1 "Mangotamwe makayana bha Bhambo Chapanga, Chapanga gwino, mingikilemba nembo jhe hilu kucheku lupala kunhwalo gwa mundo jwajhomwike ngita chibhatehila bhange. 2 Mangotamwe mabhando bha Bhambo Chapanga, Chapanga gwino, bhanhagwii mangota kubhehe bhando bhake, pakate jha bhando bhoha bhibhatama pannema."

3 "Mangalye jhe kilebhe chochoha chikikanikilwe palonge jha Chapanga. 4 Nambo inyama bhimihoto kulye ndi henge, ng'ombi na mambelele na mbuhe, 5 mbabhala na oloko na mbuhe nhwitu na kipalama na mbalape na ndandala, 6 na kila kinyama china kipagha chikibhaghanike pabhele na chikidukula yene ndi mihoto kulyegha. 7 Nambo mangalye jhe kinyama chochoha kipagha chake changabhaghanika na kiduku jhe, ngamiya na kipecha na kichechele, ipachuke jhe ipagha yabhe, yenio naintenda bhangajheketelwa jhe palonge jha Bhambo Chapanga. 8 Na ligholobhe mangalye jhe, pamo libhii nikipagha chikibhaghanike nambo liduku jhe, lyenio kujheketelwa jhe nnonge jha Bhambo Chapanga. Yene mangalye jhe nyama jhi inyama yenie hilu mangapapaha jhe mituhe jhake."

9 "Mihoto kulye homba yoyoha ina maghabatilo nu mapezi. 10 Na kila chikitama umache changa mapezi na maghabatilo mangalye jhe, yenio naintenda mangajheketelwa jhe palonge jha Bhambo Chapanga."

11 "Mihoto kulye ijhune yoha ijheketelwa na Chapanga. 12 Nambo ijhune henge mangalye jhe, limbanga na kapongo, 13 litumbuhe na kapongo mpile na kapongo na limbanga likele, 14 na aina jhoha jha mapanga na matumbuhe, 15 na kila makongolo kwa aina jhake, 16 na litobhunjola jwandina na litobhonjola nkolongwa na litobhonjola nhuo, 17 litobhonjola li kunjenga na mahilimila, 18 na kinholobhele kinhuo na aina yoha ya inholobhele na lipumbumbu na kinimenime.

19 "Idudu yoha ichokombe imbuluka kwa malongo ghake, yenie yoha mangalyengana jhe mangota. 20 Nambo mihoto kulye ihumbe yoha ina mapapanilo ijheketelwa na Bhambo Chapanga."

21 Mangalye jhe kinyama chikijhiwelii chene, mihoto kumpe nng'ene jwaitama mu kilambo chino alyeghe, amu muhoto kunchuluchila mundo jwa kilambo chenge, nhwalo mangota ndi mabhando bha Bhambo Chapanga, Chapanga gwino.

"Mangatutu jhe litohe lya limbelele amu litohe lya mbuhe mu mabhele gha majhe mundo."

22 "Mangakotoka jhe kupiya lipungo lya kome lya mahuno ghino gha mighonda jhino kila chaka. 23 Peniya nnyenda palonge jha Bhambo Chapanga, Chapanga gwino papahagwii pakunnyinamila, na kwenio nnonge jha Bhambo Chapanga, nanyakila mapungu gha kome gha mahuno ghino ghaa divaye na mahuta gha micheitune na gha ng'ombi jhukutumbula kubhelukwa na gha mambelele ghino. Ntendangane yene kupala mikibhole kunnyokanikiya Bhambo Chapanga, Chapanga gwino, machiko ghoha ghangapeta. 24 Anda chehemo jhu kunnyinamii Bhambo Chapanga, Chapanga gwino ibhii kutale kuhumii kajhino nu mangota mihoto jhe kughegha mapungo gha kome gha matambiko ghino gha mahuno ghampii Bhambo Chapanga ntenda naha, 25 bhahe, nchulucha ilebhe yenio ya mapungu gha kome nu kutola mbijha yenio ade chehemo pakujhinamila papahagwii Bhambo Chapanga, Chapanga gwino. 26 Na mbijha yenio ntumila kukuhemela kilebhe chochoha chamipala, nyama jha ng'ombi na jha mbuhe na jha limbelele na divaye amu chukunywe kikale, mwenga na bhando bha kajhino nnyakila nu kuhanganila nnonge jha Bhambo Chapanga, Chapanga gwino."

27 "Mangalibhilii jhe Akalawe bhibhatama pamonga na mangota, nhwalo bheniya bhapalwa jhe chehemo jha kilambo kubhehe chabhe pakate jhino. 28 Kila pukipala kupehekela chaka chu utato, mpiya lipungo lya kome lya mahuno ghu munng'onda nu kubheka kihukilo mu miche jhino. 29 Kihukilo chenie nakibhaha kwa nhwalo jha Akalawe, nhwalo bhajhito bhakwetii jhe lipungo hilu chehemo jhabhe pakate jhito, pamonga na akaghene na akakebha na akanahwela bhibhatama pamonga na mangota, bhaika kulye nu kujhukuta. Ntenda yenio, Bhambo Chapanga, Chapanga gwino nampela mota mu mahengo ghino ghoha ghimihenga kwa mabhoko ghino."