1 Unyokanikiya mwe Akaichilahele! Ngohe mmandikii kujhomboka lukemba lwa Yoludane, kujhenda kukitola kilambo kibhehe chino, kilambo china bhando bhina makakala kumpeta mangota na miche jhabhe ikolongwa ibhii na mapamanda ghighahikii kumahunde. 2 Bhando bheniya akatandamaho na bhina makakala, bheniya ndi Akaanake ngita bhando bhikilonge kubhehe, Meneke jwahotwii kulimbana na Akaanake? 3 Nambo deleno mmanye kubhehe Bhambo Chapanga, Chapanga gwino nanninnongolela ngita mwotu ghutiniya mikongo. Jwenie nabhakomelekeya nabhalepelela nnonge jhino, yene mangota namabhenga na kwakomela kipinde tugha, ngita Bhambo Chapanga chalaghila.

4 "Bhambo Chapanga, Chapanga gwino papakwabhenga bhando bheniya nnonge jhino, mangakikweya jhe umiojho jhino kubhehe nhwalo kujheketelwa kwito nnonge jha Bhambo Chapanga ndi nhwalo atupii kilambo chenje, naijhe! Bhambo Chapanga, Chapanga gwino abhabhengite bheniya nnonge jhino nhwalo bheniya bhanganandela. 5 Nnhotwile kutola kilambo chenio kubhehe chino chi kunhwalo mangota mabhando bhambone jhe na mwojho gwa umbone, nambo Bhambo Chapanga, Chapanga gwino abhabhengite bheniya kwa nhwalo bhando bheniya bhanganandela nu kupala kulenganikiya lilaghano lyalapila kwa akahokobhino Ulahimo na Ichaka na Yakobu. 6 Bhahe, mmanya kubhehe Bhambo Chapanga, Chapanga gwino ampilingine kilambo chenio chikibholii, chi kwa nhwalo jha mangota mabhando bhaumbone palonge jhango! Nambo mangota mabhando bha kujhundupa miojho.

7 "Nkombokela na mangalibhilii ng'o kubhehe mangota mukatehi abhe nililaka Bhambo Chapanga, Chapanga gwino kunjenga. Kuhumii lichiko lyamabhoka kukilambo chuku Michile ade pamahika pamba, mangota nnyendilila kung'alambuka Bhambo Chapanga. 8 Ata kukitombe chuku Holebo liina lenge Chinae ngamuntenda Bhambo Chapanga abhe nililaka, ngapala kunkoma. 9 Pinhobhokila pikitombe kupoke ibao ibhele ya maghanga ijhandikwe lilaghano lya Bhambo Chapanga lyabhekita na mangota, ngandamita kwenio machiko makome ncheche, kilo na muhe, nalii jhe kilebhe hilu nanywii jhe kilebhe. 10 Kipinde chenio Bhambo Chapanga ngambila ibao ibhele imaghanga ijhandikwe nulubhoko lwake jwenie, ikibha ijhandikwe malobhe ghoha ghannobholila mangota kuhumii pamwotu lichiko lela lyankongina pikitombe. 11 Ena, pughapetita machiko gheniya makome ncheche kilo na muhe, Bhambo Chapanga ngambila ibao ibhele ya maghanga yajhandike malaghano."

12 Peniya Bhambo Chapanga ngannobholila kubhehe, nhuluke pahe jhikitombe kajhombe, nhwalo bhando bhino bhimabhohita ku Michile bhanemwiye na bhatehi ghanganandela. Bhilekite mihilo kajhombe jhinalaghila nu kughalambukii inyagho yukuyana bhene.

13 Helahela Bhambo Chapanga ngalonge kubhehe, abhamanye bhando bhamba kubhehe bhina lighoho hake, 14 uneke nakome bhando bhamba mbute liina lyabhe pannema, nane nanatenda kubhehe matate bha kilambo kikolongwa jha bhando bhina makakala kwapeta bheniya.

15 Peniya ngang'alambwika, nganhulwika pikitombe kongo ngamwii ibao ibhele ya maghanga ijhandikwe malaghano. Kipinde chenio mwotu ujhakita pikitombe. 16 Pinolita nganolita kubhehe, muntendii uhakaho Bhambo Chapanga, Chapanga gwino, ntendikii kinyagho chilitohe lya ng'ombi, nng'alambwike kajhombe nilekite mihilo jhanaghila Bhambo Chapanga. 17 Peniya ngandondobhiya nu kutaghii pahe ibao yenio, na ngaikajhwinika nnonge jhabhe. 18 Bhahe, ngang'wila mangukama nnonge jha Bhambo, ngita pundumbwila machiko makome ncheche, kilo na muhe, changalye chakulya hilu kunywe mache, ndehila naha nhwalo gwa malemwa ghuntehilingine mangota nnonge jha Bhambo Chapanga kukuntenda akola lilaka. 19 Nyogwipa lindoghondogho nililaka lya Bhambo Chapanga kwino mangota ngankomite, nambo Bhambo Chapanga kipinde chenio ngannyoa kabhele. 20 Helahela Bhambo Chapanga akibha nililaka hake kwa Alune ngapala kunkoma papa, nanenga kipinde cheche nganninyopila kwa Chapanga. 21 Peniya, ngandoila kilebhe changanandela, yane kinyagho cha litohe lya ng'ombi chimitendikiya ngandiniya mwotu, ngatimbitandimbita nukuyogha likuliku ngaliho, maliho ghene ngandaghila mukipela chikikuka mache kuhelela mu kitombe chenio.

22 Helahela ngamuntenda Bhambo Chapanga, Chapanga gwino akola lilaka pimikibha kwenio ku Tabela nu ku Macha nuku Kibolote Hataava. 23 Na Bhambo Chapanga pantumita kubhoka ku Kadeshi Beneya palongila, nnyendengane mukatame mu kilambo chinnimpile kibhehe chino. Mukannyokanikii jhe hilu kukengama ghala ghanaghilwa. 24 Kuhumii lichiko linaummanya mangota munkundii lighoho Chapanga.

25 Yene ngang'wila mangukama nnonge jha Bhambo Chapanga machiko makome ncheche kilo na muhe nhwalo Bhambo Chapanga akalongii nabhapuluta bhoha pulutu. 26 Nenga nganinyopita Bhambo Chapanga kulonge, mwe ma Bhambo Chapanga mangakomelekeya jhe bhando bhino, bhando bhino mabhene, bhando bhimakombwila na kwabhowa kukilambo chuku Michile kuhotolo na makakala ghino makolongwa. 27 Makomboka akatumiche bhino Ulahimo na Ichaka na Yakobu, mangalingukii jhe lighoho lya bhando bhamba, gwanganandela gwabhe na uhakaho gwabhe. 28 Bhando bhuku Michile kumutubhohita kola bhangalonge jhe, Bhambo Chapanga kwabhabhohita kupala akankomela kunjenga, kwa nhwalo anhotwii jhe kunyingiya mu kilambo chalaghila nhwalo akatehi kunchimwa mangota. 29 Mana bhando bheniya ndi bhando bhino mabhene, bhando bhimabhohita kubhoka kukilambo chuku Michile kwa makakala nu kunhotolo gwino nkolongwa.