1 Mucha ghajhendilila kulonge kubhehe, "Pumpakujhingila mu kilambo champe Bhambo Chapanga, Chapanga gwino kubhehe chino nu kutama mwenio, 2 malobhoko ghange gha mahuno ghimpakuhuna mu kilambo champe Bhambo Chapanga, Chapanga gwino, mighegha mu kichukilo ade chehemo jhapahagwii Bhambo Chapanga, Chapanga gwino jhukujhinamila. 3 Majhendelela akapiya matambiko jwantumikila kipinde chenie nu kunnobholela kubhehe, ‘Deleno nonge hotuhotu nnonge jha Bhambo Chapanga, Chapanga gwango kubhehe nyingile mu kilambo chabhalapila akahoko bhito nabhapela.’ "

4 "Mpiya litambiko natola kichukilo chenie na kukibheka nnonge jha chehemo jhikupiikiya matambiko kwa Bhambo Chapanga, Chapanga gwino, 5 peniya milongela malobhe ghanga nnonge jha Bhambo Chapanga, Chapanga gwino, ‘Tate gwango akibha Amwalamo atyangityangita okwe na okwe, kubhoke peniya, ngahelila kujhenda ku Michile kwenio ngabhila nng'ene. Jwenio na akalongo mundo bhakibha bhando bhandina tugha pibhakibha kwenio, nambo ngabhabhila bhando hoko na kilambo kikolongwa bhina makakala. 6 Akamichile ngibhitutende ukokotoko ngubhutung'aha nu kutughaghalila kuhenga mahengo manonopo ngita akabhanda. 7 Peniya, ngatunnelila Bhambo Chapanga, Chapanga jwa akahoko bhito, Chapanga ngajhoha kulela kwito, na ngaghabhona mang'ahe ghito na mahengo manonopo na chitubhonilwa. 8 Bhahe, Chapanga ngatubhohita kwenio ku Michile kwa makakala ghake makolongwa, ngatehila nginyililo na ikangacho nu kutenda ilebhe iticho. 9 Ngatuleta pamba nu kutupe kilambo chenje chikibholile mbone kukulema nu kukukoleka ipugho. 10 Na ngohe ninnete Bhambo Chapanga malobhoko gha mahuno ghango ghighapandwa mu kilambo chenie ghambile.’ "

Peniya, mibheka kichukilo pahe, nnonge jha Bhambo Chapanga, Chapanga gwino, nu kunnyinamila.

11 Namwe na Akalawe pamonga na akaghene nanhuanganila ghambone ghoha gheniya Bhambo Chapanga, Chapanga gwino, ghampii mwenga na akalongo bhino. Nabhene nabhahanganila pamonga na mwenga.

12 "Kila chaka chu utato, kila mundo apiya chehemo jha kome pa mahuno ghake ghoha kwa nhwalo jha Akalawe na akaghene na akakebha na akananhwela, kupala bhapata chakulya choha chibhapala pibhabhehe mu kilambo chino. 13 Peniya, milongela nnonge jha Bhambo Chapanga, Chapanga gwino kubhehe, ‘Mbiite kajhango lipungo lya nyahinyahi, nganapila Akalawe na akaghene na akakebha na kananhwela, ngita chanaghilwa ndende. Nganite jhe nhwilo gwino hilu kulibhalila. 14 Nyakii jhe lipungo lya kome pinikibha ninnelila, kabhele mbapii ndeka panakibha nangajheketelwa nnonge jhino, mbiite jhe matambiko gheniya kwa bhibhawile. Nintembikii mwe ma Bhambo Chapanga, Chapanga gwango, na kutenda kila kilebhe chinnaghila. 15 Kubhoka pikitamo chino cha nyahinyahi kunane kwa Chapanga dola pahe, mape mota bhando bhino ku Ichilahele ni kilambo chimutupile ngita chamalapila akahoko bhito, kilambo chikibholii na chambone kulema nu kukoleka ipugho.’ "

16 "Deleno, Bhambo Chapanga, Chapanga gwino, innaghalikiya mangota kuikamula mihilo na malaghakililo ghanga. Mma miho kulenganikiya kwa mwojho gwoha na uhuke gwoha. 17 Deleno nnyeketile Bhambo Chapanga, kubhehe Chapanga gwino nu kubhehe mikengama ndela yake nu kamuu malaghalikilo na mihilo jhake na malaghano ghake nu kunnyokanikiya jwenie. 18 Bhambo Chapanga jwene alongii deleno mangota anyeketile kubhehe ndi bhando bhake ngita chalaghila, nambo mipalwa nkamula mihilo jhake jhoha. 19 Nantenda mangota kubhehe kilambo kikolongwa nu kulumbililwa nu kupata ichima nu kumanyikana kuipeta ilambo yoha yapangine. Mangota namma bhando bhake Bhambo Chapanga jwenie ngita chalaghila."