1 Henge ndi mota, Mucha mundo jwa Chapanga, jhabhajhopila Akaichilahele kabula jhu kujhomwoka. Ngalongila kubhehe,

2 Bhambo Chapanga ngahika kuhumii kukitombe chuku Chinae,

ngatupitila kuhumii kukitombe chuku Cheile,

ngatulangalila kuhumii kukitombe chuku Palane.

Ngapitii panakate jha maelufo gha akatumiche bha kunane kwa Chapanga,

na mwotu ghujhaka mu lubhoko lwake lwalelo.

3 Bhambo Chapanga ngabhapala bhando bhake,

na kwalonda bhando bhake.

Akatumiche bhake bhu kunane kwa Chapanga kutama pahina na jwenie nukujhokanikiya mabholo ghake,

nu kupata malaghalikilo kubhoka kwabhe.

4 Mucha ngatulaghila kukamuu mihilo,

chenio ndi kilebhe chamaha hake chukututangatila mu kilambo chito.

5 Yene, Bhambo Chapanga ngabhe munahota nkolongwa jhuku Ichilahele,

kipinde ilongoche yabhe pibhakonganika,

na makabila ghoha pighakonganika.

6 Mucha ngalongila kunhwalo gwa likabila lya Leubene.

"Leubene alama hilu angajhomwoka jhe,

na bhando bhake bhangakepa jhe."

7 Kunhwalo jha likabila lya Yuda ngalongila,

Mwe ma Bhambo Chapanga nnyokanikiya ng'uto ya likabila lya Yuda yukupalwa kutangatilwa,

mmujhiche kabhele kwa bhando bhange.

Nkomanile kwa mabhoko ghino mwe ma Bhambo Chapanga nu ubhatangatile kwahoto makoko bhabhe.

8 Kunhwalo jha likabila lya Lawe, Mucha ngalonge,

"Mwe ma Bhambo Chapanga,

nnangiye ghala ghimipala gwino kupeta Ulimo na Thumimo,

kupete akatumiche bhino aka Lawe bhina kunhobholeka,

bhimajhighita kwenio ku Macha.

Makawene kubhehe bhina uchakaka hake ku mache gha ku Meliba.

9 Akalawe ngabhaleka nyumba yabhe,

kupala bhantumikila mbone mwenga,

na bhakalijhokanikii lilobhe lino

na ngabhalikamulila hake lilaghano lino.

10 Likabila la Akalawe bhaibhola ibheluko ya Yakobu mihilo jhino,

bhaabhola bhando bhuku Ichilahele mihilo jhino,

nabhapiya matambiko ghoha ghu kukomelekelwa pa chehemo jha kupiikiya matambiko ghino.

11 Mwe ma Bhambo Chapanga, milipe mota likabila lyabhe libhaha na makakala,

maghajheketele mahengo gha mabhoko ghake,

maghataghila kutale makakala gha akamakoko bhabhe,

bhibhanchimwa bhakoto kujhinuka kabhele."

12 Kunhwalo jha likabila lya Benjamine ngalongila,

Lende ndi likabila lyalipalita Bhambo Chapanga na kulilonda,

jwenio ulilonda muhe jhoha,

na helehela utama pakate jhabhe.

13 Kunhwalo jha likabila lya Uchupo ngalonge,

"Bhambo Chapanga akipela mota kilambo chake,

kwa ula kuhumii kunane kwa Chapanga,

na chembwe ya mache kuhumii pahe jha nnema,

14 bhakapelwa mahuno ghambone ghighajhela kipinde cha lyobha,

na bhakapate mahuno mbwe gha kila mwehe,

15 mahuno ghambone gha itombe ya makacho, ipiya mahuno ghambone,

na mahuno ndii gha itombe ya makacho.

16 Kilambo chake kitwelela ghoha ghighabhii ghambone,

ulumbililwe kwa umbone gwa Bhambo Chapanga,

gwalongile kuhumila mukiheghejha chikijhaka mwotu.

