1 "Anda mijhenda kungondo kubulana na akamakoko bhino, anda miwene falache na mutuka ihutwa na falache na akakomana ngondo twe hake kuliku akakomana ngondo bhino, mangajhoghopa jhe. Nhwalo Bhambo Chapanga, Chapanga gwino jwammohita ku Michile nabhaha pamonga na mangota. 2 Kabula jhukutumbu kubula ngondo, mpiya litambiko naika nnonge jha akakomana ngondo nu kulonge, 3 ‘Makakomana ngondo bhuku Ichilahele jhokanikiya! Deleno mmandikii kubulana na akamakoko bhino. Mangahengeleka jhe mwojho amu kujhoghopa, amu kupwelela amu kwajhoghopa akamakoko bhino, 4 nhwalo Bhambo Chapanga, Chapanga gwino, ndi jwapakujhenda pamonga namangota kubulana ngondo na akamakoko bhino nu kuntenda mangota kwahotola.’ "

5 "Peniya, ilongoche ya akakomana ngondo nabhalobholela akakomana ngondo kubhehe, ‘Bho, abhii mundo jhojhoha pamba jwachengite nyumba nhyono nambo anabheka jhe palonge jha Bhambo Chapanga? Anda abhile abhujha kajhake, pange ihoto kujhomokela kungondo jhonge na kujhebhelecha lubhaho jhonge. 6 Bho, abhii mundo jhojhoha pamba jwapandite chabibo anahanganii jhe malobhoko gha uhohe gwake? Abhujha kajhake ihoto kujhomokela kungondo na mundo jhonge kuhanganila chabibo yake. 7 Bho, abhii munalome pamba jwabhoite inyaghabhole na abhandikii kutolela? Abhujha kajhake, ihoto kujhomokela kungondo, nu munalome jhonge kumujhila mwikeghe jwenio.’ "

8 "Ilongoche bha akakomana ngondo nabhajhendelela kukonya, ‘Bho, abhii mundo pamba jwahengelike mwojho? Abhujha kajhake kupala akoto kwatenda ajhake kuhengeleka mwojho ngita jwenio.’ 9 Ilongoche pibhapakujhomolela kulonge na akakomana ngondo, nabhahaghula akolo bha akakomana ngondo."

10 "Kipinde pimibhandikii kujhingilila muche, makonya anda bhipala kabula ngondo amu. 11 Bhando bha muche gwenie bhapomwiye kabula jhu kubulana ngondo, bhahe, bhando bhubhabhii mwenio nabhabha akabhanda bhino nu kuhenga mahengo gha kwa chokolekeya. 12 Nambo anda bhando bha muche gwenio bhammpomwiye kuuteke namangota, nambo ngabhabulana ngondo na mangota, bhahe, namuujhobhela muche gwenio, 13 na Bhambo Chapanga, Chapanga gwino chantenda muhotole muche gwenio na kwakoma akanalome bhoha. 14 Nambo akakeghe na yana yabhe na ng'ombi na yoha ibhii pabomane, mitola mateka ibha ino, mihoto kuhanganila ilebhe itoii ya akamakoko bhino, yenie ndi ilebhe Bhambo Chapanga, Chapanga gwino, ampile. 15 Yene ndi chimipala kwiitende miche jhoha jhibhii kutale na kilambo chimpakutola kubhehe chino."

16 "Nambo mu miche jhibhii mu kilambo champe Bhambo Chapanga, Chapanga gwino kubhehe chino, mangaighaya jhe kilebhe chochoha kubhehe ghome. 17 Namakomelekeya njwenjwe bhando bhoha, Akahite na Akaamole na Akakaanane na Akapeliche na Akahive na Akayebuche ngita Bhambo Chapanga, Chapanga gwino channaghalikiye, 18 kupala bhakoto kummolangana kuhenga ilebhe yaichimwa ichapanga yabhe, namangota kuntende gwanganandela Bhambo Chapanga, Chapanga gwino, yene makoma bhoha."

19 "Anda mikilenganikii kuujhobhela muche kwa machiko nu kukomanila kupala kuupukila, nkoto kuhangabhana mikongo jha uhohe kulibhagho, mangapenguu jhe mikongo jha uhohe. Bho, mikongo ndi akamakoko ade mipengule? Mihoto kulye uhohe gwa mikongo jhenio nambo mangapengu jhe. 20 Mihoto tuu kupenguu mikongo jhenge na kutengenechela ngache jhukukwelela mapamanda gha muche, ade mahotole bhando bha muche gwenio."