João 11

Kuwe kwa Lachalo

1 Pakibha na mundo jhumo liina lyake Lachalo, jwabhelwikilwe ku muche gwa ku Betaniya atehila kulwalwa. Na kwenio ku Betaniya bhatamita pamonga na akalombo mundo Macha na Maliya. 2 Maliya jwenio ndi jhojho jwampakita mahuta ghighanungila petelele mu magholo gha Bhambo Yecho na kunhunguu kwa majhunjo ghake, na nhwacha mundo Lachalo akibha nga pahe nhwalo atehila kulwalwa. 3 Bhahe, akalombo mundo bhoha, bhajhakutuma lilobhe kwa Yecho, bhalongila, "Bhambo, nkoche gwino jhumumpahile abhii nga pahe tugha."

4 Yecho pajhohina tu malobhe gheniya, ajhakulonge, "Ulwalo ghongo naunkome jhe Lachalo, nambo ulwalo ghongo upitile kwa ung’alicho gwa Chapanga, na Mwana gwa Chapanga alombwe kupete ulwalo ghongo."

5 Yecho akabhapahi Macha na nnombo mundo Maliya pamonga na Lachalo. 6 Yecho pajhohina Lachalo abhii nga pahe, ajhakujhonjekeya machiko mabhele gha kutama kwenio kwakibha. 7 Bhahe, Yecho ajhakwalobholela bhabholwa bhake, "Tubhujhe kabhele ku Yudeya."

8 Bhabholwa bhala ngabhannobholila, "Mmola, machiko ghandina tugha ghughapetite Akayahude bhapata bhankome kwa maghanga, nhwalo gwa nike mipala kujhenda kabhele kwenio?"

9 Yecho ngabhajhangwila, "Bho, muhe ubhii jhe na machaa kome na mabhele? Bhahe, mundo anda atyanga machaa gheniya akobhondoka jhe nhwalo alubhona lumule lwa nnema ghongo. 10 Nambo anda mundo atyanga uhiko ukobhondoka, nhwalo ubhii jhe ukalamuhe." 11 Yecho pajhomolila kulonge gheniya, ajhakwalobholela, "Nkoche gwito Lachalo abhii lughono, nambo nanyenda kung’ang’anula."

12 Bhabholwa bhake ngabhannobholila, "Bhambo, anda atehi kugholoka, bhahe, nalama."

13 Yecho alongila naha, mana jhake Lachalo ajhomwike, nambo bhabholwa bhake bhahambwika Lachalo agholwike lughono tugha. 14 Bhahe, Yecho ajhakwalobholela hotuhotu, "Lachalo ajhomwike, 15 nambo kwa nhwalo gwenio nihanganila, nhwalo nenga nikibha jhe kwenio kupala nnyeketele. Bhahe, tujhende hote kwatamita."

16 Peniya Tomache, pange akemitwa Mabhela ajhakwalobholela bhabholwa bhajhake, "Tujhendengane na Mmola, tukawe na Yecho!"

Yecho ndi uyokecho na ughome

17 Yecho pahikita ku Betaniya, ankolila yegha jha Lachalo ibhekwitwe umambe machiko ncheche ghighapetite. 18 Kuhumii pa chenda jha ku Betaniya ade ku Yeluchalemo, utale gwa kilomita itato tugha, 19 na Akayahude bhamahele bhajhakujhenda kwapepecha malelo Macha na nnombo mundo Maliya nhwalo gwa kuhwelelwa na nhwacha gwabhe.

20 Bhahe, Macha pajhohina Yecho abhii undela kuhika, ajhakujhenda kupengelela koko kundela, nambo Maliya unung’una mundo ajhakuhighalika ukajha. 21 Macha ajhakunnobholela Yecho, "Bhambo, ngamehe pamba, nhwacha gwango ngajhomwike ndeka! 22 Nambo nimanya, ade ngoheno Chapanga nampela chochoha chumunyopa."

