जकर्या 1

प्राश्त करा अर बिधाता बाखा फिरा

1 हुंह आसा बेरेक्यो शोहरू ईदूओ पोचअ जकर्या बिधातो गूर।

फारसी राज़ा दी आसा त माहा राज़अ दारा, तेऊए राज़ा दी दुजी साला काती दैनअ बिधाता मुखा समाद।

2 बिधाता बोलअ इहअ, "मुंह बिधाता ती थारै दादा-बाबा लै रोश्शै आई दी, 3 पर ऐबै बोला हुंह तम्हां लै इहअ, ‘मुंह सेटा लै एछा बापस फिरी अर तै एछणअ मुंह बी तम्हां सेटा लै फिरी।’ 4 तम्हैं निं आपणैं दादा-बाबा ज़िहै हआ, तिन्‍नें ज़मानै खोज़अ मेरै गूरै तिन्‍नां का समाद, ‘कदुष्ट काम अर पाप करनअ छ़ाडा।’ पर तिन्‍नैं निं मेरअ शूणअ अर नां मेरअ हुकम मनअ। अह गल्‍ल बोली मंऐं बिधाता ज़ुंण स्वर्गे सारी सैनो मालक आसा। 5 ईंयां आसा खास्सै पराणैं ज़मानें गल्‍ला, थारै तिंयां दाद-बाब डेऊए मरी अर तिंयां गूर बी निं आथी रहै दै। 6 मेरी च़ाकरी करनै आल़ै मेरै गूरा का बोलअ मंऐं थारै दादा-बाबा लै चतैनगी दैणा लै अर मेरअ समाद खोज़णा लै, पर तिन्‍नैं निं तिंयां गल्‍ला मनी अर तेतो नतिज़अ बी पल़अ तिन्‍नां भुगतणअ। तेखअ फिरै तिंयां मुंह सेटा लै बापस अर इहअ बी गअ तिन्‍नां का ज़ाण्हुंई कि मंऐं बिधाता दैनी तिन्‍नें पापा पिछ़ू तिन्‍नां लै सज़ा ज़िहअ मंऐं पैहलै ई त हेरअ द बोली कि मुंह करनअ इहअ।"

लाला घोल़ै प्रैंदै शुंआर मणछ

7 माहा राज़ै दारा ती राज़ करदी दुजी साल लागी दी, तेऊए राज़ा दी तैहा साला इक्‍की च़ौबी माघै किई बिधाता मुंह बेरेक्ये शोहरू अर ईदूए पोचै जकर्या गूरा संघै धैनै-सुपनै भिई गल्‍ला।

8 मुखा शुझुअ राची सुपनै कि कुंण स्वर्ग दूत आसा लाला घोल़ै प्रैंदै बेठअ द। सह घोल़अ आसा एकी खागै मैहंदीए डाल़ा-बूटा जैंदरी खल़्हुअ द अर तेऊ पिछ़ू आसा लाल, भौंरै अर शेते रांगे घोल़ै अर तिन्‍नां प्रैंदै शुंआर।

9 मंऐं पुछ़अ, "मालक, ईंयां घोल़ै किज़ै आसा?"

ज़ुंण स्वर्ग दूत मुंह संघै गल्‍ला करदअ थिअ लागअ द, तेऊ दैनअ मुल्है ज़बाब, "हुंह रहैऊं ताखा कि ईंयां किज़ै आसा।"

10 तेखअ दैनअ मैहंदीए डाल़ा-बूटा जैंदरी खल़्हुऐ दै घोल़ै प्रैंदै शुंआर स्वर्ग दूतै ज़बाब, "बिधाता आसा ईंयां घोल़ै पृथूई लै छ़ाडै दै कि तेथ हर ज़ैगा हांढदै रहे लागी।"

11 तेखअ किई तिन्‍नां घोल़ै प्रैंदै शुंआरै तेऊ स्वर्ग दूता संघै गल्‍ला ज़ुंण मैहंदीए डाल़ा-बूटा जैंदरी आसा त खल़्हुअ द, "हाम्हैं आऐ सारी पृथूई दी हांढ दैई, हाम्हां का शुझुअ इहअ कि सारी पृथूई आसा सोभ देश शांत अर निहंचै।"

12 तेखअ बोलअ तेऊ स्वर्ग दूतै बिधाता लै, "स्वर्गे सारी सैने मालक बिधाता, राज़धानी एरुशलेम अर यहूदा मुल्खे नगरी लै तेरअ रोश्श कधू हणअ फांभअ? तूह आसा तिन्‍नां का पिछ़ली सत्तर साला ओर्ही रुश्शअ द!" 13 तेखअ दैनअ बिधाता हैअ दैई तेऊ स्वर्ग दूता लै ज़बाब ज़ुंण मुंह संघै गल्‍ला करदअ त लागअ द।

14 तेऊ स्वर्ग दूतै बोलअ मुल्है इहअ, "तूह खोज़ सोभी का इहअ कि स्वर्गे सारी सैनो मालक बिधाता बोला इहअ, ‘हुंह झ़ूरा एरुशलेम नगरी लै खास्सअ, अह आसा मेरी पबित्र नगरी। 15 मुंह आसा तिन्‍नां देशा लै खास्सी रोश्शै आई दी ज़ुंण शांत अर निहंचै आसा। थोल़ी घल़ी हटअ हुंह रोश्शै मेरी परज़ा का पिछ़ू अर इनै शरेरै देशै किअ मेरी परज़ो बेअन्त बनाश!

16 "‘तैही बोला हुंह स्वर्गे सारी सैनो मालक बिधाता कि मुंह एछणअ एरुशलेम नगरी लै फिरी कि मुंह ऐहा नगरीए केही खास्सी झींण लागा। मेरअ भबन बणाणअं इधी भिई अर नगरी च़िणनी भिई।’"

17 स्वर्ग दूतै बोलअ मुल्है इहअ कि तूह लऐ लोगा का इना गल्‍ला ज़रूर खोज़ी कि स्वर्गे सारी सैनो मालक बिधाता बोला इहअ, "मेरी ईंयां नगरी हणीं भिई सेठ, मुंह करनी भिई एरुशलेम नगरी लै झींण अर अह नगरी छ़ांटणीं मुंह भिई आप्पू लै।"

च़ार शींग अर च़ार लुहार

18 तेखअ लागअ हुंह उझै भाल़अ अर मुखा शुझुऐ डागे च़ार शींग। 19 ज़ुंण स्वर्ग दूत मुंह संघै गल्‍ला करदअ थिअ लागअ द, मंऐं पुछ़अ तेऊ का, "ईंयां शींग किज़ै आसा?"

तेऊ स्वर्ग दूतै बोलअ मुल्है इहअ, "ईंयां आसा संसारै सोभी का बलबान च़ार देश ज़ुंणीं यहूदा, इज़राईल मुल्ख अर राज़धानी एरुशलेम नगरी का बिधाते परज़ा कैद करी देशै-देशै पजैल़ी।"

20 तेखअ रहैऊऐ बिधाता मुखा च़ार लुहार, तिन्‍नां का आसा च़ार घौण। 21 मंऐं पुछ़अ, "ईंयां किज़ू करदै आऐ?"

तेऊ स्वर्ग दूतै दैनअ ज़बाब, "इनै शींगै छिंगी यहूदा मुल्खे परज़ा देशै-देशै, इनै हंतै तै तिंयां ज़िहै नां किहै। ईंयां लुहार आऐ इना तिन्‍नां शींगा डरैऊंदै अर इना ज़ाक्‍कर्नै तिंयां शींग ज़िहै नां किहै।"