1 "Lende ndi lilaghalikilo na nhwilo, Bhambo Chapanga, Chapanga gwino gwanhamulicha nimmole. Kupala maghatenda gheniya kukilambo kunyenda kutama nu kubhehe jhino. 2 Kipinde choha chimpakubhehe maghome, mangota na yana ino mipalwa kunnyokanikiya hake Bhambo Chapanga, Chapanga gwino nu kughajhoha malaghalikilo ghoha ghampile, yene mihoto kubhehe maghome mu kilambo chenio machiko ghamahele. 3 Nnyokanikiya Makaichilahele, maghajhoha nukughakamula ghoha kupala ilebhe ino inyendela telatela na mmelekana ndii mu kilambo chikihalalii kulema nu kukoleka ngita Bhambo Chapanga, Chapanga jwa akahoko bhino chalaghila."

4 "Unnyokanikiya mwe Maichilehele, Bhambo Chapanga, Chapanga gwito ndi Chapanga jhumo tugha. 5 Mupale Bhambo Chapanga, Chapanga gwino kumwojho gwino ghoha na kihuke chino choha na makakala ghino ghoha. 6 Mangalibhilila jhe mihilo jhenje jhininaghalikiya deleno. 7 Mabhola yana ino. Mmujhila na kubhujhila kwachimulila pimibhehe kajhino amu pumigholoka amu pimipomolela amu pumijhimuka. 8 Ntabhalila mulubhoko lwino nu nkwinda gheniya mukibhonge chino ngita ukombokelo. 9 Helehela nnyandika mihilo jhenje mu mafelemo gha milyango jha nyumba ino nu unane mu matangala ghi ilambo ino mikolongwa."

10 "Anda naha Bhambo Chapanga, Chapanga gwino pabhalapila akahokobhino Ulahimo na Ichaka na Yakobu, kubhehe apakwape ilambo yiibhi na miche mikolongwa inakuhalala yangachenga mangota. 11 Nyumba itwelii ilebhe yambone yangabheka mangota nakubhaha na ilibha yangahemba mangota na mighonda jhi micheitune na michabibo jhangapanda mangota. Bhambo Chapanga papakumpeleka kukilambo chenie namma nachakulya choha chimikipala, 12 peniya mipalwa kubhehe miho mangannibhilila jhe Bhambo Chapanga jwammohita kukilambo chuku Michile, kwamakibha makabhanda. 13 Muntembekela hake Bhambo Chapanga, Chapanga gwino muntumikila jwenio kanjika ndo na nnapila kwa liina lyake tu. 14 Mangajhinamii jhe ichapanga jhenge, pakate jha inyagho ya bhando bhimitama nabho, 15 lilaka lya Bhambo Chapanga, Chapanga gwino, ikoto kujhaka panane jhino nhwalo Chapanga jwabhii panakate jhino ndi Chapanga jhuna wiho.

16 "Mangannyigha jhe Bhambo Chapanga, Chapanga gwino ngita piminyighita kwenio ku Masa. 17 Mma miho na kuitembekeya mihilo jha Bhambo Chapanga, Chapanga gwino na malaghalikilo ghake ghannaghalikiya. 18 Nhwenga kilebhe chikinhalalicha Bhambo Chapanga kupala ilebhe ino innyendela telatela, mu kilambo chimijhingii nu kutola kilambo china kuhalala nu kubhehe chino chabhalaghila Bhambo Chapanga kwape akahoko bhino. 19 Yene Bhambo Chapanga, Chapanga gwino chabhabhenga akamakoko bhino ngita chalongila."

20 "Machiko ghighaika, anda yana ino inkonyite, Kwanike Bhambo Chapanga, Chapanga gwito kutulaghalikiya tutembekeya mihilo jhenjeno? 21 Mangota majhangula naha, ‘Tukibha twakabhanda bha Falao kukilambo chuku Michile, na Bhambo Chapanga ngatukombwila kwa makakala ghake. 22 Kwa miho ghito ngatummona Bhambo Chapanga akatenda nginyililo na ikangacho na ilebhe yukujhoghowa hake na itapahu kwa Akamichile na Falao na bhando bhake bhoha, 23 nukubhowa ku Michile nukutubheka pamba nu kutupe kilambo chenje ngita palaghila kubhehe nabhapela akahoko bhito. 24 Bhahe, Bhambo Chapanga, Chapanga gwito ngatulaghila tuitembekeya malaghalikilo ghanga ghoha nakunyokonikiya Bhambo Chapanga. Anda tutehi naha natujhendelela telatela nu kubhehe ghome machiko ghoha ngita chibhii deleno. 25 Anda tujhendelile kuijhokonikiya mihilo jhenio nnonge jha Bhambo Chapanga ngita chalaghalikiye, peniyo naibhaha tujheketelwa na Bhambo Chapanga.’ "