Salmos 122

1 שִׁיר הַֽמַּעֲלוֹת לְדָוִד שָׂמַחְתִּי בְּאֹמְרִים לִי בֵּית יְהוָה נֵלֵֽךְ ׃

2 עֹמְדוֹת הָיוּ רַגְלֵינוּ בִּשְׁעָרַיִךְ יְרוּשָׁלִָֽם ׃

3 יְרוּשָׁלִַם הַבְּנוּיָה כְּעִיר שֶׁחֻבְּרָה ־ לָּהּ יַחְדָּֽו ׃

4 שֶׁשָּׁם עָלוּ שְׁבָטִים שִׁבְטֵי ־ יָהּ עֵדוּת לְיִשְׂרָאֵל לְהֹדוֹת לְשֵׁם יְהוָֽה ׃

5 כִּי שָׁמָּה ׀ יָשְׁבוּ כִסְאוֹת לְמִשְׁפָּט כִּסְאוֹת לְבֵית דָּוִֽיד ׃

6 שַׁאֲלוּ שְׁלוֹם יְרוּשָׁלִָם יִשְׁלָיוּ אֹהֲבָֽיִךְ ׃

7 יְהִֽי ־ שָׁלוֹם בְּחֵילֵךְ שַׁלְוָה בְּאַרְמְנוֹתָֽיִךְ ׃

8 לְמַעַן אַחַי וְרֵעָי אֲדַבְּרָה ־ נָּא שָׁלוֹם בָּֽךְ ׃

9 לְמַעַן בֵּית ־ יְהוָה אֱלֹהֵינוּ אֲבַקְשָׁה טוֹב לָֽךְ ׃