23 Yecho ngannobholila, "Nhwacha gwino nayoka."

24 Macha nganyangwila, "Nimanya, nayokechwa kabhele lichiko lela Chapanga nabhayokecha bhubhawile."

25 Yecho ajhakunnobholela, "Nenga ndi nayokecha bhando na kwapela ughome gwenio. Mundo jwanyeketela nenga, anda awile abhehe na ughome, 26 na kila jwabhii na ughome na kunyeketela, nahwe ng’o. Bho, gheniya mughajheketela?"

27 Macha ajhakunyanguu, "Chakaka Bhambo! Nenga nyeketile kubhehe mwenga ndi mwa Kilichitu, Mwana gwa Chapanga, jhuhikite pannema."

Yecho ilela

28 Macha pajhomolila kulonge malobhe gheniya, ajhakujhenda nkate kunkema Maliya nnombo mundo pakiyepela, ajhakunnobholela "Mmola ahikite pamba, na atenda kunkema." 29 Maliya pajhohina gheniya, ajhakujhinuka kajhombe na kunyendelela Yecho. 30 Yecho akibha amela anajhingii ndeka pachenda, akibha koko kwapengelile Macha. 31 Bhahe, Akayahude bhubhakibha nkate bhapepicha Maliya, pubhammonita Maliya ajhinuka kajhombe na kubhoka, bhajhakunkengamila bhahambwika ajhenda kulela ku mambe.

32 Bhahe, Maliya pahikita pabhii Yecho na pammonita, ajhakuntamii makilikite na kunnobholela, "Bhambo, ngamehe pamba, nhwacha gwango ngahwii ndeka!"

33 Yecho panolokiya Maliya abhii mahole chwii, na bhala Akayahude bhubhalongohine helahela bhabhii mahole tyee, Yecho mwojho gwake ujhakubhehe ngolongonde na ajhakuhechuka.

34 Peniya Yecho ajhakwakonya, "Mumekite kojhe?" Bhajhakunyanguu, "Bhambo, nhwike nnole."

35 Yecho ajhakubhehe mahole chwii. 36 Bhahe, Akayahude bhajhakulonge, "Dolokeya, chakampahi Lachalo!"

37 Nambo bhando bhange bhalongila, "Jhonjone jwakanamiche jwangalola jhola, bho, alepelile nike kunhibhilikiya Lachalo akoto kuwegha?"

Yecho iyokecha Lachalo

38 Bhahe, Yecho pakibha amela na ungolongonde kabhele kumwojho gwake, ajhakujhenda ade kumambe, mambe jhela ikibha nkwembe, na iyekelilwe kwa lighanga.

39 Yecho ngalongila, "Kangila hoko lighanga lende!" Macha, ndi nhwacha mundo jwajhomwike jhola, ajhakulonge, "Bhambo, nambo anunga njii nhwalo, machiko ncheche mukuwe kwake!"

40 Peniya Yecho ajhakunnobholela, "Bho, nikanobholile jhe anda nnyeketele namubhona ung’alicho gwa Chapanga?" 41 Bhahe, bhajhakulikangila lighanga kuhupele. Peniya, Yecho ajhakulola miho ghake kunane, ajhakulonge, "Tate, ninomba nhwalo mwenga unyokinikiya nenga. 42 Nimanya machiko ghoha unyokanikiya, nambo nilonge ghanga nhwalo jha bhando bhubhajhemite bhamba, nipala bhanyeketele kubhehe mwenga ndi jhundumita." 43 Yecho pajhomolila kulonge gheniya, ajhakunonoha lilobhe likolongwa ankemita, "Lachalo, mpite panja!" 44 Na jwenio jwakawile ajhakupita panja kongo mabhoko na magholo ghake ghabhilingilwe chanda ade kumiho. Yecho ajhakwalobholela, "Mumopole ngobho yenio, na muneke ajhende."