1 "Ghanga ndi malaghalikilo na mihilo jhimipalwa kuikamuu nu kukengama mu kilambo champii Bhambo Chapanga jwa akahoko bhino, kubhehe chino machiko ghoha ghimpakutama mu kilambo chenie. 2 Mipatilulana njwe chehemo jhoha pibhajhope bhando ichapanga yabhe, mwitombe itandamaho na mwiikola jha mu mikongo mikolongwa jhibhii na mahamba mabhehe. 3 Mitilulana okwe chehemo yabhe yoha jhukupikiya nu kutupulii okwe heke yabhe. Mwitiniya kwa mwotu huna ya inyagho ya ichapanga ikemwa Ashela, na kuitwikulana inyagho yabhe yukubhacha nu kuputilii okwe liina lyabhe lya chehemo jhenio."

4 "Wala minganyinamii jhe Bhambo Chapanga gwino, ngita chibhaijhinamii bheniya ichapanga yabhe. 5 Nambo nannyenda chehemo pahagwii Bhambo Chapanga, Chapanga gwino, mu makabila ghoha kupa kulibheka liina lyake ni kitamo chake peniya, kwenio ndi kumipala kujhenda kunnyinamila. 6 Kwenio ndi kumipalwa kupeleka matambiko ghino ghukukomelekeya na matambiko ghange, na matambiko gha lipungo lya kome na matambiko gha nachile na matambiko gha kupala mabhene mangota na matibho gha ng'ombi na mbuhe nu mambelele ghino. 7 Kwenio mijhakila nnonge jha Bhambo Chapanga, Chapanga gwino, mihanganila mangota pamonga na bhando bha kajhino nhwalo jha mota jhampii Bhambo Chapanga, Chapanga gwino.

8 "Mangatenda jhe ngita chimitenda ngoheno, kila mundo chapala kutenda jwenio, 9 nhwalo mwamela manajhingii jhe chehemo jhu pakutama njelembo nu kutola kilambo jhimpakupela Bhambo Chapanga, Chapanga gwino. 10 Nambo pumipa kujhomboka lukemba Yoludane nu kutama mu kilambo chapakumpe Bhambo Chapanga, Chapanga gwino kubhehe chino na kutama njelembo, na jwenie nantenda mpomolele nkotokuchumbulilwa na akamakoko bhino bhoha bhibhapakuntindila, 11 kwenio chehemo Bhambo Chapanga, Chapanga gwino papakuhaghula kubhehe chehemo jha kitamo cha Liina lyake, peniya ndi pimipalwa kutoteka kila chinninaghalikiya, matambiko ghino ghukukomelekeya na matambiko ghange, gha mapungu gha kome na matambiko gha nachile ghinnaghii kumpikiii Bhambo Chapanga. 12 Peniya nuhangana nnonge jha Bhambo Chapanga, Chapanga gwino, mangota pamonga na yana ino inalome na ikeghe, akatumiche bhino akanalome na akakeghe na Akalawe bhibhatama mu miche jhino, nhwalo bheniya bhakwetii jhe chehemo jhibhapilwa jhabhe pakate jhino. 13 Mikilolokeye, mangapiya jhe matambiko ghino ghu kukomelekeya chehemo jhojhoha jhimipala mabhene, 14 nambo matambiko ghino mpiya chehemo jhela tugha jhihaghulilwe na Bhambo Chapanga pakate jha kilambo chino. Peniya ndi pimipalwa kuleta litambiko lino li kukomelekeya, nukukamwu ghoha ghinninaghalikiye."