Uteeke ghongo gwaulukila bhando bha likabila lya Uchupo,

nhwalo akibha kilongoche jwa akalongo mundo.

17 Uchupo abhii na makakala ngita likambako lya ng'ombi,

manyelo ghake ndi gha lijhate lya nkambako,

Efulahimo nabhaha na manyelo elufo kome,

manyelo gheniya ndi, Manache nabhaha na akakomana ngondo elufo kome,

na Efulaimo nabhaha na akakomana ngondo elufo kome,

nabhatumila akakomana ngondo bheniya kwabulalii bhando bha ilambo henge,

ade mupehekelo gwa nnema."

18 Kunhwalo jha likabila lya Chabulone na likabila lya Ichakale ngalongila,

"Likabila lya Chabulone libhaha na mota kwa mahengo ghabhe ghu umbwane,

na helehela likabila lya Ichakale libhaha na mota kwa mahengo ghabhe gha mu mahema ghabhe.

19 Namalalika akaghene mu itombe yabhe,

na kwenio nabhapiya matambiko ghighapalwa.

Mana bheniya kichumo chabhe kuhumii umbwane,

nu ihukilo ihiitwe muupele jha ncheke gwa mbwane."

20 Kunhwalo jha likabila lya Gade, ngalonge

Alombwa Chapanga jwampii Gade chehemo ngolongwa.

Gade uyema ngita liimba,

jwanyopoto lubhoko lwa kinyama na palototohe lwa muto.

21 Ngakihaghulila chehemo jhambone jhibholii kupeta poha,

chehemo jhihaghulilwe kunhwalo gwa kilongoche.

Ngabhalongwicha bhando na kunnyokanikiya Bhambo Chapanga,

ngatimicha lihengo lya Chapanga kwa aka Ichilahele.

22 Kunhwalo jha likabila lya Dane ngalonge,

Dane ndi litohe lya liimba,

jwahomba kubhoka ku Bashane.

23 Kunhwalo jwa likabila lya Nafutale ngalonge naha,

"Mwe ma Nafutale,

Bhambo Chapanga ampii mota kukumpala hake,

kilambo chino nakihika upande ghu kuchine mwa lilabha lya Galilaya."

24 Kunhwalo jha likabila lya Achele ngalonge,

"Achele abha namota kuipeta yana yoha ya Yakobu

na akalongo bhake nabhampala hake,

na kilambo chake nakibhaha na mahuta ndii gha micheitune.

25 Matangala gha miche ino naibhaha jha choma na shaba.

Ughome gwino ghoha ntama njelembo!"

26 Mucha ngajhomolila kukulonge,

"Mangota mabhando bhuku Ichilahele, abhii jhe jwabhii ngita Chapanga gwino,

jwenie ubhoka kunane kuika kunntangatila,

jwenie upeta kunane kumahunde kongo ung'alicho gwake, ukabhonekana.

27 Chapanga jwangapeta machiko ghoha ghangapeta ndi chehemo jhino jhikubhutukila,

makakala ghake ghabhonekana pannema machiko ghoha ghangapeta.

Ngabhabhutwiya akamakoko nnonge jhino,

ngalaghila, ‘Makomelekeya bhoha.’

28 Kuyene, bhando bhuku Ichilahele ngabhatamita njelembo,

mu kilambo chikitwelii yakulya na divaye,

kilambo chenio ula ukoma kuhumii kunane kumahunde.

29 Mmii na mota mangota aka Ichilahele.

Ghane jwabhii ngita mangota?

Bhando bhikombolilwe na Bhambo Chapanga,

jwenio ndi ngao jhino na jwantangatila,

nu upanga ghunnete kuhotola!

Akamakoko bhino nabhaika kunnyopa mabhone kiya nnonge jhino,

na mangota namalimbilikiya pahe."