1 "Mangapiya jhe kwa Bhambo Chapanga, Chapanga gwino, litambiko likukomelekeya lya ng'ombi amu limbelele lina kilema chochoha, nhwalo Bhambo Chapanga, Chapanga gwino aghachimwa gheniya."

2 "Anda nnyohine kubhehe, pakate jha miche jhino abhii munalome amu mwikeghe jwatenda ghanganandela nnonge jha Bhambo Chapanga, Chapanga gwino nu kuhalibiya malaghano ghake, 3 kukuijhinamila nu kuitumikila ichapanga henge, amu lyobha amu mwehe amu ndondo ilebhe yenie Chapanga akanite mbe mangaijhinamiii jhe. 4 Mangota anda nnyohine nhwalo gwenio, mipalwa kulingukiya maha, na anda chakaka kilebhe changanandela chenio chikitendwa pi Ichilahele, 5 bhahe, mkangila panja jha muche na mkong'onda maghanga ade bhahwa. 6 Chakaka bhipalwa bhakomwa anda bhabhi bhando bhibhalolite bhabhele amu bhatato bhibhalolite. Bhangakomwa jhe anda uchaile gwenio gwa mundo jhumo tugha. 7 Akachaile bheniya ndi bhibhapalwa kutumbuu kunkong'onda maghanga, peniya bhange bhinkong'onda maghanga. Kukutenda yene, mupakuibhilikiya gwanganandela gwenio pakate jhino."

8 "Ihoto kupitii mihalo jhenge minonopo muilambo ngita hela mihalo jhukuhadabula kukoma changamiye amu changanamiye mihalo jha kukocholana na mundo jhonge amu ilebhe ya bhando. Anda ipitii jhenio, mighapeleka chehemo jhikujhinamila jhahagwii Bhambo Chapanga, Chapanga gwino. 9 Kwenio mipeleka mihalo jhenio kwa akapiya matambiko Akalawe, na nnyomola mihalo jwabhii mulihengo kipinde chenio, namangota namatakalila nnonge jhabhe na bhene nabhapiya nabhatemulana. 10 Peniya nabhatemula mihalo jhenio na mangota nantenda ngita hela chibhapakunnobholela. 11 Nampalwa kuhenga telatela na chimipakulobholelwa. Mangaleka jhe kulenganikiya luhadabulo jhimpakulaghalikilwa. 12 Na mundo jhojhoha jwangannyokanikiya mpiya litambiko amu nnyomola mihalo jwabhekitwe mu zamo, mundo jwenio ipalwa akomwa. Kukutenda yenie namuibhangana gwanganandela gwenio mu Ichilahele. 13 Bhando bhoha nabhalogwa jhe nu kutenda kilebhe ngita chenie."

14 "Pumpakujhingila mukilambo Bhambo Chapanga, Chapanga gwino chapakumpe kubhehe chino nu kutama mwenio, na mangota nannongila nnonge, ‘Natummeka munahota nkolongwa atulongoche, ngita bhando bhilambo chibhatutindile,’ 15 mihoto kubhehe mundo kubhehe munahota nkolongwa nambo jwahaghulilwe na Bhambo Chapanga, Chapanga gwino. Ipalwa abhaha jhumo pakate jha akalongo bhino na mangantenda jhe nng'ene kubhehe munahota nkolongwa. 16 Pamo na gheniya, munahota nkolongwa jwenio angabhe jhe na kinyama chikikemwa falache hoko kunhwalo gwake, akakomana ngondo bhake amu kwatuma bhando bhakahemele falache kukilambo chuku Michile, nhwalo Bhambo Chapanga akalongii kubhehe, ‘Bhando bhango nabhabhujha jhe kabhele kwenio.’ 17 Na munahota nkolongwa jwenio angatolejhe akakeghe hoku pange jhe mwojho gwake naunneka Bhambo Chapanga, hilu angakijhole jhe mbijha na chaabo ndii hake. 18 Papakubhehe munahota nkolongwa, ipalwa akijhandikila kabhele kitabo cha malaghalikilo kunhwalo gwake jwenie kubhoke mu kitabo chikibhekitwe kwa akapiya matambiko Akalawe. 19 Kitabo chenio kibha na jwenio machiko ghoha nu kuchoma muughome gwake ghoha, kupala akibhola kuntembekeya Bhambo Chapanga, Chapanga gwake, akamula nu kulenganikiya ghoha ghighajhandikwe mukitabo mwenio. 20 na akikweya jhe jwene kwa akalongo mundo nu kukibhona nkolongwa kuliku Akaichilahele bhoha na hilu kuipucha mihilo jhenje kwa namuna jhojhoha kupala ajhendelela kulongocha jwenie na ibheluko yake.