1 "Mipalwa kukengama maha mihilo jhinimpekeya deleno, kupala ntame nu kujhonjekeka kubhehe twe, nu kujhenda kukilambo chikibhehe chino ngita Bhambo Chapanga, Chapanga gwino chalaghila kwape akahoko bhino. 2 Nkomboka Bhambo Chapanga, Chapanga gwino, channongwiya umwanja kupete munjenga kwa yaka makome ncheche, kupala alole anda chakaka mmi chakaka kunyokanikiya ammanye ghumuwachii kumwojho gwino pange jhe namwikamula mihilo jhake. 3 Nganyigha kukunneka na njala, palonge ngampila chakulya cha mana nkwipe, changakimanya mangota na akahokobhino. Atehila yene kupala ammole kubhehe mundo alama jhe kulibumunda, nambo kwa kila lilobhe lilibhoka kwa Bhambo Chapanga. 4 Kipinde choha cha yaka makome ncheche, ngobho ino ikalalite jhe hilu makongono gwino ghatupita jhe. 5 Nkomboka kubhehe Bhambo Chapanga, Chapanga gwino unapula mundo ngita tate chanapuu mwana mundo. 6 Yene nkamula mihilo jha Bhambo Chapanga, Chapanga gwino, kupala ntame kukukengama jwenie na kunyokanikiya. 7 Nhwalo Bhambo Chapanga, Chapanga gwino inneta mikilambo chikibholile, kilambo china ngemba na chembwe na mache ghighapitii mululambo na mwiitombe, 8 kilambo chikulema ngano na chaile na michabibo na mitine na makomamanga, kilambo chikibhii na micheitune jhipiya mahuta na bhuche, 9 kwenio nampata yakulya twe na hele nampelulwa jhe kilebhe. Mandalabho ghake gha choma na itombe yake nanhotola kuhemba shaba. 10 Kwenio nanyakila nukujhukuta na mangota namnchengula Bhambo Chapanga, Chapanga gwino kukumpe kilambo chambone chikibholile."

11 Mucha ngajhendilila kulonge, manganibhilila jhe Bhambo Chapanga, Chapanga gwino kukuhangabhana malaghalikilo ghake na mihilo jhake na malaghano ghake ghannaghila deleno. 12 Kipinde pumpa kulye nu kujhukuta, nu kuchenga majhumba mahalanaho nu kutama mwenio, 13 na kipinde mipugho jhino jha ng'ombi na mambelele pighapa kujhonjekeka, na madine gha feza na chaabo na kila kilebhe chikipa kujhonjekeka, 14 mma miho, miojho jhino jhangabhe jhe nulukilo nu kunibhilila Bhambo Chapanga, Chapanga gwino jwammohita kukilambo chuku Michile, kwamakibha akabhanda. 15 Jwenio ndi jwannongwiya munjenga ngolongwa jhinakujhoghowa, na jhina majhoka ghina uchongo na ipyelele. Linjenga lyenio lijhomo lyangamache, ngampekiya mache kubhoke mulindalabho linonopaho. 16 Kabhele jwenio ndi ngampila mana kunjenga, chakulya changakimanya akahokobhino. Atendila yenio kupala kummeka kukuntembeke nu kunnyigha, kupala ampele ilebhe yambone pukupehekeya. 17 Yene ntama maha, mangahika jhe kukiloke umwojho gwino kubhehe, tubhii niilebhe mbwe kwa makakala na malango ghito twabhete. 18 Nkomboka kubhehe Bhambo Chapanga, Chapanga gwino ndi jwampila uhotolo ghughupata ilebhe mbwe. Atehila yene kupala kulilenganikiya lilaghano lyalaghina na akahokobhino ade ngohe. 19 Nambo anda munnibhalile Bhambo Chapanga, Chapanga gwino nu kuikengama ichapanga jhenge nu kuijhinamila, nimpwatalila ku ukale deleno, chakaka mipakujhomwoka. 20 Anda nukunyokanikiya jhe Bhambo Chapanga, Chapanga gwino, mmanya mpa kukomwa ngita chibhakoma bhando bhange bhubhabhii nnonge jhino.