1 Peniya, Bhambo Chapanga ngannobholila, "Mmange kabhele ibao ibhele ya maghanga ngita chintehila yahe puntumbwila, na hele ntendekeya lichanduko lya mbau, kubhoke peniya nkwelanayo kunane kukitombe. 2 Nane nanyandika kabhele malobhe ghighakajhandikwe muibao ikajhulina, na peniya mmeka yenio mu lichanduko."

3 "Yene ngandendekiya lichanduko lya nkongo gwa nchita pamonga na ibao ya maghanga ibhele ngita yukutumbula yela na nganhowika nayo kukitombe. 4 Bhambo Chapanga ndi ngajhandika malobhe ghaghalaghala ngita gha makacho, mihilo kome jhabhatangachila Bhambo Chapanga kubhoke pamwotu lichiko lela linkonganika nhwina jha kitombe. Peniya Bhambo Chapanga ngangamwiya ne ibao yenio. 5 Ngang'alambwika, kubhoke pikitombe na ngita chanaghila Bhambo Chapanga, ngamekita ibao yenio mu lichanduko lintendekiya, na ibhii mu lichanduko lyenio ade ngohe ngita Bhambo Chapanga chalaghila."

6 Bhando bhuku Ichilahele ngabhatyanga kubhoke mu ilendela ya maliba ya bhando bhuku Yakane ade ku Mosela. Peniya Alune ngajhomwika nu kunchikwa, Eleazale mwana mundo ngabhila mpiya litambiko chehemo jha tate mundo. 7 Pughapetita gheniya, ngabhatyanga ade ku Gudegoda, nu kubhoke ku Gudegoda ade ku Yotebata, chehemo jhina ipela twe ya mache. 8 Kipinde chenio Bhambo Chapanga ngahagwila bhando bhi likabila lya Akalawe bhabha bhukughegha lichanduko lya lilaghano lya Bhambo Chapanga, bhatumike ngita akapiya matambiko na kwape bhando mota kuliina lyabhe, lyenio ndi lihengo lyabhe ade deleno. 9 Yene ndi nhwalo bhando bhi likabila lya Akalawe bhakwetii jhe chehemo jhibhapilwe pannema kubhehe jhabhe pamonga na akalongomundo. Chibhajhambulii ndi ichima jha kubhehe akapiya matambiko bha Bhambo Chapanga, ngita Bhambo Chapanga, Chapanga gwito chalaghila.

10 Mucha ngajhendilila kulonge, ngandamita kukitombe machiko makome ncheche kilo na muhe ngita makacho, peniya Bhambo Chapanga nganyokanikiya kabhele yene ngajheketila kubhehe nabhakoma jhe. 11 Peniya Bhambo Chapanga ngannobholila kubhehe, "Mmoke pamba, nnyendelele na mwanja gwino mwalongoche bhando bheniya bhakajhingile nu kutola kilambo kubhehe jhabhe, chanaghina akahokobhabhe kubhehe chanapela."

12 "Ngohe maka Ichilahele, Bhambo Chapanga, Chapanga gwino kilebhe chakipala kwino, munnyinamila jwenio na kuhenga kila chakipala. Mupale na kuichimu na kuntumikila kuhuke gwino ghoha na kwa mwojho gwino ghoha, 13 na kujhokonikiya malaghalikilo ghake na mihilo jhake jhinnimpela deleno kwa nhwalo gwino mabhene. 14 Dola, kunane na ata kunane kwa Chapanga hake ndi ya Bhambo Chapanga, Chapanga gwino na nnema na yoha ibhii mwenio ndi yake. 15 Nambo Bhambo Chapanga ngabhapala hake akahokobhino, ndi ngabhahagwila mangota bhumii ibheluko ya bheniya, kubhehe bhando bhake chehemo jha bhando bhange bhoha, ngita chibhii deleno. 16 Kuhumii ngohe munnyokanikiya Bhambo Chapanga, na mileka ngandango. 17 Nhwalo Bhambo Chapanga, Chapanga gwino ndi Chapanga jwa ichapanga na Bhambo jwa akanahota akakolongwa na Chapanga jwa akanahota bhina makakala na bhibhajhokanikiya, iloleke jhe kumiho jha bhando na ijhekete jhe chwinda. 18 Abhakenge akakebha na akanawela na jwenio abhapala akaghene bhibhatama pamonga na twenga kwape chakulya na ngobho. 19 Yene, mapale akaghene nhwalo namangota mukibha akaghene ku kilambo chuku Michile. 20 Munnyokanikiya Bhambo Chapanga, Chapanga gwino nu kunnyinamila jwenio kanjika ndo. Mangalekana jhe na jwenio nu kulapila kwa liina lyake kanjika ndo. 21 Munnombe jwenio, nhwalo jwenio ndi Chapanga gwino na jwenio antendii ikangacho yukujhoghowa ghinnolokiya kwa miho ghino mabhene. 22 Akahokobhino pibhajhenda ku Michile, bhakibha bhando makome chaba tugha, nambo ngohe Bhambo Chapanga, Chapanga gwino atehii mme twe ngita ndondo yukunane kwa Chapanga."