1 "Mundo anda abhonikine akomitwe ku mighonga jha kilambo chenio Bhambo Chapanga, Chapanga gwino ampile kibhehe chino, na mangota mmanyii jhe ghane jwankomite, 2 ilongoche na akakenga bhino bhapitila nu kupema kulipa kuhumii pubhii ntuhe ade muche gwapahina. 3 Peniya, ilongoche bha muche gwenio gwa pahina na ntuhe bhitola litohe lya ng'ombi lyangatumbu kuhenga mahengo hilu kuntabha lingolengole. 4 Bheniya nabhahelela nako litohe lyenio kululambo luna kikemba changajhoma mache, nu lulambo lwenio lunalemwa jhe hilu kupanda, kwenio bhilitunyula ntandala litohe lyenie. 5 Akapiya matambiko bhilukolo lwa Akalawe bhipalwa bhabha pena. Bhambo Chapanga, Chapanga gwino akahagwii kupala bhantumikile na kunnyopa Bhambo Chapanga abhape mota bhando kwa liina lyake. Bheniya helahela bhakwete ukindendeke kwa kila nhwalo na mihalo jha makakala. 6 Litohe lyenie pilitunyulwa ntandala, ilongoche bhoha bha muche ghola chikibhii pahina na ntuhe gwenio, nabhakuwa mabhoko ghabhe kwa mache panane jha litohe, 7 nu kulonge kubhehe, ‘Tunkomite jhe mundo jhonjo, hilu jwankomite tummanyii jhe. 8 Mwe ma Bhambo Chapanga, malekekeya bhando bhino bhuku Ichilahele mabhakombwile kuhumii ku Michile. Mangatulolekeya na mangatubhalangila jhe bhando bhino malemwa gha kukoma kwa mundo jwangamalemwa, nambo malekekeya malemwa gheniya.’ 9 Kukutenda yenio mibhe jhe nililemwa ku nhwalo gwa kuwe kwa mundo jwenio, nhwalo nteilingine ghapala Bhambo Chapanga."

10 "Makajhenda kubulana ngondo na akamakoko, na Bhambo Chapanga ampii kwahotola, na kwapukila bhando kwa makakala, 11 anda mundo pakate jhino amwene mwikeghe jhuna kuhalala pakate jha bhando bhabhapukile, na mwe ntenda kumpala kutolana, 12 bhahe, mwe manalome mipalwa kuntola kajhino, na jwenio na achekula muto gwake, aeketa yobho yake, 13 nu kukijhanula ngobho yake yapukilwe nayo. Atama kipinde cha mwehe ghumo kwalele atatemundo na amajhemundo, peniya, mihoto kutolana nukubhehe nhwana gwino. 14 Pukajhomoke gheniya, anda mupahi jhe, minneka mahulo ajhabhule kokoha kwapala, manganchulucha jhe hilu mangantenda jhe ngita mmanda, kwa nhwalo munkoliche hone."

15 "Anda abhii munalome abhii na matala na matala gheniya ghampapii yana inalome, nambo mwana jhukutumbu kubhelukwa chi jwa mwikeghe jwangampala, 16 nambo lichiko lyapakuamula kwape yana yenie uliche, tate jwenio ipalwa jhe kuloleke kumiho, kukumpela mwana jwa mwikeghe jwampala kubhehe mwana jhulitibho nu kumpe ilebhe yamahele na kunneka mwana jwajho jhu mwikeghe jwangapalwa na jwenio ndi mwana jwa litibho. 17 Impala annyeketela mwana jhulitibho, ata ibhehe mwana jwa mwikeghe jwangampala, nu kumpe lipungo lyake lya uliche, kabhele mala pabhele mu ilebhe yake yapalwa kupata.

18 "Anda mundo abhii na mwana jwangannyokanikiya tate mundo amu majhemundo ata ibhehe akatate pibhanchwapula nambo amela ijhoha ndeka, 19 bhahe, majhemundo na tatemundo bhintola nu kuntakalila kwa ilongoche pa litangala lya muche gwenie. 20 Akatate bheniya bhalobholela ilongoche bha muche gwenie kubhehe, ‘Mwana gwito ajhoha jhe ni ukendembuka, apahii jhe kutujhokanikiya na kuhapa nu kulobhela.’ 21 Peniya, bhando bha muche gwenie nabhambula maghanga mwana jwenio ade aweghe. Pena ndi pimpakuibhilikiya ubhoho gwenio pakate jhino mangota. Kila mundo ku Ichilahele naujhoha nhwalo gwenio nu kujhoghopa."

22 "Anda mundo atehii lilemwa lilimpala akomwa na anda akomitwe akongelwa pankongo, 23 ntuhe gwake mwangauleka jhe ujhunjela pankongo ade lukela, nambo munchika lichiko lele. Nhwalo mundo jwajhenjela pankongo abhii pahe jha likoto lya Chapanga. Mangakitenda jhe kilambo champii Bhambo Chapanga gwino kubhehe nilikoto."