1 "Andaapitii nnondole jwa Chapanga jwakuchimulii maloto pakate jhino, annobholile kumpe nginyililo amu ikangacho, 2 peniya nginyililo amu ikangacho yenie itendeke, peniya nalongela kubhehe, ‘Tuikengame ichapanga jhenge nu kuijhinamila, ichapanga yangaimanya,’ 3 mangajhokanikiya jhe malobhe gha nnondole jwenio amu machimulilo ghake, nhwalo Bhambo Chapanga, Chapanga gwino apete kwa bheniya kunnyigha mangota kupala amanye anda mumpala kwa mwojho gwino ghoha na kwa kihuke chino choha. 4 Munkengame nu kunnyokanikiya Bhambo Chapanga, Chapanga gwino nu kukamuu mihilo jhake nu kujhokanikiya lilobhe lyake, nukunnyinamila jwenio kanjika. 5 Nambo nnondole jwenio amu nnota maloto nakomwa, nhwalo abhabholite lughaluko kwa Bhambo Chapanga, Chapanga gwino, jwammohita kukilambo chuku Michile na kwankombwila kubhanda, kupala mwileke ndela jhannaghila Bhambo Chapanga mwiikengame. Yene ndi chimpala kukomelekeya gwanganandela pakate jhino.

6 "Anda unnung'una gwino jwa lutumbo lumo amu mwana gwino munalome amu mwikeghe, amu aana bhino bhimapala hake, amu nkoche gwino jhumumpala hake, nahwuta kwa chile nalongela kubhehe, ‘Tujhende tukaijhinamii ichapanga,’ ichapanga jhenio mwenga amu akahoko bhino minawahii jhe bhikaijhinamila, 7 amu ichapanga jha bhando bhange bhibhatama pahina jhino amu kutale kubhoke upande ghumo gwa nnema ade ghonge, 8 mangajheketela jhe kunkolowa hilu mangannyokanikiya jhe hilu kunkole kiya amu manganneka jhe ajhende amu mangannonda jhe, 9 chakaka ipalwa mukomwa, mipalwa mwe mma jhukutumbula kunkong'onda lighanga, peniya, bhando bhange nabhabweleya. 10 Munkong'onda maghanga ade aweghe! Nhwalo ajhighite kunnekanicha na Bhambo Chapanga, Chapanga gwino, jwammohita mu kilambo chuku Michile kumikibha makabhanda. 11 Pimpakwakoma bhando bheniya, Akaichilahele bhoha nabhajhoha nu kujhoghopa, hilu bhitenda jhe nhwanangana ngita gwenio."

12 Pumpakutama mu kilambo chenie Bhambo Chapanga, Chapanga gwino ampilangine ntame pange nannyoha, 13 kubhehe bhando bhange bhina milomo pakate jhino, bhautite bhando bhikilambo bhilonge, "Tujhende tukaijhinamii ichapanga jhenge," ichapanga jhenio mwamela munaimanya jhe, 14 bhahe, milingukiya nu kukonyekeya maha, anda chakaka kilebhe kibhoho chenio kitendike pakate jhino, 15 mipalwa kwakoma kwa upanga bhando bhoha bha muche gwenie, nu kuikoma ng'ombi yoha kwa mapanga na mikihalibiyana kilambo chenio. 16 Mijhola ilebhe yoha ya bhando bhibhatamita muche gwenio nu kuipeleka pulubhanja nu kuitiniya mwotu ngita pimikomelekeya matambiko kwa Bhambo Chapanga, Chapanga gwino, muche gwenio naubhaha malundo na mahame machiko ghoha ghangapeta, na helahela nauchengwa jhe kabhele. 17 Mangatola jhe kilebhe chochoha chikipihitwe kutiniwa mwotu kubhehe chino, kupala Bhambo Chapanga alileka lilaka lyake likale, aghamanye ghambone na kiya nu kummeka mma twe hake ngita chalaghina na akahoko bhino, 18 anda tugha munnyokanikii Bhambo Chapanga, Chapanga gwino nu kukamuu mihilo jhake jhoha jhinnighalikiya deleno.