज़ांऊं रूत भाल़ी, तेऊ पुछ़अ आपणअ सह दास ज़ुंण कामां आल़ै भाल़अ त डाहअ द, "अह ज़ुआन शोहरी कुंण आसा?"

6 तेऊ दासै बोलअ, "अह शोहरी आसा परदेसी नाओमी संघै मोआब देशा का आई दी। 7 ऐहा शोहरी बोलअ मुल्है, ‘मुंह दै लऊंणै आल़ै पिछ़ू-पिछ़ू नाज़े काशी जैंदरी सील च़ुंघणैं।’ अह आसा दोत्तकी आई दी अर एभै तैणीं आसा इधी सीला च़ुंघदी लागी दी। ऐहा किअ सिधअ धख घल़ी राम।"

8 बोआज़ै बोलअ रूता लै, "हे बेटीऐ, शुण, तूह रहअ इधी मेरी इना होरी दासी संघै सीला च़ुंघदी लागी, ओर्ही-पोर्ही निं होरीए खेचै डेऊंदी लागी, 9 ज़हा खेचै बी ईंयां लऊंदी लागे, तूह डेऊऐ तेऊ ई खेचा लै। मंऐं डाहअ इना सोभी आदमी लै बोली कि ताह तंग करदै निं लागी। ज़ेभै ताह चिशै एछे, तूह झुटै इना भांडै का पाणीं ज़ुंण इनै आसा भरी डाहै दै।"

10 रूतै टेक्‍कअ धरनीं उटी पल़ी माथअ, संघा बोलअ बोआज़ा लै इहअ, "हुंह आसा परदेसी, इहअ थोघ हंदी बी किअ तंऐं मेरअ खैल, तंऐं झ़ाणीं मुल्है एतरी भलाई किल्है सोठी होए?"

11 बोआज़ै दैनअ ज़बाब, "आपणैं लाल़ै मरनै बाद तंऐं आपणीं शाशुईए केही च़ाकरी किई, मंऐं शूणीं तिंयां गल्‍ला। मुखा आसा थोघ कि तूह केही आई आपणैं ईजा-बाबे घअर, रिश्तैदार अर आपणैं देशा छ़ाडी अर ऐबै केही आसा तूह तिन्‍नां मणछा मांझ़ै रहंदी लागी दी ज़ुंण तंऐं आझ़ तैणीं निं भाल़ै। 12 हुंह करा बिधाता का एही अरज़ कि तेऊ लोल़ी तेरै तेऊ कामों फल ताल्है दैनअ। ऐबै आसा तूह इज़राईले परमेशर बिधाते शरणा आई दी, हुंह करा ताल्है तेऊ का एही अरज़ कि तेऊ लोल़ी ताल्है खास्सी बर्गत दैनी।"✝2:12 भज. 17:8; 91:1

13 रूतै दैनअ तेऊ लै ज़बाब, "मेरै मालक, तेरी हुई मुल्है खास्सी झींण। एही ता निं हुंह तेरी इना दासी बराबर आथी पर तज़ी बी किई तंऐं भली गल्‍ला करी मेरअ शाह हल़कअ।"

14 क्लारी खाणें बेला बोलअ बोआज़ै रूता लै, "इधी खा हाम्हां संघै रोटी, इधी खा मिल्‍लै रसा दी च़ोक्‍की करै म्हार।" तेखअ बेठी सह तिन्‍नां कामां आल़ै संघै। बोआज़ै दैनअ तैहा लै भोश खाणां लै। तैहा खाऐ रज्ज़ी अर धख बच़अ तैहा का एही पै। 15,16 तेखअ डेऊई सह भिई सीला च़ुंघदी, बोआज़ै डाहअ आपणैं कामां आल़ै का इहअ बोली, "ऐहा दैआ काशी जैंदरा का बी सील च़ुंघणैं अर ऐहा लै निं नांह करी। पर काशी पूरी हणैं का बाद करा धख सील धरनीं एही बी शोटी करी ताकि सह तेता आप्पू लै च़ुंघे।"

17 इहअ करै रही रूत उडै तैणीं सीला च़ुंघदी लागी, पूणीं फल़ाक्‍की करै निखल़ै कोई एक मण ज़ौ*2:17 एक मण ज़ौ कोई 12-16 किलू। 18 तैहा निंयं सह नाज़ नगरी लै संघा रहैऊअ आपणीं शाशुई का कि तैहा केतरै झाल़ै। ज़ुंण क्लारी तेसे भोश अर रोटी बच़ी ती, तिंयां बी दैनी तैहा आपणीं शाशुई लै। 19 नाओमी लागी रूता पुछ़दी, "आझ़ अह एतरअ नाज़ तंऐं किधा का झाल़अ? तूह कसरै खेचै ती डेऊई दी? परमेशरै लोल़ी ती तेऊ मणछा लै खास्सी बर्गत दैनी ज़ुंणीं ताल्है आपणैं खेचै च़ुंघणैं दैनअ!"

रूतै खोज़अ नाओमी का, कि तैहा च़ुंघै आझ़ एकी बोआज़ नाओंए मणछे खेचा का सील। 20 नाओमी बोलअ आपणीं नुशा लै, "बिधाता लोल़ी बोआज़ा लै खास्सी बर्गत दैनी। बिधाता करा ज़िऊंदै अर मूंऐं दै दुही लै झींण।"

तेखअ खोज़अ नाओमी आपणीं नुशा का, "सह भलअ मणछ आसा म्हारै ई टबरा बाखो, पर अह आसा सह पै ज़हा म्हारी ज़िम्मीं कुआसणेंओ हक आसा।"✝2:20 लेब. 25:25; रूत. 4:4

21 तेखअ लागी रूत मोआबण इहअ बोल्दी, "तेऊ आसा मुल्है इहअ बी डाहअ द बोली, ‘मेरै ई खेचै रहै कामां आल़ै संघै सीला च़ुंघदी लागी ज़ेभै तैणीं लऊंणीं खतम निं होए।’"

22 नाओमी बोलअ रूता लै, "राम्बल़ी हुई बेटीऐ कि तूह तिन्‍नें ई दासी संघा-संघा डेओए, होरीए खेचै कै थोघ लागा कि लोग किज़ै करे।" 23 तेखअ रही रूत ज़ौ अर कणके लऊंणीं खतम हणैं तैणीं बोआज़े दासी संघा-संघा सीला च़ुंघदी लागी, संघा रहा ती आपणीं शाशुई संघै।