15 "Nambo mihoto kunchinja nu kulye inyama ino papoha pimipala kutama. Mihoto kulye inyama yamahele ngita hela chamipala ngita hela champela Bhambo Chapanga, Chapanga gwino. Bhando bhibhajheketilwe amu bhangajheketelwa, bhihoto kulye nyama jhenio, ngita chimilye nyama jha mbabhala amu oloko. 16 Nambo mangalye jhe myahe jha inyama yenio, myahe jhenio mijhitila muundope ngita mache. 17 Mangalye jhe ilebhe henge yumumpikii Bhambo Chapanga chehemo jhgha mitama, lipungo lya kome lya mahuno ghino hilu divaye jhino hilu mahuta ghino gha micheitune hilu matibho gha ng'ombi amu mbuhe na mambelele ghino amu matambiko gha nachile amu matambiko ghino mabhene amu matambiko ghange. 18 Nambo nanyakila ilebhe yenio nnonge jha Bhambo Chapanga, Chapanga gwino, chehemo jhapakuhaghuu Bhambo Chapanga, Chapanga gwino. Nanyakila mangota pamonga na yana ino inalome pamonga na ikeghe na akatumiche bhino akanalome na akakeghe na Akalawe bhibhatama mu miche jhino. Mipalwa nhwanganila nnonge jha Bhambo Chapanga, Chapanga gwino. 19 Helahela mipalwa, mangalibhalili jhe Akalawe machiko ghoha ghimpakutama pikilambo chino."

20 "Bhambo Chapanga, Chapanga gwino, papakujhonjeke mipaka jha kilambo chino, ngita channaghila, namangota nannongela kubhehe, ‘Tupala kumemena nyama,’ nhwalo mipala nyama, peniya mihoto kumemena nyama tane jhino. 21 Bhahe, chehemo jhapakuhaghula Bhambo Chapanga, Chapanga gwino, abheke liina lyake, peniya nanhotola kunchinja ng'ombi amu limbelele lyolyoha lyampile Bhambo Chapanga ngita channaghila, na mihoto kulye nyama jhenio tane jhino, anda mmii mu miche jhino. 22 Mmemena nyama jhenio ngita chimimemena nyama jha mbabhala amu oloko. Mundo jhojhoha ihoto kumemena, jwajheketilwe kunnyinamiii Chapanga na jwangajheketelwa kunnyinamii Bhambo Chapanga. 23 Nambo mipalwa myahe mangalye jhe nyama jhina myehe, nhwalo myahe ndi ughome, yene mangalye jhe ughome pamonga na nyama. 24 Mangalye jhe myahe jhenio, nambo mijhitila paundope ngita mache. 25 Anda namukengama nhwilo ghongo, Bhambo Chapanga nahanganichwa na mangotana ilebhe ino nainyendela telatela, ichokolo ya yana ino, nhwalo mitenda ghambone nnonge jha Bhambo Chapanga. 26 Ilebhe ino ipiitwe kubhehe ya Bhambo Chapanga na matambiko ghino gha nachile, namwitola nu kuipeleka chehemo jhu kumpikiya Bhambo Chapanga jhapakuhaghula. 27 Peniya, ndi nampiya matambiko gha kukomelekeya na nyama pamonga na myahe, mu chehemo jhukumpikii litambiko jhapahagwii Bhambo Chapanga, Chapanga gwino, myahe jha kinyama namuimichila mu chehemo jhenio pa kupiikiya litambiko Bhambo Chapanga, Chapanga gwino, nambo nyama mihoto kukememena. 28 Mipalwa kukamuu malaghalikilo ghanga ghininaghalikiya, kupala ilebhe ino inyendela telatela mangota pamonga na ibheluko ino, machiko ghoha ghangapeta, nhwalo mitenda ghambone na ghabhii tela nnonge jha Bhambo Chapanga, Chapanga gwino."

29 "Kipinde Bhambo Chapanga, Chapanga gwino papakwabhenga bhando bha ilambo henge nnonge jhino nu kumpela mangota, nambo pimipakwabhenga na nu kutama mangota mu kilambo chabhe, 30 mmambala mangakengama jhe ndela jhu kujhinamii ichapanga yabhe nhwalo gwenio ndi ntambo kwino. Hilu mangakonya jhe, ‘Bhando bhamba bhijhinamii bho ichapanga yabhe? Kupala natwenga hele tukajhinamile ngita bheniya.’ 31 Mangannyinamii jhe Bhambo Chapanga, Chapanga gwino ngita bheniya chibhajhinamii ichapanga yabhe, nhwalo kila kilebhe chukuchimwa changakipala Bhambo Chapanga pibhajhinamila ichapanga yabhe. Kabhele bhahipiya yana yabhe inalome na ikeghe kubhehe matambiko ghu kukomelekeya kwa ichapanga yabhe."

32 "Mipalwa kutenda kila kilebhe chinninaghalikiye, mangapongocha jhe kilebhe hilu kujhonjekeya kilebhe."