1 "Anda mumwene ng'ombi amu limbelele lya nnongo gwino Mwichilahele ahobhite, manganneka jhe, nambo mumujhicha kwa nnongo gwino. 2 Nambo anda kajhake nnongo gwino kulipa amu mumanyii jhe nkola lyake, bhahe, mukipeleka kinyama chenie kajhino, kitama kajhino ade nkolo jwake papakupitila, namwe namumujhichila. 3 Ntende helenaha anda abhii liponda amu ngobho amu kilebhe chochoha mangakileka kinhobhalela cha nnongo gwino. Mangaleka jhe kuntangatila.

4 "Anda miliwene liponda lya nnongo gwino amu ng'ombe jwake ligwelii pandela, mangaleka jhe kuntangatila, muntangatila nnongo gwino kunnyinula kinyama chenio.

5 "Akakeghe bhingiwala jhe ngobho yakanalome, na akanalome bhingiwala jhe ngobho yakakeghe. Jwatenda yenie ndi kilebhe chakichimwa Bhambo Chapanga, Chapanga gwino.

6 "Anda mukolii uhue gwa kijhune munkongo amu pandela, kibhii na mapupo amu mahombe na nyongolo aghajhobhotii mahombe gheniya, mangampukii jhe nyongolo. 7 Munneka nyongolo ajhabhule, nambo mihoto kutola mapupo. Anda ntehi yene namma na mota nu kutama yaka twe.

8 "Pimichenga nyumba, mmeka ubhegho kunane jhi kipaghalo, kupala mangakokolekelwa jhe anda mundo agwile nu kuwe kubhoke kwenio.

9 "Makapanda jhe michabibo pamonga na ipandwa henge mughonda gwino, kukutenda naha uhohe gwa nchabibo gwino hilu uhoe ipandwa henge nhwalo nibhe jhe ino.

10 "Mangantabha jhe lingolengole limo ng'ombi ni liponda pamonga, pimilema nng'onda.

11 "Mangawala jhe ngobho jhilokitwe kwa mangoma gha limbelele pamonga na kitambala kinhuo.

12 "Ntabha ihundo ya nyuche mu pandi yoha ncheche ya ngobho jhino."

13 "Anda munalome atolii mwikeghe nu kugholoka nako, peniya ipala kunneka, 14 nu kulonge malobhe ghuwange kuntakalila mwikeghe jwenio, pange mwikeghe jwenio akibha aumanye munalome kabula jhukutolana."

15 Bhahe, akatate bha mwikeghe jwenio bhatola uchaile gwa mwana gwabhe kulangii anagholoka jhe na munalome nu kupeleka uchaile gwenio kwa ilongoche bha muche na kwalangiya, kulonge kubhehe, 16 "Tatemundo nalongela kubhehe ‘Tukantolanikiche kamwale jwito kwa mundo ojho, nambo ngohe impala jhe kabhele. 17 Tuhechuka kukuntakalila kwa ilebhe ya hone nu kulonge kubhehe ankolii jhe nu uchaile gwa ghoha ghulangii kubhehe akibha aumanye munalome. Ata yene uchaile gwa kamwale gwito ulangiii kubhehe anakongana jhe na munalome ndi ghongo pamba.’ Peniya, akatate mundo nahatambula ngobho jhina uchaile gwenio nnonge jha ilongoche bha muche. 18 Peniya, ilongoche bha muche bhintola munalome jwenio nu kumbula yato. 19 Nabhahadabula mundo jwenio alepa ipande makome kome ya madine gha feza na kumpela tate jhumukeghe jwenio kwa nhwalo munalome jwenio ampii hone kamwale jwa Ichilahele. Nu mwikeghe jwenio ajhendelela kubhehe nhwanamundo na ihoto jhe kunneka mughome gwake ghoha."

20 "Nambo anda matakalilo gheniya gha chakaka, na ubhii jhe uchaile ghulangii akibha aumanyii munalome kabula jhukutolana, 21 bhimpeleka mwikeghe jwenio ku litangala lya nyumba jha tatemundo na akanalome bha kilambo chenie bhimbula maghanga ade aweghe, nhwalo ubhoho ku Ichilahele ku kutenda ngongola kunyumba jha tatemundo. Ndi chimpala kuibhilikiya ubhoho gwenio pakate jhino."

22 "Anda munalome bhunhumbwi nu mwikeghe jwa mundo jhonge, bhoha bhabhele munalome na mwikeghe bhipalwa bhakomwa. Ndi nanhubhikiliya ubhoho gwenio pakate jhino."

23 "Anda munalome agholwike na kamwale jwapokii kibane cha mundo kubomane, anda agholwike nako, 24 mahutila panja jha muche bhoha bhabhele na kwabula maghanga ade kuwegha. Kamwale jwenio akomwa nhwalo achobhii jhe kanonoya kupala atangatilwa pamo nu kubhehe akibha pabomane, helahela munalome akomwa nhwalo agholwike na mwikeghe jwapokile kibane cha mundo jhonge, Yene ndi chimpa kuibhilikiya ubhoho gwenio pakate jhino mangota."

25 "Nambo anda munalome akongine na kamwale kunng'onda panja jha pabomane jwapokii kibane cha munalome jhonge nu kunnimba, peniya munalome jwenio tu jwapakukomwa. 26 Manganhadabu jhe kamwale jwenio chochoha, nhwalo akwete jhe lilemwa lilimpala akomwa. Kilebhe chenie cha munalome, kibhaha tela na mundo jwannyingilii mundo jhonge nu kunkoma, 27 nhwalo munalome jwenio akannimbite kamwale jwenio, pamo nukuchobhela kanonoya kujhopa kutangatilwa pakibha jhe na mundo jhu kuntangatila.

28 "Anda munalome ikamulwa ku kunnimba kamwale, 29 munalome jwenio nannepa tate jwa kamwale jwenio ipande makome nhwano ya madine gha feza, kwa nhwalo ankoliche hone. Munalome jwenio apalwa kuntola kamwale jwenio abhe nhwanamundo, kabhele apalwa jhe kunneka muughome gwake ghoha.

30 "Munalome jhojhoha angagholoka jhe na mwikeghe jwa tatemundo, kukutenda yene nankolecha hone tatemundo.