1 "Bhambo Chapanga, Chapanga gwino, ipakumpeleka kukilambo chimpakujhenda kutola kubhehe jhino, naghabhenga bhando bha makabila ndii ghabhoke mu kilambo chenio, pumichocha kujhenda nnonge, naghabhenga nnonge jhino bhando bha makabila chaba ghina makakala kupeta mangota, makabila ghenie ndi Akahite na Akagiligache na Akaamole na Akakaane na Akapeliche na Akahive na Akayebuche. 2 Kipinde chenio Bhambo Chapanga, Chapanga gwino, papakwatenda makamule nukwahotola, mangota mipalwa kwakoma hilu mangalaghana nabho jhe hilu mangakole kiya jhe. 3 Mangatolana nabho jhe, hilu mwana gwino mangaleka jhe bhatolane nabho. 4 Nhwalo anda ntehi yenio, nabhahotola kwalongoya yana hino kuijhinamii ichapanga jhenge. Na anda ipitii yenio, Bhambo Chapanga nanchimwangana mangota na kunkoma pulutu kajhombe. 5 Nambo mangota ntenda naha, ntilunane chehemo jhichengitwe yukupikii litambiko Chapanga na kuheketa heke yake. Na nhangabhane inyagho ya ichapanga jwabhe Ashela nukutiniya mwotu inyagho yabhe yukubhacha. 6 Ntende yenio nhwalo mangota ndi bhando bhinnyeketilwe palonge jha Chapanga gwino. Mu ilambo yoha pannema anhaghuline mangota mme bhando bhake bha kanjika.

7 "Bhambo Chapanga ampalangine jhe mangota nu kuhaghula mangota chi nhwalo mangota mikibha bhamahele kupeta bhando bhange, nhwalo makibha bhandina tugha kupeta bhando bhoha. 8 Nambo nhwalo Bhambo akatehi kumpala mangota na nhwalo Bhambo ikamuu malaghano ghalapila kwa akahoko bhino, chene ndi chikinkangita ammohe ku lubhoko luna makakala mmoke mubhanda, kubhoka mu mabhoko gha Falao, munahota nkolongwa jwa ku Michile. 9 Yene, umanya kubhehe Bhambo Chapanga, Chapanga gwino, ndi Chapanga gwino, ndi Chapanga jwanhobholeka jwakamuu malaghano ghake nu kwatende ghambone kwa maelufo gha ibheluko kwa bhala bhibhakamuu mihilo jhake, 10 nambo abhe jhe nikiholo kwahadabula bhando bhangakamuu nu kuhalibii mihilo jhake. 11 Yene, mukilolekeye maha kukamuu mihilo na malaghalikilo na mapalano ghake jhinimpela deleno."

12 "Anda mitembekii mihilo jhenje nu kuikamula kukuhobholeka, Bhambo Chapanga, Chapanga gwino nalibhilila jhe lilaghano lyake nu kunangiya umbone kwino ngita chalaghina na akahokobhino. 13 Nampalangana nu kumpe mota na mangota nanyonjekeka nu kubhehe twe ibheluko hino. Mighonda jhino nahitenda ibhehe na mota, mmota yakulya na divaye na mahuta gha micheitune. Helahela nampela mota jha ipugho ng'ombi na mambelele hoko, mu kilambo chabhalaghila akahokobhino kubhehe nampela mangota. 14 Nankola na mota kuliku bhando bhoha pannema, pakate jhino nabhe jhe mundo ntonga hilu inyama ino naileka jhe kubhelekana. 15 Bhambo Chapanga nankengelela na malwalo ghoha ghighajhoghowa, nanalwa jhe ngita chinalwita kukilambo chuku Michile, nambo malwalo gheniya nabhapela akamakoko bhino. 16 Mipalwa makoma bhando bhoha bhilambo Bhambo Chapanga, Chapanga gwino, nabhantenda mahotole, mangabhone kiya jhe. Na mangajhinamii jhe ichapanga yabhe, nhwalo kilebhe chenio nakibhaha ntambo kwino.

17 "Mangabhe jhe nikiholo kubhehe bhando abha bhabhii twe kupeta twenga, natuhotola bhole kwabhenga pikilambo? 18 Mangapwele jhe bheniya, nkombokela ghaghalaghala Bhambo Chapanga, Chapanga gwino, chantendila Falao, munahota nkolongwa na bhando bhoha bhuku Michile. 19 Nkomboka mabulo ghukujhoghowa ghinnolita kwa miho ghino ikangacho na nginyililo pamonga na makakala makolongwa na uhotolo nkolongwa gwatendita Bhambo Chapanga, Chapanga gwino kunkombola, yene ndi chapakwatenda bhando bheniya bhimapwelela. 20 Kuchocha kwa gheniya, Bhambo Chapanga napeleka manyigho kwakoma bhala bhibhatila nu kujhobha. 21 Yene, mangapwelela jhe, nhwalo Bhambo Chapanga, Chapanga gwino abhii pamonga na mangota, jwenio ndi Chapanga jhuna makakala na jhukujhoghowa. 22 Bhambo Chapanga, Chapanga gwino nabhakoma bhando bha makabila gheniya kachoko kachoko kila pimighaheghelela. Nabhakoma jhe mala jhimo, nhwalo anda ntehi yene mmanya inyama yukumanyahe naichocha nu kuchumbuwa. 23 Bhambo Chapanga, Chapanga gwino, nabhatenda mahotole akamakoko bhino na kwatenda bhapwelela ade bhakomelekeye njwenjwe. 24 Chapanga nantenda makamule akanahota akakolongwa bhabhe. Namakoma na kwalibhilila njwenjwe. Abhii jhe mundo jwapakunhotola ade pumpakwakoma. 25 Inyagho yoha mitiniya mwotu, manganoghe jhe na madine gha feza yabhe hilu chaabo yabhe na mangatenda jhe kubhehe ino. Anda ntehi yene naubhaha ntambo kwino na ilebhe yaichimwa Bhambo Chapanga, Chapanga gwino. 26 Inyagho yenie mangajhingii nayo jhe munyumba ino, anda ntehi yene natola likoto lyabhe, mipalwa michimwa nu kuipucha inyagho yenio nhwalo ibhii nilikoto lya Bhambo Chapanga.