1 Peniya, Mucha ngabhoka pandika jha Moabu, ngajhenda kukitombe chiku Nebo, ngakwela kukilegheleghe cha Pisiga mwiye na mwiye jha Yeliko. Peniya, Bhambo Chapanga nganangiya kilambo choha, kubhoke ku Gileade ade ku Dane. 2 Chehemo jhoha jha Nafutale na chehemo jha Efulaimo na pa Manache, na chehemo jhoha jhuku Yuda ade kumbwane jha ku Meditelaniya, 3 chehemo jha Negebo pamonga na chehemo jha njenga jha Yeliko pikondita muche gwa mitende ade ku Sohale. 4 Peniya, Bhambo Chapanga ngannobholila Mucha, "Chenje ndi kilambo chanapila Ulahimo na Ichaka na Yakobu kubhehe, naniipela ibheluko yabhe. Ninnangiye tugha nambo naninneka jhe nnyingila."

5 Yene, Mucha ntumiche jwa Bhambo Chapanga ngajhomwika kwenio kukilambo chuku Moabu ngita Bhambo Chapanga chalongila. 6 Bhambo Chapanga nganchika kuling'engo lyuku Moabu mwiye jha kilambo chuku Bete Peole, nambo ade ngohe abhii jhe mundo jwalimanye likabule lyake. 7 Mucha akibha na yaka miya jhimo na makome mabhele pajhomwika na miho ghake ghakibha ghanakojhokana jhe na akibha na malango ghambone na makalala. 8 Akaichilahele ngabhalelita malelo kwa machiko makome matato, pandika jha kilambo chuku Moabu. Peniya, machiko ghukugholoka matanga pighajhomwikila.

9 Yochuwa mwana gwa Nune ngatweliwa uhuke gwa malango, nhwalo Mucha akammekii mabhoko ghake, yene Akaichilahele ngabhannyokanikiya Yochuwa nu kuikamuu mihilo ngita chibhannyokanikiya Mucha tela na Bhambo Chapanga palaghila.

10 Ade ngohe anapitii jhe nnondole jwa Bhambo Chapanga ku Ichilahele ngita Mucha na jwalongila nako Bhambo Chapanga ngita mundo chalonge nanyake. 11 Abhii jhe nnondole jhonge jwahotwii kulangiya nginyililo na ikangacho, ngita Mucha yatumitwa na Bhambo Chapanga atende kwa akanahota akakolongwa bhuku Michile na akatumiche bha kilambo chake choha. 12 Abhii jhe nnondole jhonge jwahotwii kuhenga ilebhe ikolongwa yukujhoghowa ngita yatehila Mucha nnonge jha Akaichilahele bhoha.