1 Mucha ngajhendilila kwalobholela Akaichilahele, "Anda namunnyokanikiya Bhambo Chapanga, Chapanga gwino nu kuikamuu mihilo jhenio jhinninaghalikiya deleno, jwenio nantenda mme makolongwa hake kupeta ilambo yoha pannema. 2 Anda namunyokanikiya Bhambo Chapanga, Chapanga gwino, mota henge yoha nahibha ino."

3 Bhambo Chapanga, champela mota ku miche jhino na mighonda jhino.

4 Bhambo Chapanga champela mota kukumpe yana hoko na mahuno ghamahele na helahela ng'ombi na mambelele.

5 Bhambo Chapanga champela mota kukumota mahuno ghamahele gha chakulya.

6 Bhambo Chapanga champela mota kwa kila kilebhe chimitenda.

7 Akamakoko bhino anda bhiika kunnyingilila, Bhambo Chapanga nanpelangana makakala ghakwahotola. Anda bhaikite kunnyingilila kwa ndela jhimo, nabhapechengana kwa ndela chaba.

8 Bhambo Chapanga champela mota mu mahengo ghino nu kutweleya ikoko ino mahuno. Champela mota mu kilambo champelangana kubhehe chino.

9 Bhambo Chapanga chantenda mme bhando bhake jwenio ngita chalaghila, anda nanyokanikiya mihilo jhake jwenio Bhambo Chapanga, Chapanga gwino nu kukengama ndela jhake. 10 Bhando bhi ilambo yoha pannema nabhaumanya kubhehe mangota mwe nhaghulilwe kubhehe bhando bha Bhambo Chapanga jwenie, nabhannyoghopa. 11 Bhambo Chapanga nantenda mme na yana twe na ipugho na mahuno mu mighonda, mu kilambo chalaghana na akahoko bhino kubhehe chabhapela. 12 Bhambo Chapanga nannyogholila kihukilo chake chikibhii kunane nu kunkomela ula mu ilambo ino kukipinde chikipalwa, nu kumpe mota mu mahengo ghino. Namuijhaikicha ilambo twe, nambo mangota mijhahika jhe. 13 Bhambo Chapanga, Chapanga gwino, nantenda kubhehe muto na chi nkela jhe, namma bhukutumbula na chi bhukujhomolela jhe. Mijhendelela nnonge na chi kubhujha unyuma anda mwikamuu mihilo jhake jhinimpelangana deleno na mma miho kulenganikiya yenie. 14 Nambo mangaleka ng'o mihilo jhango nu mangaijhinamii jhe ichapanga henge nu kuitumikila.

15 "Nambo anda kunyokanikiya jhe Bhambo Chapanga, Chapanga gwino amu kulenganikiya jhe maha mihilo jhake jhoha na malaghalikilo ghuninalaghalikiya deleno, bhahe, ilebhe henge yoha yanganandela nainkolela."

16 Bhambo Chapanga, Chapanga gwino nampela likoto mu miche jhino na helahela mu mighonda jhino.

17 Bhambo Chapanga naipela likoto mahuno ghino na chakulya chino.

18 Bhambo Chapanga nampela likoto mipapa jhe yana hoko na mahuno ghandina na ng'ombi yandina na mambelele ghandina.

19 Bhambo Chapanga nampela likoto mu kila kilebhe chimihenga.

20 Anda ntei ubhoho na kunkana Bhambo Chapanga, Chapanga gwino, naninetela mang'ahiko na kupoghanika na kuhangabhana mahengo ghino ghoha nu kunkoma kajhombe. 21 Nang'elekana malwalo kila kipinde ade mabhoha nhwengane mu kilambo chenie chinnyenda kutola kubhehe chino. 22 Bhambo Chapanga nambula kwa malwalo ghu kujhambukiya na malwalo ghanganandela na mapute na lulanga lwangapeta na kimbonga na ngongobhe, ilebhe yenie nainkengama ade inkomelekeye. 23 Ula naikoma jhe na nnema naubhaha ngita choma. 24 Bhambo Chapanga naleta kimbonga cha lutukunda na kimbonga cha mihyanga, nakimpulalila ade nanhwa.

