1 "Munalome jhojhoha jwatendwite kubhehe mbende amu jwahekitwe chinalome chake ipalwa jhe kulombana na ngongano ya bhando bha Bhambo Chapanga."

2 Helahela mwana jhojhoha jwa pakituto hilu kibheluko chake ade kibheluko cha kome, ipalwa abhekwa kutale na bhando bha Bhambo Chapanga.

3 Mundo jhojhoha jwa likabila lya Mwalome amu Mmoabo, ibheluko yabhe yoha ade ikibheluko cha kome, ipalwa abhekwa kutale na bhando bha Bhambo Chapanga. 4 Kwa nhwalo bhakatei kukana kumpe mangota chakulya na mache pamakibha undela kuhumii ku Michile, kabhele bhakampii mbijha Baalamo mwana jwa Beole kuhumii ku Peteole, kwenio ku Mechopotaniya, kupala ampela mangota likoto. 5 Nambo Bhambo Chapanga, Chapanga gwino akannyokanikii jhe Balaamo, Bhambo Chapanga ngaghalambwiya likoto lyenio kubhehe mota, kwa nhwalo Bhambo Chapanga, Chapanga gwino atei kumpalangana. 6 Yene, mangatenda jhe malaghano gha uteeke hilu ukoche na bhando bheniya, kipinde choha cha ughome gwino.

7 "Nambo, mangachimwa jhe Akaedomu, bheniya ndi akalongo bhino. Na mangachimwa jhe Akamichile, nhwalo mukatamite mu kilambo chabhe pamakibha akaghene. 8 Kibheluko cha utato cha Akaedomu na Akamichile bhijheketelwa kujhingi mu ngongano jha bhando bha Bhambo Chapanga."

9 "Anda nnyendengine kungondo nu kubheka kighono, kila mundo abha miho angatenda jhe kilebhe chochoha changajheketelwa na Chapanga. 10 Anda abhii jhumo pakate jhino jwangajheketelwa na Chapanga kwa nhwalo gwa kupita mbejho ya kilome mu maloto kilo, jwenio apita panja jhikighono, natama jhe pahina ni kighono. 11 Nambo iikite kimiye ajhogha mache, lyobha pulitipika ahoto kubhujha pikighono.

12 "Ipalwa kubhehe na chehemo kutale ni kighono kukujhenda kucholo. 13 Muyombo ino nghegha kingongwa, lyenie ntumila kuhembe libhomba nu kuyelela mahe ghino. 14 Kighono chino kipalwa kibhaha nyahinyahi kwa nhwalo Bhambo Chapanga, Chapanga gwino, patyangii pikighono chino kupala ankombole na kwabheka akamakoko bhino mu kindendeke chino. Yene mangakileka jhe kilebhe chochoha changapalwa pakate jhino anda jhe nannekangana."

15 "Mmanda anda abhutukii kajhino kupala munnonde, mangamujhicha jhe kwa munahota gwake. 16 Natama muche ghoghoha gwahagwii, nambo mangammone jhe.

17 "Mwichilahele jhojhoha, munalome amu mwikeghe, ipalwa jhe abha nngongola chehemo jhu kunnyinamila Chapanga. 18 Mbijha yoyoha ipatikine kwa itendwa ya ngongola yenie, mangapeleka jhe mu nyumba jha Bhambo Chapanga, Chapanga gwino, ata ibhe jhikulepe nachile, nhwalo Bhambo Chapanga inchimwa mundo ngita jwenio, munalome amu mwikeghe."

19 Piminnyahikicha nnongo gwino Mwichilahele mbijha amu chakulya mangannobholela jhe na nyonjekeya, hilu kilebhe chochoha chibhajhaikana bhando kukulepa kwa nyonjekeya. 20 Mihoto kujhopa nyonjekeya piminnyahikicha nng'ene, nambo nnongo gwino Mwichilahele mangammeke jhe nyonjekeya. Anda ntei yenie, Chapanga gwino nampela mota mu mahengo gwino ghoha ghipakuhenga mu kilambo chinnyenda kutola kubhehe chino.

21 Pimibheka nachile kwa Bhambo Chapanga, Chapanga gwino, mangabhehe jhe nikiyoto kulenganikiya, nhwalo Bhambo Chapanga, Chapanga gwino nanng'amba, namwe namma nililemwa. 22 Nambo mikola jhe lilemwa anda nkotwike kubheka nachile kwa Bhambo Chapanga, 23 nambo anda mmekite nachile kukupala kwino, mipalwa kulenganikiya kajhombe.

24 "Anda nnyingii munng'onda gwa michabibo gwa nnyino nhotwi kulye chabibo tanejhino, nambo mangatola jhe chabibo yoyoha kubheka mu kichukilo chino. 25 Anda nnyingii mu nng'onda gwa nnyino gwa mapemba nhotwii kukwejhuu manjwanjwane nukuyoghe mulubhoko nu kumemena, nambo mangato jhe kikwakwa kuhuna mapemba ghake."