1 Ghanga ndi malobhe gha lilaghano lya Bhambo Chapanga lyanaghila Mucha kulibheka na Akaichilahele mu kilambo chuku Moabu, pamonga na lilaghano lela lyatehila nabho Akaichilahele kukitombe chuku Holebo.

2 Mucha ngabhakemita Akaichilahele bhoha na kwalobholela, "Mabhene nnolite Bhambo Chapanga chantendii munahota nkolongwa Falao, jwaku Michile na ilongoche bhake bhoha kwenio ku Michile. 3 Mabhene makalolite ilebhe ikolongwa na ikangacho na nginyililo yatehila Bhambo Chapanga. 4 Nambo ade deleno Bhambo Chapanga ampeki jhe malango ghukumanya, na miho ghukulola hilu machikilo ghukujhokanikiya ghala ghimipetile. 5 Kwa yaka makome ncheche, Bhambo Chapanga nikannongwiche ku njenga ngobho ino ikatundungii jhe ihwalita hilu maghubache ghino mu makongono hele ikatukutwike jhe. 6 Makabhehe jhe na mabumunda ku nhwalo gwa chakulya makabhehe jhe na divaye kunhwalo ghukunywe. Nambo Bhambo Chapanga akantangatile." 7 Mangota kipinde chinhikita chehemo jhenje, Sihone, munahota nkolongwa jwaku Heshbone na Ogu, munahota nkolongwa jwaku Bashane, ngabhakomina namangota, nambo tukahotwile, 8 ngatutohila kilambo chabhe, ngatwaghabhila makabila gha Leubene na Gade na nuchu jha likabila lya Manache, kibhehe kilambo chabhe. 9 Yene mma miho kughakamulii malobhe ghoha gha lilaghano lende kupala mma na mota kwa kila mahengo ghimihenga.

10 "Deleno, mangota mwe nnyemite nnonge jha Bhambo Chapanga, Chapanga gwino, mmii niilongoche na akanahota bhino na ighogholo na akatumiche bhino, 11 yana ino na akaanabhino na akaghene bhibhatina hanjo nu kunteke mache bhibhatama pakate jhino. 12 Mmii pamba deleno kupala kubheka lilaghano lende lya Bhambo Chapanga, Chapanga gwino lyabheka na mangota deleno, 13 kubhehe ilangii mangota ndi bhando bhake na jwenie nabhaha Chapanga gwino, ngita hela chalaghina mangota na akahoko bhino Ulahimo na Ichaka na Yakobu. 14 Lilaghano lende na mihilo jhake na ilapo yake nihenga jhe na mangota kanjika, 15 nambo nihenga na mangota munnyemite pamba nnonge jha Bhambo Chapanga na ibhelukwa ito yangabheluka.

16 "Mabhene umanye kubhehe chitutamita kukilambo chuku Michile na chitutyangita pakate jha ilambo ya bhando bhange ade ngatuikita pamba. 17 Mukaiwene inyagho yabhe yukuchimwa ibhaijhinamila yene ndi ichapanga yabhe yukubhacha kwa mikongo na maghanga na madine gha feza na chaabo. 18 Mukilolekeye kubhehe abhii jhe munalome amu mwikeghe amu nnongogwino amu mundo jwa likabila lyolyoha lilijhema pamba deleno lilipakumpucha Bhambo Chapanga, Chapanga gwito nu kujhenda kuitumikii ichapanga ya ilambo henge. Kilebhe chenie nakibhaha ngita lukegha lulumelite nu kupambika uhohe ghunangaghae ghighabhi na uchongo. 19 Mundo jhojhoha jwapakujhoha malobhe gha lilaghano lende jwalapichwe, nu kukilongelela jwene kumwojho gwake nukulonge nabhaha njelembo, ata aghalambuka unyuma nu kujhendelela nilighoho lyake, kilebhe chenie nakinkomelekeya pulutu mambone na manganandela. 20 Bhambo Chapanga nannekekeya jhe mundo jwenio, ni lilaka lya Bhambo Chapanga na lupemelo lwake nalujhaka kwa mundo jwenio, likoto lyoha lilijhandikwe mu kitabo chenje nalimpata jwenio, na Bhambo Chapanga nannyomola pulutu mundo jwenio. 21 Bhambo Chapanga nammeka puupele kuhumii pakate jha makabila ghoha ghaku Ichilahele, kupala ghampate mang'ahe kulengana na likoto lyoha, ngita chijhandikwe mu kitabo chenje cha malaghano."

22 Ku ibheluko ipakuika, ibheluko ino na akaghene kuhumii ku kilambo chukutale nabhalola mang'ahe Bhambo Chapanga chakiletile kilambo chenje mang'ahe na malagho. 23 Kilambo chino choha nakihangabhanwa kukutwelee maghanga gha balute na mwinyo, kibhijhe kilebhe chochoha chikipakumela hilu manyahe naghamela jhe. Kilambo chino nakibhaha ngita pikibha kipinde Bhambo Chapanga paikomilikiya Chodoma na Gomola na Adima na Seboimo, ku lilaka lyake ngalya. 24 Ena, bhando bhilambo yoha bhilonge, kilebhe ghane Bhambo Chapanga akitehi yene kilambo chenjeno? Kilebhe ghane lilaka lya Chapanga lichochite naha? 25 Bhando nabhajhangula naha, ndi nhwalo bhando bha Chapanga bhalipuchite lilaghano lya Bhambo Chapanga, Chapanga jwa akahokobhabhe, kipinde chabhabhohita mu kilambo chuku Michile, 26 ngabhajhenda kuitumikii na kuijhinamila ichapanga henge, jhangaimanya makacho, ibhakanakilwa kuijhinamila na Bhambo Chapanga. 27 Yene lilaka lya Bhambo Chapanga ngilijhaka panane jha bhando bha kilambo chenie, kukuleta mang'ahe nu kukilete likoto lyoha jhijhandikwe mu kitabo chenje. 28 Chenie ndi chikintendita Bhambo Chapanga, abhabhohe kukilambo chabhe. Ngabhayomila hake na ngabhataghila ku kilambo chenge ngita chibhii deleno.

29 Ilebhe ya lupwepo ndi ya Bhambo Chapanga, Chapanga gwito, nambo ghala ghayekwile ndi ghito na ibheluko ito machiko ghoha ghangapeta, kupala tughakengama malobhe ghoha gha malaghalikilo ghanga.