25 "Bhambo Chapanga nantenda malepelele akamakoko bhino. Mangota nannyenda kwajhingilila kwa ndela jhimo, nambo nantilangana kwa ndela chaba. Bhando bhoha pibhapakulola ghighampatite nabhanchimwa. 26 Pumpa kuwegha, mituhe jhino naibhaha chakulya cha ijhune ni inyama, napitii jhe mundo jwapakwahaka. 27 Bhambo Chapanga nambulangana kwa mapute ngita chatehila kwa bhando bhuku Michile, yegha jhino jhinijhela iongapute na ilonda yenie kulama jhe, nambo kutughuta kwanga kotoka nantela nhwenako. 28 Bhambo Chapanga nantenda mme magholoka, helahela nantenda mangalola na ulwalo ghukupoghanikwa. 29 Nantyanga kukupapaya papaya muhe anda mangalola hilu mipata jhe kilebhe mu mahengo ghino. Kila kipinde nannponjwa, napitii ng'o mundo jwakuntangatila."

30 Miloa mwikeghe, nambo natolana jhonge mundo. Anda nchengite nyumba, bhando bhange nabhagholoka. Anda mipanda michabibo, bhando bhange bhiuna. 31 Ng'ombi ino naichinjwa kongo mabhene kupeta kulola nambo mipaha jhe hilu kiboma chimo cha nyama jhenie. Maponda ghino ghitolwa kwa makakala kongo mipeta kulola hilu nammujhichilwa jhe. Mambelele ghino nabhapelwa akamakoko bhino na abhii jhe mundo jhukuhoto kuntangatila. 32 Yana ino inalome ni ikeghe naitolwa na bhando bhange kuipeleka kuubhanda kongo makapeta kulola nduu. Kila lichiko milenda pange naibhujha ade miho ghino ghikojhoka, nambo kibhii jhe chimpa kutenda. 33 Bhando bhi kilambo chenge nabhatola mahuno ghino ghunnemite gha kilambo chino namangota mipata jhe kilebhe chochoha, nambo kubhonelwa nu kulaghichwa machiko ghoha, 34 nu kulagha kwino nakuntenda mme makatama ngholoka. 35 Bhambo Chapanga nanchwapula mapute mu majhugwa ghino gheniya mihoto jhe kulama, ghijhenela kuhumii kulototohi ade kulwajho.

36 Bhambo Chapanga nampeleka mangota na akanahota akakolongwa bhino jhumpa kukihaghulila ade kukilambo changakimanya mangota hilu akahokobhino. Na kwenio namtumikila ichapanga jhenge jha mikongo na maghanga. 37 Namangota mibha kilebhe changapalwa, kabhele kilebhe chukupuchwa na kukutende chanake kwa ilambo yoha, kwenio kwapa kumpeleka Bhambo Chapanga.

38 Mipanda mbejho twe nambo mahuno ghandina tu kwa nhwalo madidima ghilya mahuno ghino. 39 Mipanda michabibo nu kuitunja maha, nambo kibhii jhe chimihuna, na hilu kunywe divaye jhake, nhwalo ikokolo ipakulye. 40 Nankola micheitune kila chehemo mu kilambo chino, nambo mikola jhe mahuta gha micheitune, nhwalo micheitune yenie ipakupolota. 41 Nampapa yana inalome ni ikeghe, nambo namuihobhecha nhwalo naitolwa kwa makakala na akamakoko kuhwalo gwa ngondo. 42 Mikongo jha uhohe ghoha na mahuno ghino ghoha, niilegwa na madidima.

43 Akaghene bhibhatama mu kilambo chino nabhajhonjekeka nukubhehe namakakala, nambo mangota mwe mujhendelela kupwetekelela hake. 44 Akaghene nabhannyahikicha mangota, nambo mangota mikola jhe uhotolo gwakwajhahikicha. Bheniya bhibha mitwe nambo mangota mibha mikela.

45 Ilebhe ibhoho yenie yoha naimpatanagana nu kunkengama mangota ade inkomelekeye nhwalo munnyokanikii jhe Bhambo Chapanga, Chapanga gwino nu kuikamuu mihilo jhake jhampiikiye. 46 Nambo gheniya naghanangiya kubhehe Bhambo Chapanga. Ayomii mangota na ibheluko ino yoha, machiko ghoha ghangapeta. 47 Bhambo Chapanga, Chapanga gwino, ngampila mota mu kila kilebhe, nambo mangotamwe ngamutumikila kwa mwojho puupele. 48 Yene namatumikila akamakoko bhapakwaleta kwino Bhambo Chapanga bhambule. Namma na njala na nyota na makengele nu kupelulwa kila kilebhe. Akamakoko bhino nabhanhengecha mahengo majhundupahu ade nhweghe. 49 Bhambo Chapanga naleta kuhumii kutale bhando akakale na mangota mukimanyii jhe kilonge chabhe, nabhannyingila kajhombe ngita matumbuhe. 50 Kilambo chenie china bhando akakale bhanga kiya na bhina lukenja kumiho lyajhoghopa jhe ighogholo amu lyabhone jhe kiya achikangombo, 51 nalilya ipugho ino na ipandwa ino, na mangota nang'ahika kwa njala ade nhweghe. Kinneke jhe kilebhe chochoha hilu divaye hilu mahuta gha micheitune amu ng'ombi amu mambelele ade pumpa kuwegha. 52 Bhando bheniya nabhantindikiya kupala kunhibhilila mu ilambo ino yoha, ade mapamanda ghino matandamaho ghimihobholila, naghatiluka, kila chehemo pikilambo chenio champii Bhambo Chapanga, Chapanga gwino.

53 Kipinde akamakoko chibhapakutindikiya miche jhino, nammabha na njala hake, ade nampala kulye yana ino, yana yampii Bhambo Chapanga, Chapanga gwino. 54 Ata mundo jwatokomii hake nambo hele jhuna malango hake, nabhajhakila akalongo mundo na aanamundo jwapaile na mwana jwabhe jwapakuighala. 55 Hilu nammaghulila jhe ata jhumo pakate jhabhe, nyama jha yana yake yapakulya. Miighiya jhe kilebhe chochoha kipinde chenie chukuntindikiya nu kumbulwa na akamakoko mu ilambo yoha. 56 Ata mwikeghe jwatokomii hake kuliku bhoha, na jhuna malango hake na jhuna ilebhe mbwe, jwangalebhata lwajho lwake pahe na jwabhii lembulembu hake, natenda helahela nanyakila unganamundo jwampahile na mwanamundo munalome na mwikeghe, 57 kipinde chenie chukuntindikilwa nakubhaha na njala hake, ailya pikiyepela mwana mundo kilemba na ngobhekela yake. Imaghulii jhe unganamundo jwampahile amu mwana mundo jhumo jwa yana mundo kumanya.

58 "Anda nukubhehe miho jhe kujhokanikiya mihilo jhenje jhijhandikwe mu kitabo chenje na changaliichimu nu kulilomba liina likolongwa na lyakujhoghowa lya Bhambo Chapanga, Chapanga gwino, 59 bhahe, Bhambo Chapanga nannetela mangota malagho makolongwa na gha kughujhoghowa pamonga niibheluko ino. Helahela nannetela kubhabhula na indondo yangapeta na malwalo ghighakoma. 60 Bhambo Chapanga nannetela kabhele malwalo makolongwa ghala ghinnyogwipa ku Michile, gheniya naghankolela mangota namilama ndeka. 61 Nannetela malwalo gha kila namuna na ghange malagho ghajhandikwe jhe mu kitabo chenje cha malaghalikilo ade ghannyomwole. 62 Pamo nukubhehe mangota mmi twe ngita ndondo yu kunane kwa Chapanga, nambo nanhighalila mandina tu kwa nhwalo mukannyokanikii jhe Bhambo Chapanga, Chapanga gwino. 63 Ngita hela Bhambo Chapanga chahalalii ilebhe inyendela telatela nu kuntenda kubhehe mme twe, nambo jhojho Bhambo Chapanga chahanganii kunnete malwalo ghukunkomangana. Namangota namputwa mu kilambo chenie channyenda kutama ngita chino."

64 Bhambo Chapanga, nantenda mpechengane pakate jha bhando bhi ilambo yoha, kuhumii upande ghumo gwa nnema ade ghonge na kwenio nantumikila ichapanga itengenichwe kwa maghanga na mikongo, ichapanga yenie mangotamwe hilu akahoko bhino bhimanyii jhe. 65 Mitama jhe njelembo hilu chehemo jhino pu kupomolela mu ilambo yenie. Nambo Bhambo Chapanga nampela iholo umwojho nu kulo maha jhe nu kukenyangenya umwojho. 66 Machiko ghoha nantama kukujhoghopa. Muhe na kilo bhando nabhabha na kiholo, kabhele naumanye jhe kubhehe kilabho nanyimuka njelembo. 67 Miojho jhino nidundadunda kwa kiholo kwa kila kilebhe chimpakukibhona. Lukela milonge, mbaha ngaibhii kimiye, pikiika kimiye milonge, mbaha ngaibhe lukela. 68 Bhambo Chapanga, namujhicha kabhele ku Michile kwa mele, kwenio akalaghii kukulonge impeleka kabhe jhe kwenio. Kwenio mijhigha kukichulucha kwa akamakoko bhino kubhehe akabhanda, nambo abhii jhe mundo jwapakunhemela.